تۋرنيرگە تۇڭعىش رەت رەسەيدىڭ تانىمال سپورتشىسى, ريو-دە-جانەيرودا وتكەن وليمپيادانىڭ كۇمىس جۇلدەگەرى, بەس دۇركىن ەۋروپا چەمپيونى يانا كۋدرياۆتسەۆا كەلدى. سونداي-اق يانا الماتىدا جاس گيمناسشىلارعا شەبەرلىك دارىستەرىن وتكىزدى.
ءتۋرنيردىڭ اشىلۋ سالتاناتىندا سپورت باسقارماسىنىڭ باسشىلارى ءسوز الىپ, بۇل كۇندەرى قالادا كوركەم گيمناستيكا عانا ەمەس, جالپى گيمناستيكانى دامىتۋعا كوپ كۇش سالىنىپ جاتقانىن اتادى.
– تۋرنيرگە تالانتتى جەتكىنشەكتەر قاتىسىپ وتىر. وتە قۋانىشتىمىز. وزگە ەلدەردەن كەلگەن قاتىسۋشىلارعا جانە دە ۇيىمداستىرۋشىلارعا العىس بىلدىرەمىن. ءبىز ارقاشاندا وسى سپورت ءتۇرىن قولدايمىز, الداعى ۋاقىتتا ءوز چەمپيوندارىمىزدى كورەمىز دەگەن ۇمىتتەمىن, – دەدى الماتى قالاسى دەنە شىنىقتىرۋ جانە سپورت باسقارماسىنىڭ باسشىسى ءابىل دوڭباەۆ.
ءوز كەزەگىندە, تانىمال رەسەي سپورتشىسى يانا كۋدرياۆتسەۆا جارىسقا ارنايى قوناق رەتىندە شاقىرىلعانىنا العىس ايتىپ, ىزگى تىلەكتەرىن ءبىلدىردى.
جارىستا قىتاي, قىرعىزستان جانە قازاقستان قالالارىنان كەلگەن 3 جاستان باستاپ 16 جاسقا دەيىنگى قىزدار ونەر كورسەتتى. جەڭىمپازدار مەن جۇلدەگەرلەرگە باعالى سىيلىقتار مەن مەدالدار جيىنتىعى تابىستالدى.
– وسىنداي اۋقىمدى چەمپيونات وتكىزۋدى 2013 جىلى ءوزىمىزدىڭ كوركەم گيمناستيكا مەكتەبىن اشقان كەزدە جوسپارلاعان ەدىك. ءبىز ءۇشىن بۇل وتە ايتۋلى شارا. ءبىرىنشى ءتۋرنيردى بىلتىر وتكىزدىك. قاتىسۋشىلار سانى كوبەيىپ كەلەدى. قازىر كوركەم گيمناستيكا ەلىمىزدە ىلگەرىلەي باستادى, – دەيدى ۇيىمداستىرۋشى ءمادينا ۇركىمباەۆا.
سونىمەن بيىل 14 جاستاعى جاسوسپىرىمدەر اراسىنداعى 1-ورىندى الماتىلىق اناستاسيا كاساتكينا, 13 جاستاعى گيمناسشىلار اراسىنداعى 1-ورىندى قازاقستان ۇلتتىق قۇراماسىنىڭ مۇشەسى سابينا كيكيموۆا, 12 جاستاعىلار اراسىنداعى 1-ورىندى پاۆلودارلىق ايدانا ءمامجان جەڭىپ الدى.
ايناش ەسالي,
«ەگەمەن قازاقستان»
الماتى
