ەلىمىز بوداندىق ءداۋىرىن باسىنان وتكەردى. تاريحقا شەگىنىس جاساساق, ەكى عاسىرعا جۋىق ارالىقتا قازاق ەلى ءوز بايلىعىن ەل يگىلىگىنە جۇمساۋعا مۇمكىندىگى بولعان جوق. قازاق جەرىندە ەكونوميكالىق دامۋ وتارلىق باعىنىشتى سيپاتتا قالىپتاستى. قازاقستان باسقا دا مەتروپولياعا تاۋەلدى ايماقتار ءتارىزدى شيكىزات كوزى مەن ونى العاشقى وڭدەۋدەن وتكىزۋ ورتالىعى رەتىندە قىزمەت ەتتى. قازاق جەرىنىڭ شيكىزات كوزى رەتىندە باعالانۋى سول جىلدارى ۇلتتىق ينتەلليگەنتسيا وكىلدەرىنە ۇلكەن دابىل تۋعىزدى. بۇل جونىندە حح عاسىردىڭ باسىندا سماعۇل سادۋاقاسوۆ «قازاقستان وتار ەل, وتار بولىپ قالا بەرەدى», دەپ اشىنا جازعان بولاتىن.
اتا-بابامىز عاسىرلار بويى ارمانداعان ازاتتىققا قول جەتكىزىپ, ىرگەلى ەل بولعانىمىزعا شيرەك عاسىردان اسا ۋاقىت ءوتتى. تاريح ءۇشىن قاس-قاعىم ءسات بولعانىمەن, ەلىمىز ءۇشىن جەتىستىكتەردى ەڭسەرگەن مەرەيلى كەزەڭ بولدى.
سىندارلى ۋاقىتتا قازاق ەلىنىڭ بارلىق اۋىرتپالىعى مەن جاۋاپكەرشىلىگىن ءوز موينىنا العان نۇرسۇلتان ءابىش ۇلى نازارباەۆ تاۋەلسىزدىك جىلدارىندا ەل ابىرويىن الەم الدىنا اسقاقتاتتى.
قازاقستاننىڭ ۇلتتىق يدەياسىن قالىپتاستىرىپ, باسەكەگە قابىلەتتىلىك, دامۋدىڭ وزىق تۇجىرىمدامالارىن دۇنيەگە اكەلدى. بۇل تاريحي وقيعالاردىڭ باستى ەرەكشەلىگى – قوعام تۇراقتىلىعى, نارىقتىق ەكونوميكا, الەۋمەتتىك ادىلەتتىلىك جانە زاڭ ۇستەمدىگى نەگىزىندە ەل ەگەمەندىگىن نىعايتۋ بولدى.
قازاق ەلى تاۋەلسىزدىك جىلدارىندا قۋاتتى مەملەكەت رەتىندە قالىپتاسىپ, الەمنىڭ الدىڭعى قاتارلى ەلىنە اينالۋ جولىندا تالاي بەلەستەردى باعىندىردى, تامىرى تەرەڭدە جاتقان ءتول تاريحىمىزدىڭ جاڭا بەتتەرى اشىلدى. وسى ۋاقىت ىشىندە ەكونوميكالىق جانە الەۋمەتتىك ماڭىزى زور جوبالاردى قولعا الىپ, الەمدىك دەڭگەيدەگى ءىس-شارالاردىڭ وتۋىنە ۇيىتقى بولدى. ۇستىمىزدەگى جىلى وتكىزىلگەن ەكسپو-2017 كورمەسى دە ەلىمىز ءۇشىن دامۋدىڭ جاڭا قادامى ەدى. كورمە الەمدىك قاۋىمداستىقتا مەملەكەتىمىزدىڭ مىعىمدىعىن, ەلىمىزدىڭ ەڭسەلىلىگىن, ويىمىزدىڭ تەرەڭدىگىن, حالقىمىزدىڭ قوناقجايلىعىن, اينالىپ كەلگەندە, ۇلتتىڭ ۇلىلىعىن تانىتتى.
ەلىمىزدىڭ ءۇش مىڭىنشى جىلدىقتاعى رۋحاني جاڭعىرۋىنىڭ نەگىزى عىلىم مەن بىلىمدە, ياعني جاڭا مودەلدى رۋحانيات الەمىنە كوشۋ بولىپ تابىلادى. وسى ورايدا, رۋحاني جاڭعىرۋ ۇلتتىق يدەولوگيامىزدىڭ ساپالى دامۋىنا تىڭ سەرپىلىس بەردى. وسى باعىتتا اتقارىلىپ جاتقان ءىس-شارالاردىڭ بارلىعى قازاق حالقىن ۇلت رەتىندە جاڭا بەلەسكە كوتەرەتىن, ينتەللەكتۋالدى, ۇلتجاندى ۇرپاق قالىپتاستىرۋعا باعىتتالعان. ەل تاريحىنداعى جاسامپاز جىلدار جارقىن بولاشاققا تۇعىر بولدى.
قازىرگى قازاقستان – تىنىشتىق پەن تۇراقتىلىقتىڭ مەكەنى. ەلىمىز بىرلىكتىڭ بەسىگىنە, تاتۋلىقتىڭ تىرەگىنە اينالدى.
ءبىزدىڭ جەتكەن وسى جەتىستىكتەرىمىز جانە جەڭىستەرىمىز ەلباسىنىڭ اتىمەن تىكەلەي بايلانىستى ەكەنى انىق. بۇگىنگى تاڭداعى ەلىمىزدىڭ مارتەبەسىن ءوسىرىپ, مەرەيىمىزدى اسىرعان حالقىمىزدىڭ بەيبىت ءومىرى مەن باقىتتى بولاشاعى ءۇشىن قالتقىسىز قىزمەت ەتكەن ەلباسى – ن.ءا.نازارباەۆ.
مەنى ەلباسى ن.ءا.نازارباەۆتىڭ «مەن اۋىزبىرشىلىكتەن اينىمايتىن اقجۇرەك جۇرتىمنىڭ قۋاتتى ۇلتقا, شۋاقتى ۇلىسقا اينالارىنا كامىل سەنەمىن», دەگەن سوزى تولعاندىردى. ءيا, بارلىعىمىز وسى ماقساتقا جەتۋدە جۇمىلا قىزمەت ەتەيىك!
زاۋرە ابديراسيلوۆا,
تاريح عىلىمدارىنىڭ
كانديداتى, قازاق ۇلتتىق حورەوگرافيا اكادەمياسى الەۋمەتتىك-گۋمانيتارلىق عىلىمدار جانە
ارت-مەنەدجمەنت كافەدراسىنىڭ دوتسەنتى
