وسىدان جارتى عاسىر بۇرىن قۇرىلعان ايرىقشا ورتالىقتىڭ ءدال بۇگىنگى كۇنى دە ەلىمىزدە ەشقانداي بالاماسى بولماي وتىر. ءوز قىزمەتىن تاۋەلسىز ەلىمىزدە دەربەس ءوز جولى بار سالالار رەتىندە تانىتىپ ۇلگەرگەن استرانوميا جانە عارىش سالالارىمەن تىعىز بايلانىستى جۇرگىزىپ وتىرعان اقتوبە پلانەتاريىنىڭ جولى ايىرىقشا. ەلىمىزدىڭ قوعامدىق جانە مادەني ومىرىندە الاتىن ورنى بولەك. بۇل ەرەكشە ورتالىق قازىرگى كۇنى اسپان دەنەلەرىن زەردەلەۋگە قاتىستى بارلىق تالاپتارعا جاۋاپ بەرە الادى. اسىرەسە ونىڭ الداعى ماقساتىن جوعارىدا اتالعان سالالارمەن بايلانىستىرعىسى كەلەتىن جەتكىنشىكتەرگە تيگىزەتىن شاپاعاتى مەن تاعىلىمىنا ەشقانداي باعا جەتپەيدى. اتالعان پلانەتاريدىڭ ديرەكتورى قورلان بولەكوۆ بىزگە ءوز وي پىكىرىن بىلايشا جەتكىزدى.
-قازىرگى تاڭدا ۇجىمدا جيىرما ادام جۇمىس جاسايدى. بىزدە تۇنگى اسپاندا جىمىڭ قاققان جۇلدىزدارمەن ىشتەي سىرلاسقىسى كەلەتىندەرگە ارنالعان ارنايى بولمە بار. وعان ءبىر مەزگىلدە ەلۋ ادام سىيا الادى. كىم-كىمدە وزگەشە ءبىر جۇلدىزدار الەمىنە كىرۋگە قىزىعۋشىلىق تانىتقاندار وسى ارادان كەلگەن ماقساتتارىنا جەتە الادى. دامۋدىڭ بۇگىنگى قارقىندى كەزەڭى پلانەتاريدەگى تەحنيكالار مەن قوندىرعىلاردى ۇدايى جاڭعىرتىپ تۇرۋدى قاجەت ەتەدى. بۇگىنگى كەزدە وسىنداي جوعارى تالاپتار ۇدەسىنەن شىعۋعا ۇمىتىلىپ كەلەمىز.
اقتوبە پلانەتاريى جاس تالعامايدى . ونىڭ قىزمەتىمەن تانىسقىسى كەلگەن ۇلكەن دە كىشى دە مۇندا اسپان الەمىنىڭ قىر-سىرىنا قانىعا الادى. بۇل باعىتتا ارنايى اشىلعان ۇيىرمەلەرگە قاتىسۋعا ىقىلاس بىلدىرگەن ۇل-قىزدار دا جەتكىلىكتى. ولاردىڭ اراسىندا حالىقارالىق وليمپيادالاردا جۇلدەلى ورىندارعا يە بولىپ جۇرگەندەر دە بار. پلانەتاريگە كەلۋشىلەر قاي كەزدە دە تولاستاعان ەمەس. ولار بۇل ارادان جۇلدىزدى الەم-كۇللى الەم ەكەن-اۋ دەگەن وي جەتەگىندە تارقاسادى.
تەمىر قۇسايىن
"ەگەمەن قازاقستان"
اقتوبە
