ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى «قازاقستان حالقى اسسامبلەياسى تولەرانتتىلىعى جانە ەتنوسارالىق قاتىناستار ورتالىعى» ۇيىمداستىرىپ وتىرعان شاراعا الىس-جاقىن شەتەلدەردەن عالىمدار مەن ەلىمىزدىڭ ءار وڭىرىنەن تاريحشىلار جانە ادەبيەتتانۋشىلار شاقىرىلىپ وتىر. سونىمەن قاتار حالىقارالىق عىلىمي-تاجىريبەلىك كونفەرەنتسياعا قر پارلامەنتى سەناتى مەن ءماجىلىس دەپۋتاتتارى, مەملەكەت جانە قوعام قايراتكەرلەرى, اقىن-جازۋشىلار مەن كوزى تىرىسىندە قاتار جۇرگەن ۇزەڭگىلەس قالامگەر دوستارى قاتىسادى دەپ كۇتىلۋدە.
حالىقارالىق كونفەرەنتسيا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى, قر ۇعا اكادەميگى ەرلان سىدىقوۆتىڭ العى سوزىمەن اشىلىپ, جيىنعا ەۇۋ-ءدىڭ الەۋمەتتىك-مادەني دامۋ جونىندەگى پرورەكتورى, اكادەميك ديحان قامزابەك ۇلى مودەراتورلىق جاسايدى.
پلەنارلىق ماجىلىستە قر مەملەكەتتىك سىيلىعىنىڭ يەگەرى ق. سالعارا «اقسەلەۋ – ۇلتتىق تۇلعا»; قازاقستان حالقى اسسامبلەياسى تولەرانتتىلىعى جانە ەتنوسارالىق قاتىناستار ورتالىعىنىڭ ديرەكتورى, ت.ع.د., پروفەسسور س. سىزدىقوۆ «ورتاعاسىرلىق قارلىق تۇركىلەرىنىڭ قازاق شەجىرەسىمەن بايلانىسى»; قر ۇعا اكادەميگى ح. ءابجانوۆ «ساكرالدى گەوگرافيا: ءمانى, قۇرىلىمى, كەلەشەگى»; فيلولوگيا عىلىمدارىنىڭ دوكتورى, پروفەسسور ش. ىبىراەۆ «قازاقتىڭ ءداستۇرلى مادەنيەتىن زەرتتەۋشىسى»; قر ۇعا كوررەسپوندەنت-مۇشەسى ب. كارىباەۆ «نايمان شەجىرەسىنە قاتىستى ءحۇىىى-ءحىح عاسىرلارداعى ورىس تىلىندەگى ماتەريالدار جانە ولارعا سيپاتتاما»; شوقان ءۋاليحانوۆا اتىنداعى كوكشەتاۋ مەملەكەتتىك ۋنيۆەرسيتەتىنىڭ پروفەسسورى ك. ءابۋوۆ «شوقان ءۋاليحانوۆ قازاقتاردىڭ اۋىزشا تاريحى تۋرالى»; فيلولوگيا عىلىمدارىنىڭ دوكتورى ب.راحىموۆ «سەلەۋلى دالا پەرزەنتى» تاقىرىبىندا بايانداما جاسايدى.
كونفەرەنتسيا بارىسىندا ا.سەيدىمبەك تۋرالى دەرەكتى فيلم كورسەتىلىپ, عالىم تۋرالى كىتاپتاردىڭ تۇساۋكەسەر ءراسىمى ۇيىمداستىرىلادى.
حالىقارالىق شارا «ەۋرازيانىڭ اۋىزشا تاريح ءداستۇرى (شەجىرە)» جانە «ادەبيەتتانۋ, ءتىلى ءبىلىمى جانە جۋرناليستيكانى زەرتتەۋ ماسەلەلەرى» تاقىرىبىندا ەكى سەكتسيا بويىنشا ءوز جۇمىسىن جالعاستىراتىن بولادى.
كورنەكتى ادەبيەتتانۋشى عالىم, ەتنوگراف, ونەر زەرتتەۋشىسى, قازاقستان رەسپۋبليكاسى مەملەكەتتىك سىيلىعىنىڭ لاۋرەاتى, فيلولوگيا عىلىمدارىنىڭ دوكتورى, پروفەسسور اقسەلەۋ سلان ۇلى سەيدىمبەك 1942 جىلى 12 جەلتوقساندا قاراعاندى وبلىسىنىڭ جاڭاارقا اۋدانىنداعى بايدالى بي اۋىلىندا دۇنيەگە كەلگەن. ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن بىتىرگەن سوڭ ءومىرىنىڭ ءار كەزەڭىندە «جاس الاش», «ورتالىق قازاقستان», «ەگەمەن قازاقستان» گازەتتەرى, «زەردە» جۋرنالى, «الەم» الماناعى رەداكتسيالارىندا ءتۇرلى شىعارماشىلىق باسشى قىزمەتتەردە بولدى.
ەلىمىز تاۋەلسىزدىك العاننان كەيىن بىرىڭعاي عىلىمي جۇمىسقا اۋىسىپ, ى.التىنسارين اتىنداعى ءبىلىم پروبلەمالارى ينستيتۋتىنىڭ ديرەكتورى, قازاق ءبىلىم اكادەمياسىنىڭ پرەزيدەنتى, پرەزيدەنتتىڭ مادەني ورتالىعى ديرەكتورىنىڭ ورىنباسارى قىزمەتتەرىن اتقاردى. 2000 جىلدان باستاپ ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ كافەدرا مەڭگەرۋشىسى, پروفەسسورى بولىپ قىزمەت ىستەدى.
اقسەلەۋ سەيدىمبەك وقىرمانعا الدىمەن جۋرناليست رەتىندە تانىلدى. ونىڭ پۋبليتسيستيكالىق ەڭبەكتەرى جۋرناليستيكانى جاڭا دەڭگەيگە كوتەردى. جانىبەك كارمەنوۆ ەكەۋىنىڭ قازاقتىڭ ءان ونەرى تۋرالى سىر-سۇحباتتار سەرياسى قازاق تەلەۆيزياسىنىڭ التىن قورىنا كىردى.
ول ادەبيەتتانۋشى جانە ەتنوگراف عالىم رەتىندە ۇلتتىق تولتۋمالىقتى ايعاقتاۋعا ەلەۋلى ۇلەس قوستى, قازاقتىڭ قارا ولەڭدەرى مەن كۇي اڭىزدارىن جۇيەلەپ, عىلىمي اينالىمعا ءتۇسىردى. قازاقستاندا ەتنوگرافيالىق جانە ەتنولوگيالىق ىزدەنىستەردىڭ جاندانۋىنا ىقپال ەتتى. اقسەلەۋ سەيدىمبەكتىڭ ەسىمى زەردەلى ونەر زەرتتەۋشىسى ءارى ءورىستى ونەر يەسى رەتىندە حالقىمىزعا كەڭىنەن تانىمال. قازاقتىڭ ءداستۇرلى انشىلىك ونەرىن تۇعىر ەتە وتىرىپ, «سارىارقا», «داۋرەن-اي», «تولعاۋ» سياقتى ۇلت رۋحىن كوتەرەتىن تاماشا اندەر شوعىرىن دۇنيەگە اكەلگەن اقسەلەۋ سەيدىمبەك – قازاقستان رەسپۋبليكاسى ۇلتتىق كەڭەسىنىڭ, «مادەني مۇرا» مەملەكەتتىك باعدارلاماسى قوعامدىق كەڭەسىنىڭ, قازاقستان جازۋشىلار وداعى باسقارماسىنىڭ, پەن-كلۋبتىڭ مۇشەسى. ول – «قازاق ادەبيەتىنىڭ تاريحى» اتتى ون تومدىق تولىمدى ەڭبەك اۆتورلارىنىڭ ءبىرى. ونىڭ «كۇي-شەجىرە», «كوشپەلىلەر تاريحى», «قازاق الەمى», «قازاقتىڭ اۋىزشا تاريحى» سياقتى ىرگەلى ەڭبەكتەرى ۇلت رۋحانياتىنىڭ باعالى قازىناسىنا اينالدى. مارقۇمنىڭ ەل بىرلىگىن ساقتاۋ, مەملەكەت تاۋەلسىزدىگىن نىعايتۋ, ۇلت رۋحانياتىن ۇلىقتاۋ تاقىرىبىنا جازعان تاعىلىمدى ەڭبەكتەرى ءوز الدىنا ءبىر توبە.
وتىزعا جۋىق كوركەم, عىلىمي-كوپشىلىك, مونوگرافيالىق ەڭبەكتەر جازىپ, سوڭىنا مول مۇرا قالدىرعان اقسەلەۋ سەيدىمبەكتىڭ ەڭبەگى لايىقتى باعالانىپ, ول قازاقستان رەسپۋبليكاسى مەملەكەتتىك سىيلىعىنىڭ لاۋرەاتى, قازاقستاننىڭ ەڭبەك سىڭىرگەن قايراتكەرى اتانىپ, «قۇرمەت» وردەنىمەن ماراپاتتالدى.
