ەسكە سالار بولساق, بيىل قاۋىپسىزدىك پەن تۇراقتىلىقتى قامتاماسىز ەتەتىن نەگىزگى ايماقتىق قۇرىلىمداردىڭ ءبىرى ۇقشۇ-نىڭ قۇرىلعانىنا 15 جىل تولدى. وسى ارالىقتا ۇقشۇ-عا مۇشە مەملەكەتتەر – قازاقستان, ارمەنيا, بەلارۋس, قىرعىزستان, رەسەي جانە تاجىكستان اراسىنداعى قاتىناستار وسى اسكەري-ساياسي بىرلەستىك اياسىندا جان-جاقتى ستراتەگيالىق ارىپتەستىك جانە سەنىم رۋحىندا دامىدى. بۇعان ۇيىم قىزمەتى شەڭبەرىندە وتەتىن تۇراقتى كەزدەسۋلەردەن دە كوز جەتكىزۋگە بولادى.
قازاقستاننىڭ ۇقشۇ-نىڭ مۇشەسى رەتىندەگى ءرولى اسا ماڭىزدى. بۇل ورايدا مەملەكەت باسشىسىنىڭ ۇجىمدىق جەدەل ارەكەت ەتۋ كۇشتەرىن (ۇجاك) قۇرۋ تۋرالى 2009 جىلعى باستاماسىن دا قاپەردەن شىعارماعان ءجون. ۇقشۇ-نىڭ ماڭىزدى كۇشتىك قۇرىلىمى – ۇجاك قاۋىپسىزدىكتى قامتاماسىز ەتۋ جانە تەرروريزمگە, ءدىني ەكسترەميزمگە, ەسىرتكى تاسىمالىنا قارسى كۇرەستى كۇشەيتۋگە, سونداي-اق توتەنشە جاعدايلاردىڭ الدىن الۋ مەن جويۋعا باعىتتالعان. قازىرگى تاڭدا قۇرىلىم 25 000 قىزمەتكەردەن تۇرادى. وتكەن جىلى قازاقستان باستاماسىمەن ۇقشۇ-نىڭ ۇجىمدىق اۋە كۇشتەرى قۇرىلدى.
سونىمەن بىرگە ىنتىماقتاستىقتىڭ بارلىق سالالارى بويىنشا ۇيىم جۇمىسىنىڭ باسىمدىقتارى مەن دامۋ باعىتتارىن بەلگىلەگەن ۇقشۇ-نىڭ 2025 جىلعا دەيىنگى ۇجىمدىق قاۋىپسىزدىك ستراتەگياسىنىڭ 2016 جىلى بەكىتىلۋى دە ماڭىزدى بولىپ سانالادى. بۇل رەتتە ۇقشۇ-نىڭ ۇجىمدىق قاۋىپسىزدىك كەڭەسىنىڭ (ۇقك) ءونىمدى جۇمىسى تۋرالى دا ايتا كەتۋ كەرەك. ۇيىمنىڭ جوعارعى ورگانىنىڭ 2016 جىلدىڭ قازان ايىندا ەرەۆان قالاسىندا وتكەن سەسسياسىنىڭ نەگىزگى ناتيجەلەرىنىڭ ءبىرى حالىقارالىق تەرروريزمگە قارسى ارەكەت ەتۋ اياسىنداعى ۇقشۇ-عا مۇشە مەملەكەتتەردىڭ قوسىمشا شارالارىنىڭ ءتىزىلىمىن قابىلداۋ جانە ۇقشۇ فورماتىندا لاڭكەستىك دەپ تانىلعان ۇيىمداردىڭ بىرىڭعاي تىزبەسىن قالىپتاستىرۋ تۋرالى ەرەجەگە قول قويۋ بولدى.
سونداي-اق وسى كۇندەرى ۇقشۇ پارلامەنتتىك اسسامبلەياسى دا ءتيىمدى ارەكەت ەتەدى. پارلامەنتتىك اسسامبلەيانىڭ ونىنشى پلەنارلىق وتىرىسى قازان ايىندا سانكت-پەتەربۋرگتە ءوتتى. ول مەملەكەتتىك قۇپيالار, ەنەرگەتيكالىق قاۋىپسىزدىك, گۋمانيتارلىق كومەك تۋرالى ۇلگى زاڭداردى قاراستىرۋعا ارنالدى. كەزدەسۋگە قاتىسۋشىلار ورتالىق ازياداعى ىنتىماقتاستىق پەن وڭىرلىك قاۋىپسىزدىكتى زاڭنامالىق قامتاماسىز ەتۋدى, پارلامەنتتىك اسسامبلەيا دەڭگەيىندەگى ەقىۇ مەن ۇقشۇ اراسىنداعى قارىم-قاتىناس جايىن تالقىلادى.
ۋاقىت وزعان سايىن مۇشە ەلدەردىڭ اسكەري-ەكونوميكالىق سالاداعى ءوزارا ءىس-قيمىلى دا كەڭەيۋدە. 2016 جىلى مۇشە مەملەكەتتەردىڭ باسشىلارى 2018 جىلعا دەيىنگى اسكەري-ەكونوميكالىق ىنتىماقتاستىق باعدارلاماسىن ماقۇلدادى جانە اسكەري تەحنيكا مەن جابدىقتارعا قىزمەت كورسەتۋ بويىنشا سەرۆيستىك ورتالىقتار جەلىسىن ەنگىزۋدى كوزدەيتىن بولاشاقتاعى مۇمكىندىكتەردى قاراستىردى. بۇل تۇرعىدان العاندا ەسىرتكىنىڭ زاڭسىز اينالىمىنا جانە پرەكۋرسورلارعا قارسى كۇرەس جونىندەگى «ارنا» حالىقارالىق وپەراتسياسى, «زاڭسىز» زاڭسىز ميگراتسياعا قارسى كۇرەس شاراسى, «پروكسي» ەكسترەميستىك جانە تەرروريستىك سيپاتتاعى ۆەب-رەسۋرستارمەن كۇرەس سياقتى جىل سايىن ۇيىمداستىرىلۋعا ءتيىستى بىرلەسكەن وپەراتسيالار جۇرگىزۋدىڭ ستراتەگيالىق ماڭىزى جوعارى بولىپ تابىلادى. بۇل ورايدا نورماتيۆتىك-قۇقىقتىق بازانى كەڭەيتۋ جانە تۇراقتى نەگىزدە ۇيىمداستىرۋدىڭ ستراتەگيالىق قۇجاتتارىن قابىلداۋ قاجەتتىگى تۋىندايدى. سوندىقتان 2014 جىلى اقپارات سالاسىنداعى قىلمىستىق ارەكەتتەرگە قارسى ارەكەت ەتۋ تۋرالى ۇقشۇ-عا مۇشە مەملەكەتتەردىڭ ءوزارا ارەكەتتەستىگى تۋرالى حاتتاماسى قابىلداندى.
ۇقشۇ قىزمەتىنىڭ ماڭىزدى ءبىر بولىگى – بەيبىتشىلىك پەن تۇراقتىلىقتى قامتاماسىز ەتۋ جونىندەگى باسقا دا حالىقارالىق ۇيىمدارمەن ءوزارا ارەكەتتەستىكتى نىعايتۋ بولىپ تابىلادى. 2004 جىلدان باستاپ ۇقشۇ بۇۇ باس اسسامبلەياسىنىڭ باقىلاۋشىسى. سونداي-اق ەقىۇ, يىۇ, شىۇ سىندى حالىقارالىق قۇرىلىمدارمەن ىنتىماقتاستىق ورناتۋى جوعارى مانگە يە. نەگىزىنەن, بۇل ۇيىم بۇرىنعى كەڭەستىك ەلدەر اراسىندا اسكەري قاۋىپ-
سىزدىك سالاسىنداعى ىنتىماقتاستىقتى نىعايتۋعا سەپتىگىن تيگىزۋدە. ال قازاقستاننىڭ وسى ۇيىمعا بەلسەندى قاتىسۋى ەلىمىزدىڭ بىتىمگەرشىلىك باستامالارىن العا جىلجىتۋدىڭ جانە حالىقارالىق قاۋىپسىزدىكتى قامتاماسىز ەتۋدىڭ تاعى ءبىر باعىتى بولىپ تابىلادى.
