فرەددي روۋچتى بوكسسۇيەر قاۋىم وتە جاقسى تانيدى. ونى كوپشىلىككە تانىستىرىپ جاتۋدىڭ ءوزى ارتىق. دەگەنمەن, اتاقتى باپكەر كىمدەردى جاتتىقتىرعانىنا ءبىر كوز جۇگىرتىپ كورسەك. ءتىزىم ايگىلى مايك تايسوننان باستالادى. بۇل تىزىمدە سونداي-اق, ءتۇرلى سالماقتارداعى الەم چەمپيوندارى: مەنني پاكياو, ميگەل كوتتو, ۆلاديمير كليچكو, بەرنارد حوپكينس, امير حان, گيلەرمو ريگوندو, دجەيمس توني, دەنيەل دجەيكوبس, جان پاسكال, وسكار دە لا حويا, كىشى حۋليو سەزار چاۆەستەر بار.
ول سونداي-اق, 7 رەت «جىل باپكەرى» دەگەن اتاققا يە بولعان.
مەيىرجان پىرتاەۆ جاستار اراسىندا قازاقستان چەمپيونى جانە رەسپۋبليكالىق سپارتاكيادانىڭ جەڭىمپازى. ول ەرەسەكتەر اراسىندا دا كوپتەگەن حالىقارالىق تۋرنيرلەردىڭ جەڭىپ العان. ۇلتتىق قۇرامانىڭ ساپىندا ءىرى جارىستاردا ەل نامىسىن ابىرويمەن قورعادى.
مەيىرجاننىڭ ايتۋىنشا, ونى كاسىپقوي بوكسقا وسىمەن ەكىنشى رەت شاقىرىپتى. ەكەۋىندە دە امەريكا قۇراما شتاتتارىنا. ەكىنشى شاقىرتۋدان باس تارتا المادىم دەيدى ول.
«ەڭ العاش رەت قازاقستاندىق كاسىپقوي بوكسشى نۇرحان سۇلەيمان اعامىزدىڭ كوزىنە ءتۇستىم. اقش-تا كاسىپقوي بوكسپەن شۇعىلدانعان نۇرحان اعامىز شىمكەنتتە وتكەن جارىستاردىڭ بىرىنە قوناق بولىپ كەلىپ, مەنىڭ جەكپە-جەگىمدى تاماشالاعان بولاتىن. ول كەزدە جاستار اراسىندا جۇرگەن كەزىم. «كاسىپقوي بوكسقا اۋىسۋىڭ كەرەك, مەنىمەن امەريكاعا ءجۇر, جۇلدىز بولاسىڭ» دەدى. تىم جاس بولعاندىقتان وزدىگىممەن شەشىم قابىلداي المادىم, اتا-اناممەن اقىلداستىم. ول كىسىلەر الىس ەلگە جىبەرگىسى كەلگەن جوق, سودان قالىپ قويدىم», - دەيدى م.پىرتاەۆ.
تالانتتى بوكسشى ايگىلى فرەددي روۋچتىڭ كوزىنە قالاي تۇسكەنىن دە ايتىپ بەردى.
«شىنىن ايتۋ كەرەك, جاسىم وتىزعا جاقىنداپ قالدى, ۇلتتىق قۇراماعا ىلىنگەنىممەن الەم چەمپيوناتتارىنا, وليمپياداعا بارا المادىم. كەزىندە كاسىپقوي بوكسقا كەتپەگەنىم ءۇشىن دە وكىنىپ جۇرگەنمىن. وسى ساتتە اقش-تا كاسىپقوي بوكسپەن اينالىسىپ جۇرگەن دوستارىم حابارلاسىپ, جەدەل كەلۋىمدى سۇرادى. ويلانىپ-تولعانعان جوقپىن, سومكەمدى جيناپ كەتىپ قالدىم. جاتتىعۋ زالىنا الىپ باردى, بىرنەشە باپكەرگە كورسەتتى, سپاررينگ وتكىزدىك. سول ساتتە جەكپە-جەكتەرىمدى فرەددي روۋچ تا سىرتتاي تاماشالاعان ەكەن. دەرەۋ شاقىرتىپ الىپ, ءجونىمدى سۇرادى. جاقىنىراق تانىسقاننان كەيىن كەلىسىمشارتىن ۇسىندى. قازىر وسى كەلىسىمشارتتى تالقىلاپ جاتىرمىز», - دەدى ول.
ايتا كەتەيىك, فرەددي روۋچ بۇعان دەيىن بىردە-ءبىر قازاق بوكسشىسىمەن جۇمىس ىستەسپەگەن.
س.اباي ۇلى
