سول التىن تۇعىرىمىزدى جاس ۇرپاقتىڭ ساناسىنا ءسىڭىرىپ, ويىنا ۇيالاتۋ ماقساتىندا ەلباسىنىڭ رۋحاني جاڭعىرۋ ماقالاسىنداعى يدەياسىنىڭ ىرگەسىن بەكىتۋ ىسىندە, تۇڭعىش پرەزيدەنت كۇنىنە وراي «مەملەكەتتىك رامىزدەر جانە ەلدىك مۇراتتار» دەگەن تاقىرىپتا ەۋرازيا ۇلتتىق ۋنيۆەرسيتەتىندە دوڭگەلەك ۇستەل ءوتتى. وندا ەل رامىزدەرى مەن ءرامىز تانۋشى تۋرالى جان-جاقتى اڭگىمە بولدى. مۇنداي يگىلىكتى ىسكە ۇيىتقى بولعان ىرگەلى وقۋ ورنىنىڭ پراكتيكالىق قازاق ءتىلى كافەدراسى ەكەنىن ايتا كەتەلىك.
دوڭگەلەك ۇستەلگە جينالعان ۇستازدار مەن وقۋشىلارعا مەملەكەتتىك ەلتاڭبامىزدىڭ اۆتورى, كورنەكتى ساۋلەتشى جانداربەك مالىبەكوۆ رامىزدەرىمىز تۋرالى وي قوزعاپ, بۇل ەلدىك ىسكە ەلباسى نۇرسۇلتان نازارباەۆتىڭ ەرەكشە ەڭبەگى سىڭگەنىن اتاپ ايتتى. «ماسەلەن, ءبىر عانا دەتالدى ايتار بولسام, كەيبىر حالىق قالاۋلىلارى ەلتاڭبانىڭ جوعارى جاعىندا تۇرعان جۇلدىزعا كۇدىكپەن قاراعاندا, پرەزيدەنت ۇلتىمىزدىڭ جۇلدىزىڭ جانسىن, جۇلدىزىڭ جوعارى بولسىن دەگەن سوزدەرىن دايەككە كەلتىردى. مۇيىزدەگى جەتى ساقيناعا دا ەرەكشە ءمان بەرگەنى ەستە. ال تۋعا كەلگەندە اركەز ءبىر ءتۇستى بولسا دەگەندى تىلگە تيەك ەتىپ ءجۇردى.
بۇگىنگى كوك تۋىمىز جەلبىرەگەندە ونى قۇپ الىپ, ۇلتتىق ورنامەنتتى ۇسىنعانى حالىقتىڭ ەسىندە. بۇل جۇمىستا ۇلت زيالىلارى س.زيمانوۆ, س.سارتاەۆ, ءا.كەكىلباەۆ, وزگە دە ازاماتتار از ەڭبەك ەتكەن جوق», دەدى. ول سونداي-اق قازاقتىڭ ارداقتى ازاماتى اقسەلەۋ سەيدىمبەكتىڭ «ۇلتتىق رامىزدەردى عىلىمي نەگىزدەگەن ەربول شايمەردەن ۇلى», دەگەن پىكىرىن ورتاعا سالىپ, ەل رامىزدەرىن العاشقى كەزدە ءوز جۇرتىمىزعا جەتكىزۋدە, كەيىن الەمدىك دەڭگەيدە تارالۋىنا ەربولدىڭ سىڭىرگەن ەڭبەگىنە دايەكتەر كەلتىردى.
ءار جىل سايىن رامىزدەر كۇنى اتالىپ وتەتىن تۇستا العاشقى ءرامىزتانۋشى ەربول شايمەردەن ۇلى وقۋلارىن وتكىزۋدى ۇسىنىپ, وعان ءوزى قولداۋ كورسەتەتىنىن, ءتىپتى باتاسىن بەرۋگە ءازىر ەكەنىن جەتكىزدى. ول سونىمەن قاتار وسى دوڭگەلەك ۇستەل سونىڭ العاشقى باستاۋى دەگەن ويىن دا ورتاعا سالدى.
بەلگىلى جازۋشى قۋانىش جيەنباي رامىزدەر تۋرالى وي قوزعاي كەلىپ, ەربول شايمەردەن ۇلىنىڭ ءۇش تىلدە شىققان قازاق رامىزدەرى تۋرالى كىتاپتارى شەت مەملەكەتتەردەگى قازاقستان ەلشىلىكتەرىنەن ورىن العانىن, وزگە جۇرتتىڭ ادامدارى سول كىتاپتاردان ۇلتتىق رامىزدەرىمىزدى تانىپ-ءبىلىپ جاتقانىنا مىسالدار كەلتىردى.
ۇستازدار مەن ستۋدەنتتەر ەلتاڭبا اۆتورىنا الۋان ءتۇرلى سۇراقتار قويىپ, تۇشىمدى جاۋاپتار الدى. ستۋدەنت ديارا دۇيسەبەك ء«بىز رامىزدەرىمىزدىڭ اۆتورىن كەيدە بىلە الماي جاتاتىنىمىز بار. ولاردى تانىتۋ جايىن دا قولعا الۋ كەرەك سەكىلدى. ءرامىز اۆتورلارى تۋرالى دەرەكتى فيلمدەر ءتۇسىرىپ, اركەز كورسەتىپ وتىرسا», دەگەن تىلەگىن جەتكىزىپ, قازىر تۋ اۆتورىنىڭ ومىردە جوق ەكەنىن, ەندىگى جەردە ورتامىزدا وتىرعان جانداربەك مالىبەكوۆ جايلى بەينەتاسپالاردى شىعارساق ۇتىلماس ەدىك دەگەن پىكىرىن دە تالقىعا ۇسىندى.
دوڭگەلەك ۇستەلگە جينالعاندار رامىزدەرىمىز – رۋحىمىز, ار-وجدانىمىز دەگەن بايلام جاسالدى.
سۇلەيمەن مامەت,
«ەگەمەن قازاقستان»
