وندا وبلىس اكىمى ارحيمەد مۇحامبەتوۆ سىبايلاس جەمقورلىققا قارسى جۇمىستار جونىندە اڭگىمەلەدى. وعان جوعارى وقۋ ورىندارىنىڭ ستۋدەنتتەرى, «ادال ۇرپاق» پاتريوتتىق كلۋبىنىڭ ەرىكتىلەرى, جاس مەملەكەتتىك قىزمەتكەرلەر, وبلىستىق بالالار مەن جاستار ۇيىمدارى قاۋىمداستىعىنىڭ, «گرين» ازاماتتىق اليانسىنىڭ, جاستار رەسۋرسى ورتالىعىنىڭ, جاستار ءماسليحاتىنىڭ ۆولونتەرلەرى, سونىمەن قاتار «جاس اتمەكەن» كاسىپكەرلەر كلۋبىنىڭ مۇشەلەرى قاتىستى.
«ەگەر قانداي دا ءبىر قالادا, اۋداندا سىبايلاس جەمقورلىق بەلگىسى بىلىنسە, ءبىز سول جەرگە بارىپ, كوشپەلى ءماجىلىس وتكىزەمىز. ارينە, ناتيجەسى بولماي قالمايدى. ەڭ باستىسى قوعامدىق كەسەلدىڭ الدىن الامىز. ءبىز ءۇشىن پروفيلاكتيكا, الدىن الۋ ماڭىزدى» دەدى ارحيمەد بەگەجان ۇلى.
ءوڭىر باسشىسى مەملەكەتتىك ساتىپ الۋ كەزىندە بارماق باستى, كوز قىستى ارەكەتتەردەن اباي بولۋعا ساقتاندىردى.
«مەن وبلىس باسشىلىعىنا كەلگەندە سوتتا «ۇلكەن اكىمدىك ءىسى» ءجۇردى, باسقا دا كەلەڭسىز ىستەر ورىن العان بولاتىن. بۇل كادرلاردى دۇرىس تاڭداپ قويۋ كەرەك دەگەن تۇجىرىم جاساتتى. كادرلاردى جەرگىلىكتى مامانداردان تاڭدادىم. قوستانايعا مەن كەلگەندە ونىڭ اكىمى دە, باسقا ماماندارى دا جوق بولدى, بارلىعى دا قىلمىستى ىسكە شاتىلعان ەكەن. قالا قىسقا دايىندىقسىز بولدى, باسقا دا كوپتەگەن وزەكتى ماسەلەلەر تۇردى. بىزگە وسى قيىندىقتاردىڭ بارلىعىن دا ءۇزىلىسسىز, تۇرىپ قالماي شەشۋ كەرەك بولدى. ونىڭ بارلىعىنان, تىعىرىقتان شىقتىق. وسىنداي وقيعالاردان كەيىن مەملەكەتتىك ساتىپ الۋدى باسقارۋعا باسشىنى اسىقپاي مۇقيات تاڭدادىق» دەدى ارحيمەد بەگەجان ۇلى.
وبلىس اكىمى كەزدەسۋگە قاتىسۋشىلاردىڭ كوپتەگەن سۇراقتارىنا جاۋاپ بەردى. ول ءبىر سۇراققا وراي, قازىر دابىرلاتقان ۇلكەن فورۋمدار كۇتكەندەگىدەي ناتيجە بەرمەيتىنىن, وعان قارجى دا كوپ كەتەتىنىن ايتتى. ەڭ باستىسى, ءىستىڭ ناتيجەسى بواتىنداي جۇمىستار جۇرگىزۋ قاجەت دەدى.
كەزدەسۋدە مەملەكەتتىك قىزمەت جانە سىبايلاس جەمقورلىققا قارسى ءىس-قيمىل دەپارتامەنتىنىڭ باستىعى بەرىك بەكجانوۆ جانە تاعى باسقالار پىكىرلەرىن ورتاعا سالدى.
ءنازيرا جارىمبەت,
«ەگەمەن قازاقستان»
قوستاناي
