وسى ورايدا ەلباسى جامبىل وبلىسىنداعى ەكى كاسىپورىننىڭ جۇمىسىن باستاۋعا پارمەن بەردى. اتالعان نىساندار مويىنقۇم اۋدانىنىڭ وندىرىستىك ايماعىندا ورنالاسقان. «ورگستروي» جاۋاپكەرشىلىگى شەكتەۋلى سەرىكتەستىگى قۇرىلىسقا قاجەتتى گرانيت وندىرۋمەن اينالىسادى. سوندىقتان اتالعان سەرىكتەستىكتىڭ ونىمىنە سۇرانىس جوعارى. ۇدەمەلى يندۋستريالىق-يننوۆاتسيالىق دامۋدىڭ مەملەكەتتىك باعدارلاماسى اياسىندا جۇمىسىن باستاعان سەرىكتەستىك بۇل كۇندە قايتا وڭدەۋ زاۋىتىن پايدالانۋعا بەردى. سول ارقىلى تابيعي گرانيتتى وڭدەۋدىڭ جاڭا ءتاسىلىن ەنگىزۋدىڭ العاشقى كەزەڭىن اياقتادى.
بۇگىندە كاسىپورىن ءوندىرىس كولەمىن 5 ەسەگە ارتتىرۋ مۇمكىندىگىنە يە بولىپ, قازىر مۇندا جىل سايىن 800 مىڭ تەكشەمەتر پليتا, گرانيتتى توسەمدەر مەن 200 مىڭ توننا بورديۋر وندىرىلەدى. ءونىمنىڭ 60 پايىزى تمد ەلدەرىنە ەكسپورتتالۋدا.
ەلباسى جۇمىسىن باستاۋعا پارمەن بەرگەن ەكىنشى نىسان مويىنقۇم اۋدانىنداعى «التىن الماس» اق. اتالعان كاسىپورىن اقباقاي فيليالى نەگىزىنەن قۇرامىندا التىن-كۇمىسى بار كەن ءوندىرىپ, وڭدەۋدى جۇزەگە اسىرادى. ىرگەتاسى قالانعانىنا بيىل التىنشى جىل تولىپ وتىرعان ءوندىرىس ورنىندا بۇگىندە «تسيفرلى كەنىش» جوباسى جۇزەگە اسىرىلۋدا. اتالعان جوبا بولجام بويىنشا 2018-2020 جىلدارى 472 249 مىڭ دوللاردىڭ 12 628 كيلوگرامم ءونىمىن ءوندىرۋ الەۋەتىنە يە. اعىمداعى جىلدىڭ ون ايى كولەمىندە مۇندا 1413 كيلوگرامم التىن مەن 324 كيلوگرامم كۇمىس وندىرىلگەن. بۇگىندە كاسىپورىن بارلىعى 1031 ادامدى جۇمىسپەن قامتىپ وتىر.
حاميت ەسامان,
«ەگەمەن قازاقستان»
جامبىل وبلىسى
