جيىندا «نۇرلى جول» ينفراقۇرىلىمدىق دامۋ باعدارلاماسىن ىسكە اسىرۋعا بولىنگەن قاراجاتتى پايدالانۋدىڭ جاريالىعى مەن تيىمدىلىگىن قامتاماسىز ەتۋ باعىتىنداعى شارالار تالقىلاندى.
وتىرىستى اشقان گ.ابدىقالىقوۆا ەلباسى نۇرسۇلتان نازارباەۆتىڭ «ەگەر سىبايلاس جەمقورلىق قىلمىسىن جاساسا, ەشكىمگە دە جەڭىلدىك جاسالمايدى جانە ەشكىم جازادان قۇتىلمايدى» دەگەن ءسوزىن اتاپ ءوتتى. سودان كەيىن مەملەكەتتىك حاتشى «نۇرلى جول» باعدارلاماسىنىڭ ورىندالۋ بارىسىنا توقتالدى. ونىڭ ايتۋىنشا, اتالعان باعدارلامانى ورىنداۋ بارىسىندا مەملەكەتتەن ەكى تريلليون تەڭگە قاراجات جۇمسالعان.
«نۇرلى جول» باعدارلاماسى ەل ەكونوميكاسىنداعى قۇرىلىمدىق رەفورمالاردى جالعاستىرۋعا, ترانزيتتىك الەۋەتتى دامىتۋعا جانە كولىك ينفراقۇرىلىمىن حالىقارالىق جۇيەگە ينتەگراتسيالاۋعا باعىتتالعان. ورتالىقتا, جەرگىلىكتى جەرلەردە ونىڭ ۋاقىتىلى جانە ءتيىمدى ورىندالۋىن قامتاماسىز ەتۋ ماڭىزدى», دەدى گ.ابدىقالىقوۆا.
مەملەكەتتىك حاتشىنىڭ سوزىنە سۇيەنسەك, بۇگىنگى تاڭدا بۇل باعىتتا قابىلدانىپ جاتقان شارالار جەتكىلىكسىز بولىپ وتىر. ماسەلەن, مەملەكەتتىك اۋديت ورگاندارى باعدارلامانى ورىنداۋ ءۇشىن جۇمسالعان بيۋدجەت قارجىسىن يگەرۋگە تەكسەرۋ جۇرگىزگەندە 34,3 ميلليارد تەڭگە مولشەرىندەگى زاڭ بۇزۋ فاكتىلەرىن انىقتاعان.
اگروونەركاسىپ سالاسىنداعى پروكۋرورلىق تەكسەرىستەر ناتيجەسىندە جالپى قۇنى 15 ميلليارد تەڭگە بولاتىن 3,5 مىڭ زاڭ بۇزۋ تىركەلگەن. سونىمەن قاتار, 2,6 ميلليارد تەڭگە كولەمىندەگى سۋبسيديانى زاڭسىز تولەۋدىڭ جولى كەسىلدى. سىبايلاس جەمقورلىققا قارسى قىزمەت 2015 جىلدان بەرى مەملەكەت قازىناسىنا ميللياردتاعان شىعىن كەلتىرگەن 27 قىلمىستىق ءىستى قوزعاعان.
سونداي-اق, وتىرىستا ينۆەستيتسيالار جانە دامۋ مينيسترلىگىنىڭ, باس پروكۋراتۋرانىڭ, رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ باياندامالارى تىڭدالدى.
كوميسسيا تالقىلاۋ قورىتىندىسى بويىنشا وكىلەتتى ورگاندار مەن كۆازي-مەملەكەتتىك سەكتور سۋبەكتىلەرىنە انىقتالعان زاڭ بۇزۋشىلىقتاردى تالداۋ جانە الداعى ۋاقىتتا ونداي كەمشىلىكتەرگە جول بەرمەۋ ءۇشىن ارەكەت ەتۋ تەتىكتەرىن ازىرلەپ, ءتيىستى شارالار قابىلداۋدى تاپسىردى.
اباي اسانكەلدى ۇلى,
«ەگەمەن قازاقستان»
