كەڭەستىڭ مەرەيتويلىق سەسسياسىنا قازاقستان, بەلارۋس, ارمەنيا, قىرعىزستان, رەسەي, تاجىكستان پرەزيدەنتتەرى قاتىسۋدا. سامميتتە اتالعان مەملەكەتتەر باسشىلارى ۇيىم جۇمىسى, حالىقارالىق جانە ايماقتىق قاۋىپسىزدىكتىڭ ماڭىزدى ماسەلەلەرى تالقىلانادى. سەسسيا سوڭىندا مەرەيتويلىق دەكلاراتسيا قابىلدانىپ, ۇجىمدىق قاۋىپسىزدىك ستراتەگياسىن جۇزەگە اسىرۋ بويىنشا 2025 جىلعا دەيىنگى ناقتى شارالار جوسپارى جاسالادى دەپ كۇتىلۋدە.
ءبىر ايتا كەتەرلىگى, ۇجىمدىق قاۋىپسىزدىك شارتى ۇيىمى - حالىقارالىق جانە ايماقتىق قاۋىپسىزدىكتى ارتتىرۋ, تۇراقتىلىقتى قامتاماسىز ەتۋ ماقساتىندا 1992 جىلى 15 مامىردا قۇرىلعان حالىقارالىق ۇيىم. وعان مۇشە مەملەكەتتەر اراسىندا قازاقستاننان باسقا ارمەنيا, وزبەكستان, قىرعىزستان, تاجىكستان, رەسەي, بەلارۋس مەملەكەتتەرى بار. بۇل رەسپۋبليكالار اراسىندا مەملەكەتارالىق كەلىسىم - ۇجىمدىق قاۋىپسىزدىك تۋرالى شارت جۇمىس ىستەيدى. كەلىسىم بەس جىل سايىن ۇزارتىلىپ وتىرادى.
ۇجىمدىق قاۋىپسىزدىك تۋرالى شارتقا قاتىسۋشى مەملەكەتتەر مەملەكەتارالىق قاتىناستاردا كۇش قولدانباۋعا, اسكەري وداقتارعا نەمەسە قانداي دا بولماسىن باسقا توپتاستىقتارعا, سونىمەن قاتار قاتىسۋشى مەملەكەتتەردىڭ باسقالارعا باعىتتالعان ارەكەتتەرىنە قاتىسپاۋعا مىندەتتەمە العان. ءبىر نەمەسە بىرنەشە قاتىسۋشى مەملەكەتتىڭ اۋماقتىق تۇتاستىعىنا جانە تاۋەلسىزدىگى مەن قاۋىپسىزدىگىنە قاتەر تونگەن جاعدايدا, باسقالارى بىرلەسكەن كەڭەس ارقىلى جۇمىس ىستەيتىن بولادى.
ۇجىمدىق قاۋىپسىزدىك تۋرالى شارتقا قاتىسۋشى مەملەكەتتەردىڭ جوعارى ساياسي ورگانى — ۇجىمدىق قاۋىپسىزدىك كەڭەسى. ونىڭ قۇرامىنا ۇجىمدىق قاۋىپسىزدىك تۋرالى شارتقا قاتىسۋشى مەملەكەتتەر باسشىلارى, سىرتقى ىستەر مينيسترلەرى, قورعانىس مينيسترلەرى جانە ۇجىمدىق قاۋىپسىزدىك كەڭەسىنىڭ باس حاتشىسى كىرەدى.
ەستەرىڭىزگە سالا كەتسەك, كەشە ەلباسى نۇرسۇلتان نازارباەۆ رەسمي ساپارمەن بەلارۋس رەسپۋبليكاسىنىڭ استاناسى مينسك قالاسىنا باردى. جۇمىس ساپارى اياسىندا ول بەلارۋس پرەزيدەنتى الەكساندر لۋكاشەنكومەن كەزدەستى. ودان كەيىن نۇرسۇلتان نازارباەۆ بەلارۋس پرەزيدەنتىمەن كەڭەيتىلگەن قۇرامدا كەلىسسوز جۇرگىزدى. كەلىسسوزدەردەن كەيىن نۇرسۇلتان نازارباەۆ الەكساندر لۋكاشەنكومەن بۇقارالىق اقپارات قۇرالدارى وكىلدەرىنە بريفينگ وتكىزدى. ەلباسىنىڭ بەلارۋس مەملەكەتىنە رەسمي ساپارى اياسىندا مينسك قالاسىندا قازاقستان-بەلارۋس بيزنەس-فورۋمى ءوتىپ, ارنايى كورمە ۇيىمداستىرىلدى. سونىمەن قاتار بۇگىن مينسك قالاسىندا ەلباسى قىرعىزستاننىڭ جاڭا پرەزيدەنتى سوورونباي جەەنبەكوۆپەن كەزدەسىپ, شەكاراداعى جاعدايدى تالقىلادى. ال بۇگىن نۇرسۇلتان نازارباەۆ ۇجىمدىق قاۋىپسىزدىك تۋرالى شارت ۇيىمى ۇجىمدىق قاۋىپسىزدىك كەڭەسىنىڭ مەرەيتويلىق سەسسياسىنا قاتىسادى دەپ كۇتىلۋدە.
گۇلنۇر قۋانىشبەكقىزى,
"ەگەمەن قازاقستان"
مينسك (بەلارۋس)
