يرانعا قوي ەتىنىڭ كەزەكتى پارتياسىن اتتاندىرىپ جاتقان ورالدىڭ «كۇبىلەي» جشس-عا ارنايى كەلگەن ۇلبوسىن سارىباەۆا ەكسپورتقا كەتەتىن قوي ەتىنىڭ حالىقارالىق ستاندارتتارعا ساي دايىندالۋىن, يراندىقتار تالاپ ەتەتىن حالال تەحنولوگياسىنىڭ ساقتالۋىن ءوز كوزىمەن كوردى.
ەكى ەل اراسىنداعى كەلىسىم شارتتاردىڭ ناتيجەسىندە ورتاق دارىگەرلىك تالاپتار بەكىتىلىپ, يران قازاقستاننان ءتىرى قوي دا الدىرا باستاپتى. ماسەلەن قىزىلوردا وبلىسىنان 812 باس قوي تىرىلەي جونەلتىلگەن. جىل سوڭىنا دەيىن 10 مىڭ قوي الىنادى دەيدى دەپارتامەنت ديرەكتورى. ال باتىس قازاقستان وبلىسىنىڭ «باتىس مارقا لامب» جانە «كۇبىلەي» كاسىپورىندارى قوي ەتىن سويىپ, بولشەكتەپ, توڭازىتىپ, مۇزداتىپ, ادەمى وراما جاشىكتەرگە سالىپ بەرەدى.
«كۇبىلەي» جشس-نىڭ تەحنيكالىق ديرەكتورى راحيم ناعمەتوۆتىڭ ايتۋىنشا, كاسىپورىندا مالدى مۇسىلمانشا ادالداپ سويۋعا بارلىق جاعداي جاسالعان. مال باۋىزدايتىن جەردە ارنايى سەرتيفيكاتى بار ءۇش قاساپشى جۇمىس ىستەيدى. ونىڭ ۇستىنە يراندىق مال دارىگەرى مەن ءدىن قىزمەتكەرى دە يمپورتتالاتىن ەتتى دايىنداۋدىڭ بارلىق كەزەڭىن قاداعالاپ وتىرادى. مىنە, «كۇبىلەيدە» سويىلعان قازاقى قويلار پارتياسى وسىمەن ءتورتىنشى مارتە «قىزىلباستار ەلىنە» جول تارتقالى وتىر.
ءبىز دە اتالعان كاسىپورىندا بولىپ, يرانعا جونەلتۋگە دايىندالىپ جاتقان قوي ەتىنىڭ دايىندالۋ بارىسىن تۇگەل ارالاپ كورىپ شىقتىق. جۇزدەن استام ادام قىزمەت ەتەتىن ۇلكەن كاسىپورىن تۇگەلدەي اۆتوماتتاندىرىلعان. مال باۋىزدايتىن جەردە عانا قازاقى قوي سويۋدىڭ ءداستۇرلى ۇلگىسى قالعانىمەن, ودان كەيىنگى جۇمىستىڭ ءبارىن اۆتوماتتى جۇيە الدەقايدا جەڭىلدەتىپ جىبەرگەن. قويدىڭ تەرىسىن سىپىرۋ, ىشەك-قارنىن ارشۋ, تازالاۋ – ءبارى اقىرىن جىلجىپ بارا جاتقان جۇيە بويىندا كەزەگىمەن اتقارىلا بەرەدى. وسى جۇيە بويىندا تەرىسى سىپىرىلىپ, ىشەك-قارنى الىنعان قوي ەتى جىلجۋىمەن بارىپ توڭازىتقىشقا كىرىپ كەتەدى. كاسىپورىننىڭ تەحنيكالىق ديرەكتورى راحيم ناعمەتوۆتىڭ ايتۋىنشا, مۇندا توڭازىتۋدىڭ 8 ءتۇرلى ءتاسىلى بار ەكەن. ارقايسىسىنىڭ ءوز ەرەكشەلىگى, ۇتىمدى جاقتارى بار. توڭازىتقىشتا بىرنەشە كۇن تۇرىپ, ءبىر قالىپقا تۇسكەن قوي ەتى بولشەكتەۋ تسەحىنا جول تارتادى. بۇل جەردە قوي ەتى مۇشەلەنىپ, بولشەكتەنىپ, بەزى مەن شەلىنەن تازارتىلادى ەكەن. «يراندىقتار ەت اراسىنداعى بەزدى حارام سانايدى, سوندىقتان مويىنداعى سوم ەت اراسىنداعى بەز بەن شەلدى سىلىپ تاستايمىز» دەيدى قولى قولىنا جۇقپاي ەت بولشەكتەپ جاتقان زاۋىت قىزمەتكەرلەرى.
كاسىپورىن تەحنولوگى, بولشەكتەۋ تسەحىنىڭ جەتەكشىسى دينارا ادىلگەرەەۆا كاسىپورىننىڭ قالدىقسىز تەحنولوگياعا كوشكەنىن ايتادى. سويىلعان مالدىڭ ىشەك-قارنىن قالبىرلاۋ تسەحىنا جىبەرىلەدى. قوي ەتىنەن قۋىرداق تا جاسالادى. ال الداعى جەلتوقسان ايىندا كاسىپورىندا جاڭا جۇيە – مال سۇيەگىن ۋاتىپ, قۇراما جەم دايىندايتىن جاڭا تسەح ىسكە قوسىلماق.
ايتپاقشى, وسى كۇندەرى ەلىمىزدىڭ اۋىل شارۋاشىلىق ۆيتسە-ءمينيسترى ا.مىرزاحمەتوۆ جۇمىس ساپارىمەن يران يسلام رەسپۋبليكاسىندا ءجۇر ەكەن. يراننىڭ اۋىل شارۋاشىلىق جيھاد ءمينيسترى م.حودجاتيمەن اراداعى كەزدەسۋدە پارسى ەلى نارىعىندا قازاقستاندىق اۋىل شارۋاشىلىعى ونىمدەرىنىڭ ۇلەسىن ودان ءارى كوبەيتۋ ءسوز بولماق.
قازبەك قۇتتىمۇرات ۇلى
«ەگەمەن قازاقستان»
سۋرەتتى تۇسىرگەن ايباتىر نۇراش
ورال
