يتاليا ەۋرووداقتاعى ءۇشىنشى رىنوك بولىپ ەسەپتەلەدى. سوڭعى كەزدەرى بۇل ەلدىڭ ەكونوميكاسى دا وداقتىڭ قارجىگەرلەرىن الاڭداتىپ وتىر. سوندىقتان ولار پرەمەر-مينيستر س.بەرلۋسكونيدىڭ وتستاۆكاعا كەتكەنىن قالاۋدا.
اتاپ ايتقاندا, ون جىل بۇرىنعى مەملەكەتتىڭ وبليگاتسيالارىنىڭ قۇنى 6,8 پايىزعا قىمباتتاپ كەتكەن. بۇل ۇكىمەتتىڭ شىعىنىن ارتتىرىپ, ەۋروپالىق ورتالىق بانكتىڭ كومەگىنە جۇگىنۋگە يتەرمەلەيدى. الدىندا پورتۋگاليا وسىنداي كومەك العان بولاتىن. ونىڭ وبليگاتسيالارىنىڭ قۇنى 8 پايىزعا ارتقان ەدى. بىراق يتاليا پورتۋگاليا ەمەس, ونىڭ شىعىنىن جابۋ قيىنداۋ سوعادى.
قۇلشىلىق كەزىندە قازا بولدى
ءيندۋيزمنىڭ دە جىل سايىن قۇدايعا كوپ بولىپ قۇلشىلىق ەتەتىن جانە پەندەشىلىك كۇنالەرىنەن ارىلتۋدى تىلەيتىن جەرلەرى بار. ول – كۇنادەن ارىلۋ ءۇشىن وسى ايدا گانگ وزەنىنە شومىلۋ تۇرىندە بولادى.
سولتۇستىك ءۇندىستاندا ورنالاسقان وسىناۋ قاسيەتتى جەردە جۋىردا 16 قۇلشىلىق ەتۋشى قايتىس بولىپ, 50 ادام جارالاندى. قالىڭ كوپشىلىك وزەن جاعاسىنا قۇلاعانداردىڭ تۇرۋىنا مۇمكىندىك بەرمەي, ۇستەرىنەن باسىپ وتە بەرگەن. ناتيجەسىندە 16 ادام تۇنشىعىپ ولگەن.
ءادىل سوت ادىلدىكتەن مىزعىمادى
تاجىكستاندا رەسەي اۆياكومپانياسىنىڭ ۇشقىشتارى, ەستونيا ازاماتتارى ۆ.سادوۆنيچي مەن ا.رۋدەنكوعا 8,5 جىلدان باس بوستاندىعىنان ايىرۋ تۋرالى ۇكىم شىعارىلدى. ءسويتىپ, رەسەي باق-تارى ارا تۇسپەك بولىپ, قانشا جەردەن جار سالسا دا, قىلمىس ءۇشىن ءادىل جازا تاعايىندالدى.
تاجىكستاننىڭ حاتلون وبلىستىق سوتى باق-تاردىڭ بايبالام سالعاندارىنا قاراعان جوق, قىلمىستارى دالەلدەنىپ تۇرعان جانداردى قاي جەردىڭ ازاماتى ەكەندىگىنە قاراماي ءادىل جازا كەستى. ۇشقىشتار كونتراباندالىق تاۋارلار تاسىعانى, شەكارانى زاڭسىز بۇزعانى جانە ۇشۋ ءتارتىبىن بىرنەشە رەت بۇزعاندىعى دالەلدەنگەن سوڭ, ءتيىستى جازالارىن الدى. بۇل جازا ساياسي تۇرعىدا تاجىكستاننىڭ تاۋەلسىز ەل رەتىندەگى بەدەلىن كوتەرە تۇسەرى انىق.
حالىقتىڭ جاعدايىن جاقسارتۋدى ويلاعان
گەرمانيا وكىمەتى شاعىن جانە ورتا كولەمدەگى داۋلەتتەرى بار ازاماتتار ءۇشىن تابىس سالىعىن ازايتۋدى كوزدەپ وتىر. وسىنىڭ سالدارىنان وكىمەتكە تۇسەتىن كىرىس مولشەرى 6 ملرد. ەۋروعا ازايماق. حالىقتىڭ باسىم كوپشىلىگىن قۋانتقان بۇل قادام ا.مەركەل وكىمەتىنىڭ بەدەلىن ارتتىرا بەرەرى انىق.
سالىقتى ازايتۋ 2013 جانە 2014 جىلدارى ەكى كەزەڭدە جۇرگىزىلەدى. ۇكىمەتتىڭ بۇل شەشىمى پارلامەنت پەن فەدەرالدىق جەرلەردىڭ بۋندەستراتەكتەرى ماقۇلداعان سوڭ زاڭ كۇشىنە ەنەدى. ۇكىمەتتىڭ ءوزى حالىقتى قولداۋعا قول سوزىپ تۇرسا, وكىلەتتى ورگاندار ونى قالاي قولداماسىن, شەشىمنىڭ ءسوزسىز قابىلداناتىنىنا ءشۇبا كەلتىرۋشىلەر جوق.
قازان توڭكەرىسىن ارداقتاۋدى قالامايدى
7 قاراشادا كەيبىر پوستكەڭەستىك ەلدەردەگى سەكىلدى بەلورۋسسيا استاناسىندا دا كوممۋنيستەر القىزىل جالاۋلارىن كوتەرىپ, ميتينگىگە شىقتى. بىراق ولاردىڭ مەرەكەلىك كوڭىل-كۇيلەرى سۋ سەپكەندەي باسىلدى.
ويتكەنى, ەلدەگى «جاستار مايدانى» اتتى قوزعالىستىڭ جۇزدەگەن مۇشەلەرى ميتينگىگە شىققانداردى شىرىگەن جۇمىرتقالارمەن اتقىلاۋدىڭ استىنا الدى. بارىن كيىپ, بازارلاپ شىققان جاندار باستارىن الا قاشقان. جاستار بولسا «كوممۋنيزمدى تريبۋنالعا تارتۋ كەرەك» دەپ ۇراندادى. ىسكە كىرىسكەن پوليتسيا رۇقسات ەتىلگەن ميتينگىنى اتقىلاعانداردىڭ بىرنەشەۋىن ۇستاپ, بولىمشەلەرگە جەتكىزدى.
يادرولىق ەنەرگيا – تەك بەيبىت ماقساتقا
رەسەيگە يراننان اتوم سالاسىنداعى ىنتىماقتاستىق بويىنشا قۇپيا تۇردە دەلەگاتسيا كەلىپ, كەلىسسوزدەر جۇرگىزگەنى باق-قا بەلگىلى بولىپ قالدى. يراندىقتار رەسەيدەن 5 اتوم ەلەكتر ستانساسىن سالىپ بەرۋگە كومەك سۇراعان كورىنەدى.
بۇل جوبانىڭ قۇنى 40 ملرد. اقش دوللارىن قۇرايدى ەكەن. رەسەي وزدەرىندەگى مورالدىك تۇرعىدان ەسكىرگەن, قالدىق جابدىقتاردى ساتپاقشى. ولار چەرنوبىل اەس سالۋ كەزىندە قولدانىلعان جابدىقتار كورىنەدى. ال ماگاتە يران جەرىنەن اتومدىق قارۋدى سىنايتىن الاڭ تاپقانىن مالىمدەدى.
قىسقا قايىرىپ ايتقاندا:
گەرمانيادا ونەركاسىپ تاۋارلارىنىڭ ءونىمى قىركۇيەكتە تامىزعا قاراعاندا 2,7 پايىزعا تومەندەگەن. بۇل 2009 جىلدان كەيىن قايتالانىپ تۇرعان كەلەڭسىز ءجايت.
امەريكادا 68 جاسىندا اتى اڭىزعا اينالعان كاسىپقوي بوكسشى دجو فرەيزەر قايتىس بولدى. ول ءوزىنىڭ سپورتتىق كارەراسىندا مۇحاممەد ءالي مەن دج. فورمەننەن عانا جەڭىلگەن ەدى.
نيكاراگۋادا بولعان پرەزيدەنت سايلاۋىندا دانيەل ورتەگا ءۇشىنشى رەت جەڭىسكە جەتتى. وعان داۋىس بەرگەندەر ۇلەسى 62,6 پايىز بولىپتى.
اقش-تىڭ رەسپۋبليكاشىل پارتياسىنان سايلانعان كونگرەسسمەن رون پول ەلدىڭ يرانمەن بايلانىستى جاقسارتۋىن ۇسىندى. ءبىز ونىڭ يادرولىق ىستەرىنە قارسى شىقپاي, كەرىسىنشە ىنتىماقتاستىق جاساعانىمىز دۇرىس, دەدى كونگرەسسمەن.
ينتەرنەت ماتەريالدارى نەگىزىندە ازىرلەندى.
