فوتو: تالعات تانىباەۆ
سولتۇستىك قازاقستان كورشى ەلدىڭ ءۇش وبلىسىمەن شەكتەسەتىن ءوڭىر بولعاندىقتان, قوس تاراپ اراسىنداعى ەكونوميكالىق قارىم-قاتىناس ءوز جەمىسىن بەرىپ كەلەدى. سوڭعى بەس جىلدا بىرلەسكەن كاسىپورىندار سانى 40 پايىزعا كوبەيىپ, ءبىر جىلدا 20 ميلليارد تەڭگەنىڭ سالىعى قۇيىلعان. تەرىسكەيدىڭ ەش قوسپاسىز, ەكولوگيالىق جاعىنان تازا ونىمدەرىن كورشىلەرىمىز تالاسا-تارماسا ساتىپ الاتىنىن شەكارانىڭ ارعى جاعىندا وتكىزىلىپ جۇرگەن اۋىلشارۋاشىلىق جارمەڭكەلەرى دە ايعاقتايدى.
جۋىردا ومبى قالاسىندا «قازماركەت» اتتى ساۋدا نۇكتەسى ءوز ەسىگىن ايقارا اشىپ, تۇتىنۋشىلارعا ەت, ءسۇت, كونديتەر تاعامدارىن ۇسىندى. ومبى وبلىستىق ەكونوميكا ءمينيسترىنىڭ ورىنباسارى دەنيس كۋشنەردىڭ ايتۋىنشا, سولتۇستىك قازاقستان وبلىسى نەگىزگى ارىپتەسى سانالادى. سىرتقى ساۋدا ۇلەسى 30 پايىزدى قۇرايدى. بيىل ونىڭ كولەمى 160 ميلليون دوللارعا جەتكەن. الداعى ۋاقىتتا دا ازىق-ت ۇلىك تۇرلەرى ساتىلاتىن ساۋدا الاڭدارى جۇيەسىن كەڭەيتۋ بەلگىلەنگەن.
جاقسى جاڭالىقتىڭ ءىزى سۋىماي جاتىپ ءوڭىر باسشىسى قۇمار اقساقالوۆتىڭ تاپسىرماسىمەن تاعى ءبىر ساۋدا پاۆيلونى بوي كوتەردى. «قازاقستاندا جاسالعان» برەندى شەكارالاس وڭىرلەردە كەڭىنەن تانىمال. وسى سەبەپتى سىرتقى نارىق قاجەتتىلىكتەرىن وتەۋدىڭ جولدارى جان-جاقتى ويلاستىرىلعان. بۇل ورايدا, تاۋارلاردىڭ مولدىعى مەن ساپاسى بارىنشا ەسكەرىلگەن. ءبىز وسى جاعىنا ۇلكەن كوڭىل ءبولىپ وتىرمىز», دەيدى «ەسىل» اۋماقتىق دامىتۋ ورتالىعىنىڭ ديرەكتورى رۋسلان شاريپوۆ.
مۇندا سولتۇستىكقازاقستاندىق تاۋار وندىرۋشىلەر ءوز ونىمدەرىن تىكەلەي, دەلدالسىز ۇسىناتىندىقتان باعا قولجەتىمدى. سورەلەردە سۇيىق ماي, جارتىلاي فابريكات, شۇجىق, قالبىرداعى ەت, جۇمساق, قاتتى ىرىمشىك, شىرىن, ۇن, ماكارون, كونديتەرلىك ونىمدەر, تاعى باسقا ەكى جۇزدەن استام ءونىم ءتۇرى ورىن العان. ومبىداعى «قازماركەت» ساۋدا جەلىلەرىنىڭ جەتەكشىسى ەۆگەني بويكو قازاقستاندا شىعارىلاتىن باسەكەگە قارىمدى تاۋارلار مەن ونىمدەرگە سۇرانىستىڭ ارتا تۇسكەنىن العا تارتتى. ونىڭ ءسوزىن تۇراقتى تۇتىنۋشىلاردىڭ ءبىرى ۆيكتور حومەنكوۆ, تاتيانا پشانوۆا دا راستاپ, دامدىلىگى ءتىل ۇيىرەتىن ازىق-ت ۇلىك تاعامدارىن ءبىرىنشى كەزەكتە ساتىپ الاتىندارىن جەتكىزدى.
مۇنداي ساۋدا نۇكتەلەرىن تۇمەن قالاسىندا دا اشۋ ۇيعارىلعان.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
