1996 جىلى قازاقستان چەمپيونى بولعان «تاراز» وتكەن جىلى دا تىعىرىققا تىرەلگەن ەدى. جاعداي ايتەۋىر «التاي» كومانداسىنىڭ قۇجاتتارى جارامسىز بولىپ, ورنىنا پرەمەر-ليگاعا «تاراز» جول تارتتى. وسى حاباردى اقپان ايىندا ەستي سالا اپىل-عۇپىل شارۋاعا كىرىسكەن جامبىلدىقتار ۆويت تالعاەۆتىڭ بىلىكتىلىگىنە سەنىم ارتتى. تاجىريبەلى باپكەر 10 كۇننىڭ ىشىندە كوماندانى جاساقتادى. پرەمەر-ليگادا ويناي الاتىن جاستاردى تارتىپ, تۇركياداعى وقۋ-جاتتىعۋ جيىنىندا شۇعىل تۇردە لەگيونەرلەر شاقىرتتى. كوماندانى, امال جوق, وزگە كلۋبتاردان ىرىكتەۋىنەن وتپەگەن اياقدوپشىلاردان سۇرىپتادى. مىنە, وسىلايشا كوماندا جوعارعى توپقا «توپ» ەتە ءتۇستى.
چەمپيونات ورتاسىندا ءتىپتى العاشقى التىلىققا ەنگەن كەزى دە بولدى. كەيىننەن 7 مەن 8-ءشى ورىندارعا تۇراقتادى. دەي تۇرعانمەن كەيىنىرەك تالعاەۆتىڭ كومانداسىنا كوز ءتيدى. ءوز الاڭىنداعى ويىنداردىڭ وزىندە جەڭىلە بەرىپ, قاتارىنان ساتسىزدىكتەر سەرياسىنا ۇشىرادى. جىعىلعانعا جۇدىرىق بولىپ ۋەفا «تاراز» كومانداسىنان 6 ۇپايدى الىپ تاستادى. وعان كىنالى نيگەريالىق شابۋىلشى وديتا وبيورا. حالىقارالىق ۇيىمعا حات جازىپ, ايلىعىمدى بەرمەدى دەپ ارىز تۇسىرگەن. انىقتالسا راسىمەن دە وديتانىڭ 2015 جىلعا دەيىن كەلىسىمشارتى بولىپتى. الايدا ونى باپكەرلەر 2014 جىلدىڭ سوڭىندا «كومانداعا كەرەگىڭ شامالى» دەپ جىلى شىعارىپ سالعان. اراعا ەكى جىل سالىپ وبيورا قازاقستان كاسىپقوي ليگاسىنا شاعىم تۇسىرگەن. كوماندادان كەتكەن كەزدە تولەنەتىن وتەماقىنى سۇراعان. «تاراز» فۋتبول كلۋبىنىڭ پرەزيدەنتى ماحامبەت دۇيسەمبيەۆ ەشقانداي تالاسسىز فۋتبولشىنىڭ سۇراعان قارجىسىن تولەپ بەرگەن.
– كلۋبتى ماعان دەيىن باسقارعان تالعات اپسەمەتوۆ فۋتبولشىنىڭ قانداي دەڭگەيدە ەكەنىن بايقاماستان 3 جىلعا كەلىسىمشارت جاساسقان. لەگيونەر العاشقى جىلى ونەر كورسەتكەننەن كەيىن, سپورتتىق بابىن جوعالتقان. جاڭادان كەلگەن باپكەر وبيورانىڭ بولاشاعىنا سەنىم ارتپاعان سوڭ, كوماندادان كەتۋگە ءماجبۇر بولعان نيگەريالىق فۋتبولشى ەۋروپاداعى وزگە كومانداعا اۋىسادى. كەيىننەن كەلىسىمشارتىن اقتارىپ ءجۇرىپ وتەماقىسىن داۋلاي باستاعان. سونىڭ سالدارىنان قازىر «تاراز» فۋتبول كلۋبى زارداپ شەگىپ وتىر. سول 6 ۇپاي قازىر ءبىزدىڭ پايدامىزعا جازىلسا, ءبىز پرەمەر-ليگاداعى ورنىمىزدى ساقتاپ قالار ەدىك, – دەيدى كلۋب باسشىسى ماحامبەت دۇيسەمبيەۆ.
ەستەرىڭىزدە بولسا, تۋرا وسىنداي جاعدايعا تاپ بولعان «اتىراۋ» فۋتبول كلۋبى چەمپيونات باستالار تۇستا 6 ۇپايىنان ايىرىلعان ەدى. مۇنداي وقيعالاردان كەيىن قازاقستاندىق فۋتبول كلۋبتارىنان الاشاعى بار وزگە دە لەگيونەرلەر ۋەفا-عا حات جازىپ, داۋ تۋدىرىپ جۇرمەسە بولار ەدى دەيسىڭ.
بيىلعى جىلى «تاراز» ويىنشىلارىنا 600 ملن تەڭگە كولەمىندە جالاقى تولەنسە, كەلەر جىلى وسى سوما ەكى ەسەگە قىسقاراتىن ءتۇرى بار. ءبىرىنشى ليگادا ونەر كورسەتەتىن كومانداعا تەك 3 لەگيونەر الۋعا رۇقسات بەرىلدى. دەمەك ۇجىمنىڭ نەگىزىن جەرگىلىكتى جاستار قۇرايدى دەگەن ءسوز. جاستار دەمەكشى, بيىل ەرەكشە كوزگە تۇسكەن تارازدىق ەركەبۇلان سەيداحمەت سانكت-پەتەربۋرگتەن «زەنيت» كومانداسىنا اۋىسۋعا دايىن وتىر. ال قازاقستان جاستار قۇراماسىنىڭ ساپىندا جارقىراي كورىنگەن باحتيار ءزاينۋتدينوۆتى دە «استانا» فۋتبول كلۋبى ساتىپ الماقشى.
– زاينۋتدينوۆ «تاراز» فۋتبول اكادەمياسىنىڭ تۇلەگى. جامبىل جەرىنەن جىل سايىن وسىنداي ءبىر فۋتبولشى جارقىراپ شىعىپ جاتادى. ۇلتتىق قۇرامالار دەڭگەيىنە كوتەرىلگەن جاس تالانتقا وسى كۇنى ەلىمىزدىڭ 4 دۇركىن چەمپيونى, «استانا» كومانداسى قۇدا ءتۇسىپ وتىر. ءوزىمىز تاربيەلەگەن فۋتبولشىنىڭ ترانسفەرلىك قۇنى شامامەن 20 ميلليون تەڭگە. ەگەر ەلوردالىق ۇجىم كەلىسسە, فۋتبولشىنىڭ ودان ءارى دامىپ, جوعارعى دەڭگەيگە كوتەرىلۋىنە قارسى ەمەسپىز, – دەيدى ماحامبەت دۇيسەمباەۆ.
ال ەندى جامبىلدىق كوماندا كەلەسى ماۋسىمعا ماقسات قويىپ, پرەمەر-ليگاعا قايتا ورالۋدى كوزدەيدى. قازىرگى باپكەر ۆويت تالعاەۆقا تاعى دا ۇسىنىس ايتىلدى. بىلىكتى باپكەر كوماندانى جاتتىقتىرۋعا قارسى ەمەس سەكىلدى.
ەرمۇحامەد ماۋلەن,
«ەگەمەن قازاقستان».
