كونتسەرتتىڭ سالتاناتتى اشىلۋ راسىمىندە سويلەگەن قازاقستاننىڭ نيدەرلاندتاعى ەلشىسى ماعجان ءىلياسوۆ ءوز سوزىندە ەكىجاقتى ىنتىماقتاستىقتىڭ بارلىق سالالارىندا وڭ وزگەرىستەر ورىن العاندىعىن اتاپ ءوتتى. اتاپ ايتقاندا, حالىقارالىق كۇن ءتارتىبى ماسەلەلەرىنىڭ كوبى بويىنشا ۇقساس ۇستانىمدار بولىپ, 2018 جىلدا ەكى مەملەكەت بۇۇ-نىڭ قاۋىپسىزدىك كەڭەسى شەڭبەرىندە بەلسەندى ءوزارا ارەكەتتەستىككە ءازىر ەكەندىكتەرىن ءبىلدىرىپ وتىر.
مۋزىكالىق كەشتىڭ شىمىلدىعى قۇرمانعازىنىڭ «بالبىراۋىن» كۇيىمەن ءتۇرىلدى. ودان ءارى اڭىزعا اينالعان «The Beatles» اعىلشىن توبىنىڭ اتاقتى تۋىندىلارى قازاقستان وركەسترى تاراپىنان كلاسسيكالىق مانەردە ورىندالدى. كونتسەرت اياقتالعاننان كەيىن كورەرمەندەر قازاقستاندىق ارتىستەردى دۋ قول شاپالاقپەن ماراپاتتادى. كونتسەرتتىك زالدىڭ دالىزدەرىندە قوناقتار ءبىر-بىرىمەن كەشتەن العان كەرەمەت اسەرلەرىمەن ءبولىستى.
تىڭدارماندار اراسىندا حالىقارالىق ۇيىمداردىڭ باسشىلارى, ديپلوماتيالىق ميسسيالاردىڭ باسشىلارى, گوللانديالىق ءىرى كومپانيالار مەن بانكتەردىڭ باسشىلىعى, بەنيليۋكس مەملەكەتتەرىنىڭ زيالى قاۋىم وكىلدەرى, سونداي-اق قازاقستاندىق دياسپورا جانە نيدەرلاندتا وقىپ جاتقان وتانداس ستۋدەنتتەرىمىز بولدى.
گوللانديا سىرتقى ىستەر مينيسترلىگى ەۋروپا دەپارتامەنتىنىڭ ديرەكتورى دافنە بەرگسما: «بۇگىن ءبىز «قازاقستان كامەراتاسى» ارتىستەرى ورىنداعان الەمدىك كلاسسيكالىق جانە قازاق ۇلتتىق اۋەندەرىنىڭ تاماشا ورىندالۋىنا كۋا بولدىق. ورەلى ونەرپازدار بىزگە اسا جوعارى كاسىبي شەبەرلىكتەرى مەن ۇمىتىلماس ونەر كەشىن سىيلادى», دەپ اتاپ ءوتتى.
