وسىدان ءبىر اي بۇرىن ەۆگەني كورەشكوۆ شاكىرتتەرى قحل-ءدىڭ 10 كۇندىك ۇزىلىسىنە دەيىنگى سوڭعى ويىنىن ماسكەۋدىڭ تسسكا كلۋبىنا قارسى وتكىزىپ, 5:3 ەسەبىمەن جەڭىسكە جەتكەن ەدى. بۇل ويىندا «بارىس» تەك جەڭىسكە جەتىپ قانا قويماي, ماۋسىم ارالىق ۇزىلىسكە «شىعىس» كونفەرەنتسياسىندا ءبىرىنشى ورىنمەن شىققان-دى. ۇزىلىستەن كەيىن ەلوردا ۇجىمى نە قىرسىق شالعانى بەلگىسىز, سوڭعى ويىنداردا جەڭىلىستەن كوز اشپاي كەلەدى.
ءدال قازىرگى ۋاقىتتا «بارىس» كومانداسى «شىعىس» كونفەرەنتسياسىندا 60 ۇپايمەن سەگىزىنشى ورىندا تۇر. ال توعىزىنشى ساتىداعى «امۋر» ءبىزدىڭ كلۋبتان ءۇش ۇپاي ارتتا. دەگەنمەن, حاباروۆتىڭ كومانداسى «بارىستان» ەكى ويىن كەم وتكىزگەندىگىن ەسكەرسەك, وتانداستارىمىز ءالى دە تومەنگە سىرعيتىنى انىق. ەگەر «بارىس» ۇزدىك سەگىزدىكتەن ءتۇسىپ قالاتىن بولسا, وندا ولار ءۇشىن ماۋسىم اياقتالدى دەي بەرۋگە بولاتىن شىعار.
11 ويىندا «بارىس» كومانداسى ءوز قاقپاسىنا 42 شايبا وتكىزىپ السا, قارسىلاستارعا 14 گولمەن جاۋاپ بەرگەن. بۇل ارالىقتاعى ءتورت ويىندا استانا ۇجىمى شايبا سوعۋدى مۇلدەم ۇمىتىپ قالعان سياقتى. ەڭ وكىنىشتىسى, سىرت الاڭدا سكا كومانداسىمەن كەزدەسۋ وتكىزىپ, 9:1 ەسەبىمەن وڭباي ۇتىلدى. بۇل «بارىستىڭ» كحل تاريحىنداعى ەكىنشى ەڭ ءىرى جەڭىلىسى ەدى. ءبىر جىل بۇرىن ءدال وسى سكا كلۋبى «بارىس» قاقپاسىنا جاۋاپسىز توعىز شايبا توعىتقانىن جانكۇيەرلەر ءالى ۇمىتا قويعان جوق شىعار.
جوعارىدا «بارىستىڭ» جەڭىلىسكە تولى سەرياسى شاعىن ۇزىلىستەن كەيىن باستالعانىن ايتىپ قالدىق قوي. سول ارالىقتا ەۋروتۋردىڭ ءبىرىنشى كەزەڭى وتكەن بولاتىن. بۇل سىنعا «بارىس» ساپىنان تەك ليندەن ۆەي عانا قاتىسقان. قالعان حوككەيشىلەردىڭ بارلىعى استانادا قالىپ, جاتتىعۋ جۇمىستارىن جالعاستىرعان-دى. ارالىق ءۇزىلىس كەزىندە ۇلتتىق قۇراما ويىنىنا كەتكەن ۆەيدىڭ جوقتىعى «بارىستىڭ» دايىندىعىنا كەرى اسەرىن تيگىزدى دە ايتا المايمىز. بارلىق ماسەلە ءبىر ويىنشىعا تىرەلەتىن بولسا, ماۋسىم باسىندا كاپيتانسىز ويناعان «بارىستىڭ» الدەقاشان سالى سۋعا كەتۋشى ەدى. جىل باسىندا «بارىس» دوۋسسىز-اق ءتاپ-ءتاۋىر ويىن كورسەتكەنى جانكۇيەرلەردىڭ ەسىندە.
سونداي-اق, ءدال قازىرگى ۋاقىتتا كوماندا ساپىندا جاراقات الىپ, ەمدەلىپ جاتقان ەشبىر ويىنشى جوق. ۇزدىك حوككەيشىلەردىڭ بارلىعى دا مۇزايدىنعا شىعىپ ءجۇر. سوندا دا «بارىس» ءوز ويىنىن تابا الماي اۋرە. دەمەك, جەڭىلىستىڭ سەبەبى ىشكى ماسەلەدە بولىپ تۇر.
مامانداردىڭ ايتۋىنشا, كوماندادان برەندون بوچەنسكي مەن داستين بويد كەتكەن سوڭ, «بارىستىڭ» ويىنى السىرەپ, شايبا سوعۋ ازايعان. راس, «بارىسقا» قازىر بوچەنسكي مەن بويد سەكىلدى كوماندانى العا سۇيرەيتىن ويىنشى جەتىسپەيدى. لەي مەن دوۋس بار عوي دەپ ءۋاج ايتۋىڭىز مۇمكىن, بىراق تومەنگى ەكەۋىن جوعارىداعى ەكى ويىنشىمەن سالىستىرۋعا مۇلدەم كەلمەيدى. كەلەسى ماۋسىمدا «بارىس» كوماندانى العا سۇيرەيتىن حوككەيشى الماسا, بيىلعى كۇيدى كەلەسى جىلى دا كەشەتىنى انىق. ايتپاقشى, گول سوعۋدان ءبىر-بىرىمەن جارىسىپ, الدارىنا جان سالماي جۇرگەن لەي مەن دوۋس جۇبى وتكەن 11 ويىندا التى-اق شايبا سوققان.
«استانا» پرەزيدەنتتىك كلۋبى قامقورشىلار كەڭەسىنىڭ ەكس-توراعاسى, قازىرگى پارلامەنت سەناتىنىڭ دەپۋتاتى دارحان قالەتاەۆ ەلىمىزدىڭ باسىلىمدارىنىڭ بىرىنە بەرگەن ءبىر سۇحباتىندا «پرەزيدەنتتىك كلۋبتىڭ 40 پايىز بيۋدجەتى «بارىس» حوككەي كلۋبىنا بولىنەدى. 30 پايىزى «استانا» فۋتبول كلۋبىنا, 25 پايىز ۆەلو كلۋبقا بولىنگەن. ال قالعان بەس پايىز وزگە كوماندالارعا ۇلەستىرىلەدى», دەگەن بولاتىن.
جالپى, كەز كەلگەن نارسەنىڭ پارقى سالىستىرعاندا بىلىنەدى عوي. «استانا» پرەزيدەنتتىك كلۋبىنىڭ بولگەن قارجىسىن قازاقستاننىڭ ءيميدجىن حالىقارالىق ارەنادا كوتەرىپ, فۋتبولدان ەۋروپا ليگاسىنىڭ پلەي-وفف كەزەڭىنە شىققان «استانا» فۋتبول اقتاپ ءجۇر مە, الدە ون جىلدان بەرى قحل-ءدىڭ فينالىنا شىعا الماي, قارجىنى اۋاعا شاشىپ جۇرگەن «بارىس» حوككەي كلۋبى اقتاپ ءجۇر مە؟
«بارىس» قۇرلىقتىق حوككەي ليگاسى اياسىنداعى كەلەسى كەزدەسۋىن 18 جەلتوقسان كۇنى براتيسلاۆادا «باتىس» كونفەرەنتسياسىندا سوڭعى ورىنداردىڭ بىرىندە كەلە جاتقان جەرگىلىكتى «سلوۆان» كومانداسىمەن سىنعا تۇسەدى. بۇدان بولەك, «بارىس» جىل سوڭىنا دەيىن تاعى بەس ويىن وتكىزەدى. وسى ماتچتاردا جەڭىسكە جەتە المايتىن بولسا, ليگانىڭ پلەي-وفف كەزەڭىنەن تىس قالدى دەي بەرۋگە ابدەن بولادى. بىلتىرعى ماۋسىمدا «بارىس» جارتىلاي فينالعا دەيىن جەتكەن-ءدى.
ءالي بيتورە,
«ەگەمەن قازاقستان»
