دوڭگەلەك ۇستەل جۇمىسىن اشقان ءدىن ىستەرى جانە ازاماتتىق قوعام ۆيتسە-ءمينيسترى ب.ارىن قازاقستاندا ادام قۇقىقتارى شەكتەلمەگەنىن, ءدىني بىرلەستىكتەرگە جاعداي جاسالعانىن اتاپ ءوتتى.
«ەلدەگى ءدىن سالاسىنداعى تۇراقتىلىقتى ساقتاۋ, كونفەسسياارالىق كەلىسىمدى جانە قوعامداعى تولەرانتتىقتى نىعايتۋ, حالىقتىڭ ءدىني ەكسترەميزم يدەولوگياسىنا قارسى يممۋنيتەتىن قالىپتاستىرۋ جونىندە ءتۇرلى شارالار قابىلدانىپ كەلەدى. سونداي-اق, ەلدە رەسمي تىركەلگەن ءدىني بىرلەستىكتەر مەن ولاردىڭ فيليالدارىنىڭ قىزمەتىنە قاجەتتى مۇمكىندىكتەر قاراستىرىلعان», دەدى ب.ارىن.
ۆيتسە-مينيستر ءدىن سالاسىنداعى مەملەكەتتىك ساياساتتىڭ 2017-2020 جىلدارعا ارنالعان تۇجىرىمداماسىنا توقتالدى. ونىڭ ايتۋىنشا, بۇل قۇجات مەملەكەت پەن ءدىن اراسىنداعى قارىم-قاتىناستى رەتتەۋگە كومەكتەسىپ, ءدىننىڭ قوعام الدىنداعى ءرولىن انىقتاۋعا قوسار ۇلەسى مول.
ب.ارىن دوڭگەلەك ۇستەلگە جينالعاندارعا مينيسترلىك تاراپىنان ازىرلەنگەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭىنىڭ جوباسىمەن تانىستىردى. ونىڭ سوزىنە سۇيەنسەك, جاڭا زاڭ جوباسىندا ادام قۇقىقتارىن قورعايتىن جانە ءدىندى ەكسترەميستىك جانە دەسترۋكتيۆتى ماقساتتا پايدالانۋدىڭ ىقتيمالدىعىن تومەندەتۋگە باعىتتالعان قۇقىقتىق نورمالار ەنگىزىلگەن. سونىمەن قاتار, ب.ارىن مينيسترلىك تاراپىنان اتقارىلىپ جاتقان شارالار جونىندە اڭگىمەلەپ بەردى.
ءدىن ىستەرى جونىندەگى كوميتەت توراعاسىنىڭ ورىنباسارى ەركىن وڭعارباەۆ زاڭ جوباسىن ازىرلەۋ بارىسىندا ءدىني بىرلەستىكتەردىڭ, ۇكىمەتتىك ەمەس ۇيىمداردىڭ جانە ساراپشىلاردىڭ پىكىرى ەسكەرىلگەنىن ءسوز ەتتى.
زاڭ جوباسى سايكەس, ادامنىڭ بەت بەينەسىن تۇمشالايتىن, دەسترۋكتيۆتى يدەولوگيالىق اعىمداردى ناسيحاتتايتىن كيىم تۇرلەرىن كيۋگە جانە تاراتۋعا شەكتەۋ قويۋ كوزدەلگەن. سونداي-اق, ولاردى بۇقارالىق اقپارات قۇرالدارىندا جارنامالاۋعا تىيىم سالىنادى. سونىمەن قاتار, ءدىني بىرلەستىكتەردىڭ قارجىلىق اشىقتىعىن قامتاماسىز ەتۋ, ءدىني ەكسترەميزم جانە تەرروريزمگە قارسى ءىس-قيمىل تيىمدىلىگىنە باعا بەرۋ جۇيەسىن ەنگىزۋ, ءدىني قاتىناستار سۋبەكتىلەرىنىڭ قىزمەتىنە باقىلاۋدى كۇشەيتۋ سەكىلدى ماسەلەلەر دە قاراستىرىلعان.
جيىنعا قاتىسۋشىلار ءدىني احۋالدى رەتتەۋگە ارنالعان جاڭا زاڭ جوباسىنا قاتىستى بىرقاتار ماسەلەلەردى تالقىلاپ, ونى قابىلداۋ مەملەكەت پەن كونفەسسيالار اراسىنداعى قاتىناستى جەتىلدىرۋگە, ءدىني ەكسترەميزم يدەياسىنىڭ تارالۋىنا شەكتەۋ قوياتىنىنا سەنىم ءبىلدىردى.
اباي اسانكەلدى ۇلى,
«ەگەمەن قازاقستان»
