كەلىسسوز بارىسىندا نۇرسۇلتان نازارباەۆ ەكى مەملەكەت اراسىنداعى قارىم-قاتىناستاردىڭ تاۋەلسىزدىك جىلدارى ستراتەگيالىق جەتىستىكتەرگە جەتكەنىن اتاپ ءوتتى. «بەلارۋس تاراپىنان ەكى مەملەكەتتىڭ ساۋدا اينالىمى مەن سەرىكتەستىگىن جوعارى دەڭگەيگە جەتكىزۋ ءۇشىن كوپ جۇمىس اتقارىلدى. ءبىز سەرىكتەستىكتىڭ ەڭ جوعارى دەڭگەيىنە جەتتىك. مەملەكەتتەرىمىزدىڭ اراسىندا ەشقانداي ساياسي, ەكونوميكالىق نەمەسە باسقا دا ماسەلەلەر جوق. بۇل بىرگە تىعىز جۇمىس ىستەۋگە زور مۇمكىندىك دەپ ويلايمىن», دەدى قازاقستان پرەزيدەنتى.
نۇرسۇلتان نازارباەۆ قازاقستاندا 6 اۆتوكولىك قۇراستىرۋ زاۋىتىنىڭ جۇمىس ىستەيتىنىن اتاپ ءوتتى. «بۇگىن ءبىز وسى كۇنگە دەيىن ورناعان سەرىكتەستىگىمىزدى ودان ءارى دامىتۋ ماسەلەلەرىن تالقىلاپ, ىنتىماقتاستىق دەڭگەيىن ارتتىرۋ تۋرالى ايتاتىن بولامىز. ال بيزنەس-فورۋم اياسىندا قول قويىلاتىن كەلىسىمشارتتار سوعان سەپتىگىن تيگىزەدى دەپ ويلايمىن», دەدى ەلباسى. سونىمەن قاتار نۇرسۇلتان نازارباەۆ بەلارۋس تاراپىنىڭ بيداي جيناۋعا ارنالعان تەحنيكالاردى بىرلەسىپ قۇراستىرۋ تۋرالى ۇسىنىسىن قولدايتىنىن ايتتى.
كەلىسسوز بارىسىندا الەكساندر لۋكاشەنكو الەۋمەتتىك-ەكونوميكالىق سەرىكتەستىكتىڭ 2026 جىلعا دەيىنگى باعدارلاماسى ەكى مەملەكەتتىڭ ىنتىماقتاستىعىن ارتتىرا تۇسەتىنىنە سەنىم ءبىلدىردى. سونىمەن قاتار ول بەلارۋس ەلىندە 500-دەن استام قازاقستاندىق ءبىلىم الىپ جاتقانىن ايتتى. ء«بىز مادەنيەت, ءبىلىم, عىلىم سالاسىندا دا ەكىجاقتى سەرىكتەستىكتى ارتتىرۋعا دايىنبىز», دەدى الەكساندر لۋكاشەنكو. ونىڭ ايتۋىنشا, قازاقستان بەلارۋس مەملەكەتىنىڭ ترانزيت بويىنشا دا ماڭىزدى سەرىكتەسى بولىپ قالا بەرەدى. «ەكى مەملەكەت اراسىندا ىنتىماقتاستىق بۇل سالالارمەن شەكتەلمەيدى. مىسالى, قازاقستانداعى العاشقى باۋىر ترانسپلانتاتسياسى وپەراتسياسىنا بەلارۋس ماماندارى قاتىستى», دەدى الەكساندر لۋكاشەنكو. ونىڭ ايتۋىنشا, ەكى مەملەكەت اراسىنداعى قازىرگى ىنتىماقتاستىق دەڭگەيىن ارتتىرىپ, ونى ۇرپاقتان-ۇرپاققا جەتكىزە بەرۋ كەرەك.
كەلىسسوزدەر بارىسىندا الەكساندر لۋكاشەنكو مادەنيەت كۇندەرىن ءجيى وتكىزىپ تۇرۋعا شاقىردى. «بۇل قازاقستان مەن بەلارۋس حالقىنا ءبىر-ءبىرىنىڭ تاريحىن, مادەنيەتىن, سالت-ءداستۇرىن جاقىنىراق تانۋعا مۇمكىندىك بەرەدى», دەدى ول.
كەزدەسۋگە قازاقستان تاراپىنان سىرتقى ىستەر ءمينيسترى قايرات ءابدىراحمانوۆ, ءبىرىنشى ۆيتسە-پرەمەر اسقار مامين, قازاقستان پرەزيدەنتىنىڭ كومەكشىسى نۇرلان ونجانوۆ, مادەنيەت جانە سپورت ءمينيسترى ارىستانبەك مۇحامەدي ۇلى, اقپارات جانە كوممۋنيكاتسيالار ءمينيسترى داۋرەن اباەۆ, ينۆەستيتسيالار جانە دامۋ ءمينيسترى جەڭىس قاسىمبەك, قورعانىس جانە اەروعارىش ءوندىرىسى ءمينيسترى بەيبىت اتامقۇلوۆ, قازاقستاننىڭ بەلارۋس رەسپۋبليكاسىنداعى ەلشىسى ەرمۇحامەت ەرتىسباەۆ, «قازاقستان تەمىر جولى» باسشىسى قانات الپىسباەۆ, پرەزيدەنت اكىمشىلىگىنىڭ سىرتقى ساياسات ورتالىعى باسشىسى ءادىل تۇرسىنوۆ قاتىستى.
كەڭەيتىلگەن كەلىسسوزدەر اياسىندا قازاقستان پرەزيدەنتى نۇرسۇلتان نازارباەۆ پەن بەلارۋس پرەزيدەنتى الەكساندر لۋكاشەنكو ەكى ەل اراسىنداعى الەۋمەتتىك-ەكونوميكالىق ىنتىماقتاستىق تۋرالى شارت پەن 2026 جىلعا دەيىنگى ىنتىماقتاستىق باعدارلاماسىنا, قر سىرتقى ىستەر ءمينيسترى ق.ءابدىراحمانوۆ پەن بر سىرتقى ىستەر ءمينيسترى ۆ.ماكەي قر مەن قر سىرتقى ىستەر مينيسترلىكتەرى اراسىنداعى 2018-2019 جىلدارعا ارنالعان ىنتىماقتاستىق جوسپارىنا, قر اقپارات جانە كوممۋنيكاتسيالار ءمينيسترى د.اباەۆ پەن بر اقپارات ءمينيسترى ا.كارليۋكەۆيچ قر ۇكىمەتى مەن بر ۇكىمەتتەرى اراسىنداعى بۇقارالىق اقپارات قۇرالدارى سالاسىنداعى ىنتىماقتاستىق تۋراللى كەلىسىمگە, قر قورعانىس جانە اەروعارىش ونەركاسىبى ءمينيسترى ب.اتامقۇلوۆ پەن بر مەملەكەتتىك اسكەري-ونەركاسىپتىك كوميتەتى توراعاسى و.دۆيگالەۆ قر ۇكىمەتى مەن بر ۇكىمەتى اراسىنداعى ونەركاسىپتىڭ قورعانىس سالاسىنداعى ۇيىمدارىنىڭ وندىرىستىك جانە عىلىمي-تەحنيكالىق كووپەراتسيالارى تۋرالى كەلىسىمگە, قر مادەنيەت جانە سپورت ءمينيسترى ا.مۇحامەدي ۇلى مەن بر سپورت جانە تۋريزم ءمينيسترى ا.شامكو قر مادەنيەت جانە سپورت مينيسترلىگى مەن بر سپورت جانە تۋريزم مينيسترلىگى اراسىنداعى 2018-2019 جىلدارعا ارنالعان دەنە تاربيەسى جانە سپورت سالاسىنداعى ىنتىماقتاستىق باعدارلاماسىنا, قر مادەنيەت جانە سپورت ءمينيسترى ا.مۇحامەدي ۇلى مەن بر مادەنيەت ءمينيسترى يۋ.بوندار قر مادەنيەت جانە سپورت مينيسترلىگى مەن بر مادەنيەت مينيسترلىگى اراسىنداعى مادەني ىنتىماقتاستىق بويىنشا ءوزارا تۇسىنىستىك تۋرالى مەموراندۋمعا, قر ۇعا پرەزيدەنىت م.جۇرىنوۆ پەن بر ۇعا تورالقاسىنىڭ توراعاسى ۆ.گۋساكوۆ قر ۇلتتىق عىلىم اكادەمياسى مەن بر ۇلتتىق عىلىم اكادەمياسى اراسىندا عىلىمي-تەحنيكالىق ىنتىماقتاستىق تۋرالى كەلىسىمشارتقا قول قويدى
گۇلنۇر قۋانىشبەكقىزى,
«ەگەمەن قازاقستان»
مينسك
