ەلباسىنىڭ «100 ناقتى قادام» ۇلت جوسپارىندا كورسەتىلگەن باستى باسىمدىقتاردىڭ ءبىرى – كاسىبي بىلىكتى مەملەكەتتىك قىزمەت اپپاراتىن جاساقتاۋ بولىپ تابىلادى. وسى ماقساتتا ۇلتتىق ۇلان «وڭتۇستىك» وڭىرلىك قولباسشىلىعى ۇيىمداستىرعان بايقاۋدىڭ ناتيجەسىندە ۇزدىك ساردارلار انىقتالدى. بايقاۋ جەڭىمپازدارىن ۇلتتىق ۇلان «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور قايرات اقتانوۆ سالتاناتتى تۇردە ماراپاتتادى.
اسكەري بولىمشەلەردەگى جاۋىنگەرلىك دايىندىقتى جەتىلدىرۋ, وفيتسەرلەردىڭ بىلىكتىلىكتەرىن ارتتىرۋ, باتالون, روتا, ۆزۆود بويىنشا لاۋازىمدىق تۇلعالاردى ىرىكتەۋ جانە تاجىريبە الماسۋ ماقساتىندا ۇيىمداستىرىلعان بايقاۋعا «وڭتۇستىك» وڭىرلىك قولباسشىلىققا قاراستى 11 اسكەري بولىمنەن ىرىكتەلگەن 38 وفيتسەر قاتىستى. ولار قىزىلوردا, وڭتۇستىك قازاقستان, جامبىل, الماتى وبلىستارى جانە الماتى قالاسىنداعى اسكەري بولىمدەردەن قاتىسقان بولاتىن.
«ۇلتتىق ۇلان اسكەري قىزمەتشىسىنەن اتقارار ماماندىعى بويىنشا ءبىلىمى مەن بىلىكتىلىگى ءتيىستى تالاپقا دالمە-ءدال, ءجۇز پايىزدىق دەڭگەيدە ساي بولۋى تالاپ ەتىلەدى. اسكەرىمىزدىڭ ورتا بۋىن كومانديرلەرى – وفيتسەرلەر, كەلىسىمشارت نەگىزىندەگى اسكەري قىزمەتشىلەر جانە ساربازداردى وقىتىپ, تاربيەلەۋمەن اينالىساتىن ادام. مىنە, سوندىقتان دا, ۇزدىكتەردى ىرىكتەۋ ماقساتىندا وسىنداي بايقاۋ ۇيىمداستىرىپ وتىرمىز. بۇل بايقاۋ ەڭ اۋەلى ۇلتتىق ۇلان وفيتسەرلەرىن كاسىبي تۇرعىدا شىڭدالۋعا, ءبىلىم-بىلىكتىلىكتەرىن ۇشتاۋعا جانە دە ءوز ەلىنىڭ پاتريوتى بولۋعا ۇندەيدى», دەدى «وڭتۇستىك» وڭىرلىك قولباسشىلىعىنىڭ قولباسشىسى گەنەرال-مايور قايرات اقتانوۆ.
بۇل بايقاۋ كەزىندە اسكەريلەردىڭ تەوريالىق بىلىمدەرىمەن قاتار تاجىريبەلىك قارىم-قابىلەتتەرى دە سىنالدى. ولار شەشۋشى كەزەڭدە قارۋدان اتىپ, جاۋىنگەرلىك دايىندىقتارىن سىنعا سالدى. اقتىق كەزەڭنىڭ العاشقى كۇنى وفيتسەرلەر ساپتىق دايىندىقتارىن, مەملەكەتتىك ءتىل, قىزمەتتىك تاكتيكا, جالپىاسكەري جارعىلار بويىنشا بىلىمدەرىن جانە دە جەكە قۇرامدى ۇيىمداستىرۋ بىلىكتىلىكتەرىن تانىتتى. بايقاۋدا وسال وفيتسەر جوق, ارقايسى ەرەكشە دايىندىقپەن كەلگەندەرىن كورسەتتى. ايتا كەتەتىنى, وڭتۇستىك ءوڭىردىڭ تۇكپىر-تۇكپىرىنەن كەلگەن ساردارلار بايقاۋدان تىس ۋاقىتتا الماتىداعى 28 پانفيلوۆشى باتىرلارعا ارنالعان ساياباققا بارىپ, داڭق مەموريالىنا تاعزىم جاساپ, گۇل شوقتارىن قويدى.
جەڭىمپازدار مەن جۇلدەگەرلەرگە قازاقستان ۇلتتىق ۇلانى «وڭتۇستىك» وڭىرلىك قولباسشىلىعى قولباسشىسىنىڭ بۇيرىعىمەن ديپلوم, گراموتالار جانە باعالى سىيلىقتار بەرىلدى. سونداي-اق بايقاۋ بارىسىندا ارداگەرلەر كەڭەسىنىڭ توراعاسى گەننادي فالەەۆ جەڭىمپازداردى باۋىرجان مومىش ۇلى اتىنداعى «باتىر شاپاعاتى» مەدالىمەن ماراپاتتادى.
ساپارباي پارمانقۇل,
«ەگەمەن قازاقستان»
الماتى
