وتاندىق دەلەگاتسيانى سىرتقى ىستەر ءمينيسترى قايرات ءابدىراحمانوۆ باسقارىپ, ونىڭ بايانداماسى كەڭەستىڭ ءبىرىنشى پلەنارلىق وتىرىسىن اشتى. وتىرىس قاتىسۋشىلارىنا جولداعان ۇندەۋىندە ول قازاقستان پرەزيدەنتىنىڭ بەلسەندى قىزمەتىنىڭ ارقاسىندا ۇيىمنىڭ ءححى عاسىردا قابىلدانعان جالعىز ساياسي قۇجاتى – 2010 جىلعى ەقىۇ ءسامميتىنىڭ استانا دەكلاراتسياسىندا بەلگىلەنگەن يدەيالارى مەن قاعيداتتاردىڭ وزەكتىلىگى ساقتالاتىنىن اتاپ ءوتتى.
ق. ءابدىراحمانوۆ ارىپتەستەرىنىڭ نازارىن جالپىعا ورتاق ديالوگ پەن جانجالدى جاعدايلارعا بىرلەسە جاۋاپ قايتارۋ جانە ولاردىڭ الدىن الۋ بويىنشا كەلىسىلگەن ءىس-شارالاردى جۇزەگە اسىرۋدى جالعاستىرۋدىڭ ماڭىزدىلىعىنا اۋدارىپتى. سونىمەن بىرگە, قازاقستاننىڭ باسىمدىقتارى بۇۇ قاۋىپسىزدىك كەڭەسىنىڭ تۇراقتى ەمەس مۇشەسى جانە ەۋرازيا اۋماعىنداعى مەدياتسيا ارەكەتتەرى رەتىندە انىقتالادى.
وتاندىق ديپلومات جاھاندىق لاڭكەستىككە قارسى كواليتسيا مەن تەرروريزم مەن ەكسترەميزمگە قارسى جاھاندىق ءىس-قيمىل بويىنشا ارەكەت كودەكسىن قۇرۋ تۋرالى پرەزيدەنت نۇرسۇلتان نازارباەۆتىڭ نەگىزگى باستامالارىن ۇسىنىپ, ەقىۇ-نىڭ شىۇ, ۇقشۇ جانە 2018 جىلى قازاقستان توراعالىق ەتەتىن ازيا كەڭەسىمەن ءوزارا ىقپالداستىعىن نىعايتۋ ءۇشىن ناقتى قادامداردى ىسكە اسىرۋعا شاقىردى.
مينيستر اعىمداعى جانە بولاشاقتاعى قاۋىپسىزدىك سالاسىنداعى اسكەري سىن-تەگەۋرىندەر بويىنشا قۇرىلىمدى ديالوگتىڭ باستالعانىن جوعارى باعالادى. بۇل مەحانيزم سەنىمدى قالپىنا كەلتىرۋ جانە اسكەري بەلسەندىلىكتىڭ, اسكەرلەر كونتسەنتراتسياسىنىڭ جانە ونىڭ سالدارى رەتىندە اسكەري وقيعالار قاۋپىنىڭ وسۋىنە جول بەرمەۋ ماقساتىندا ەقىۇ اۋماعىنداعى قارۋ-جاراققا باقىلاۋ جونىندەگى ديالوگتى ىسكە قايتا قوسۋ ءۇشىن ارنالعان. ەلىمىزدىڭ وعان بەلسەندى قاتىسۋىنا ازىرلىگى راستالدى.
قازاقستان تاراپىنىڭ پىكىرىنشە, ەقىۇ شەڭبەرىندە ءپاتۋا, تۇراقتىلىق پەن ىنتىماقتاستىقتى قۇرۋ بويىنشا ۇيىمنىڭ ەكونوميكالىق-ەكولوگيالىق ولشەمى دە سىندارلى ءرول اتقارۋى ءتيىس. بۇل باعىتتى ودان ءارى دامىتۋدىڭ نەگىزى – پرەزيدەنت ن.نازارباەۆتىڭ باستامالارىنا تولىعىمەن سايكەس كەلەتىن جاھاندىق جانە وڭىرلىك ينتەگراتسيالىق ۇردىستەردى بىرىكتىرۋ بولۋى مۇمكىن.
سونىمەن قاتار, ق. ءابدىراحمانوۆ ەقىۇ-نىڭ باس حاتشىسى توماس گريمينگەردىڭ تاقىرىپتىق ميسسيالاردى قۇرۋ جونىندەگى باستاماسىن قۇپتادى. بۇل تۇرعىدا قازاقستان سىرتقى ساياسي ۆەدومستۆوسىنىڭ باسشىسى ەكسپو-2017 الاڭىن استانادا «ەقىۇ-نىڭ ءوزارا بايلانىس جانە جاسىل ەكونوميكا جونىندەگى ورتالىعىن» ورنالاستىرۋ ءۇشىن قولدانۋدى ۇسىندى.
قازاقستان سىرتقى ىستەر ءمينيسترىنىڭ توراعالىعىمەن وتەتىن سىمك قارساڭىندا تاراپتار ەقىۇ-نىڭ كۇن تارتىبىندەگى تاسىلدەر جانە ەكى ۇيىم اراسىنداعى ىنتىماقتاستىقتىڭ وزەكتى ماسەلەلەرى بويىنشا پىكىر الماسۋ ورىن العان ۇقشۇ-عا مۇشە-مەملەكەتتەر سىرتقى ىستەر مينيسترلەرىنىڭ بەيرەسمي كەزدەسۋى ءوتتى. مۇنداي ىنتىماقتاستىقتىڭ ىقتيمال باعىتتارى رەتىندە قازاقستان, ۇقشۇ-عا توراعالىعىنىڭ ءوزىنىڭ باسىمدىقتارى تۇرعىسىندا, تەرروريزم, كيبەرقاۋىپسىزدىك جانە زاڭسىز ەسىرتكى اينالىمىنا قارسى كۇرەسكە ەرەكشە نازار ءبولۋدى ۇسىندى.
ءبىرىنشى كۇنى سىمك اياسىندا ق.ءابدىراحمانوۆ اۋستريا, يتاليا, ماكەدونيا, موڭعوليا, نيدەرلاند, ەستونيا مەن ەۋروپالىق وداق دەلەگاتسيالارىنىڭ باسشىلارىمەن ەكىجاقتى كەزدەسۋلەر وتكىزىپ, ارىپتەستەرىمەن ەكىجاقتى جانە كوپجاقتى ىنتىماقتاستىقتىڭ وزەكتى ماسەلەلەرىن تالقىلادى.
ەۋروپالىق سەرىكتەستەرمەن ورىن العان پىكىر الماسۋلار بارىسىندا وتاندىق ديپلومات قازاقستان مەن ەۋروپا ەلدەرىنىڭ ازاماتتارى اراسىنداعى بايلانىستاردى نىعايتۋ, ونىڭ ىشىندە ۆيزالىق رەجيمدى جەڭىلدەتۋ قاجەتتىگىن اتاپ ءوتتى.
ەقىۇ-نىڭ ءىس باسىنداعى توراعاسى – اۋستريانىڭ سىرتقى ىستەر جانە ينتەگراتسيا ءمينيسترى سەباستيان كۋرتسپەن كەزدەسۋى بارىسىندا قازاقستان-اۋستريا قارىم-قاتىناستارىنىڭ بۇكىل ماسەلەلەرى بويىنشا پىكىر الماسۋ ورىن الدى. ەرەكشە نازار ساۋدانى ءارتاراپتاندىرۋ مۇمكىندىكتەرىنە قويىلىپ ەكونوميكالىق ىنتىماقتاستىقتىڭ دامۋىنا, سونداي-اق قۇقىق قورعاۋ ورگاندارى اراسىنداعى تىكەلەي بايلانىس ورناتۋدى, ەكىجاقتى كەلىسىمدەرگە قول قويۋ جانە قازاقستاننىڭ ەۋروپا كەڭەسىنىڭ قۇقىقتىق قۇرالدارىنا قوسىلۋدى قامتيتىن قۇقىق سالاسىنداعى ىنتىماقتاستىققا اۋدارىلدى.
سونىمەن قاتار, ق.ءابدىراحمانوۆ س. كۋرتس باسقارىپ وتىرعان اۋستريالىق حالىق پارتياسىنىڭ بيىلعى قازان ايىندا پارلامەنتتىك سايلاۋىنداعى جەڭىسىمەن قۇتتىقتادى جانە ۇكىمەت قالىپتاستىرۋدا تابىستار تىلەپ, قازاقستانعا ساپارمەن كەلۋگە شاقىردى.
ەۋروپالىق وداق سىرتقى ساياسي قىزمەتىنىڭ باس حاتشىسى حەلگا شميتپەن جاھاندىق كۇن ءتارتىبى بويىنشا كولەمدى اڭگىمە بولدى. ديپلوماتتار يراننىڭ يادرولىق باعدارلاماسى جونىندەگى بىرلەسكەن كەشەندى ءىس-قيمىل جوسپارىن جۇزەگە اسىرۋ ماسەلەلەرىن, تاياۋ شىعىس جانە اۋعانستانداعى احۋالدى ەگجەي-تەگجەي قاراستىردى. ەۋروپالىق تاراپ قازاقستان پرەزيدەنتىنىڭ يادرولىق قارۋدى تاراتپاۋ جانە قارۋسىزدانۋ سالاسىنداعى كۇش-جىگەرىن, سونداي-اق ەۋرازيالىق قۇرلىعىنداعى جانجالدى جاعدايلاردى رەتتەۋ ۇدەرىسىندەگى ءرولىن اتاپ ءوتتى.
ەقىۇ سىرتقى ىستەر مينيسترلەرى كەڭەسىنىڭ وتىرىسى 8 جەلتوقساندا جالعاسادى جانە بىرقاتار مينيسترلىك شەشىمدەر مەن دەكلاراتسيالاردى قابىلداۋمەن اياقتالادى.
