سالتاناتتى شاراعا مەملەكەتتىك حاتشى گۇلشارا ابدىقالىقوۆا, ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ جانە مەملەكەتتىك مەكەمەلەردىڭ, ساراپشىلار قاۋىمداستىعى مەن ۇەۇ ۇيىمداردىڭ وكىلدەرى قاتىستى.
ءراسىمنىڭ اشىلۋ سالتاناتىندا ءسوز سويلەگەن گ.ابدىقالىقوۆا الەۋمەتتىك ماسەلەلەردى شەشۋگە ەلەۋلى ۇلەس قوسىپ جۇرگەن ۇكىمەتتىك ەمەس ۇيىمدارعا سىياقى تاعايىنداۋ «رۋحاني جاڭعىرۋ» باعدارلاماسى اياسىندا ۇيىمداستىرىلعانىن اتاپ ءوتتى.
«ەلباسى نۇرسۇلتان نازارباەۆ ازاماتتىق قوعام, ونىڭ ىشىندە ۇكىمەتتىك ەمەس ۇيىمدار دەموكراتيانىڭ اجىراماس بولىگى دەپ ايتىپ وتكەن بولاتىن. مەملەكەتىمىزدىڭ ءوسىپ-وركەندەۋى مەن قوعامدىق سانانىڭ جاڭعىرۋ ازاماتتار بەلسەندىلىگىنىڭ ارتۋى ارقىلى جۇزەگە اساتىنى انىق», دەدى گ.ابدىقالىقوۆا.
مەملەكەتتىك حاتشى قوعامنىڭ ساناسىن جاڭعىرتۋ الەۋمەتتىڭ بەلسەندىلىگى, ازاماتتاردىڭ قازىرگى زامان بەن بولاشاق الدىنداعى جاۋاپكەرشىلىگى بولماسا جۇزەگە اسپايتىنىن جەتكىزدى. ونىڭ ايتۋىنشا, ۇكىمەتتىك ەمەس ۇيىمداردىڭ جۇمىسىن جانداندىرۋ جانە ونى قولداۋ وسى باعىتتا اتقارىلاتىن ماڭىزدى شارالار قاتارىندا.
گ.ابدىقالىقوۆا قازاقستانداعى ۇەۇ قىزمەتىنىڭ تاريحىنا كوز جۇگىرتىپ, ەلىمىزدە تۇڭعىش قۇرىلعان ۇكىمەتتىك ەمەس ۇيىم رەتىندە «سەمەي-نەۆادا» قوزعالىسىن اتاپ كورسەتتى. تاۋەلسىزدىك جىلدارىنان بەرى ەلىمىزدە ولاردىڭ قىزمەتى قارقىن الدى. سونىڭ ناتيجەسىندە, قازىرگى تاڭدا قازاقستاندا 19 مىڭنان استام ۇەۇ تىركەلىپ, وندا 30 مىڭعا جۋىق ادام جۇمىس ىستەيدى. مەملەكەتتىك حاتشىنىڭ سوزىنە سۇيەنسەك, ۇكىمەتتىك ەمەس ۇيىمدار استانا, الماتى قالالارىندا جانە وقو-دا بەلسەنە قىزمەت اتقارادى.
مەملەكەتتىك حاتشى ۇەۇ-دارعا بولىنگەن قاراجات پەن ولاردىڭ اتقارعان جۇمىستارىنىڭ ەسەبىنە توقتالدى. سونداي-اق, ەلدىڭ دامۋىنا ۇلەس قوسىپ جۇرگەن بىرقاتار ۇكىمەتتىك ەمەس ۇيىمداردىڭ قىزمەتىن جوعارى باعالادى.
«وسى سىياقى – ۇەۇ-داردىڭ قىزمەتىن مەملەكەتتىڭ باعالاۋى. ولاردىڭ ماڭىزدى الەۋمەتتىك ماسەلەلەردى شەشۋگە قوسقان ۇلەسى مول. سولاردىڭ كەيبىرىن اتاپ ءوتۋدى ءجون كورىپ وتىرمىن. ماسەلەن, الماتىدا سەرىكقازى كاكىبالان ۇلىنىڭ باستاماسىمەن قۇرىلعان «قازاق ينتەرنەتى» قوعامدىق قورى 2005 جىلدان بەرى قازاق ينتەرنەتىن دامىتۋعا ەلەۋلى ۇلەس قوسىپ, بەس جۇزدەن استام ينتەرنەت رەسۋرس جاسادى. قور جاساعان رەسۋرستار ىشىندە «ەگەمەن قازاقستان», «انا ءتىلى», «قازاق ادەبيەتى» سەكىلدى سايتتار بار», دەدى گ.ابدىقالىقوۆا.
ءدىن ىستەرى جانە ازاماتتىق قوعام ءمينيسترى ن. ەرمەكباەۆ ءوز كەزەگىندە ۇكىمەتتىك ەمەس ۇيىمداردىڭ ەلىمىزدە اتقارىپ جاتقان ماڭىزدى رولىنە توقتالدى. ونىڭ ايتۋىنشا, الەۋمەتتىك ماڭىزدى ماسەلەلەردىڭ وڭ شەشىمىن تابۋ بارىسىندا ۇەۇ-لار مەملەكەتتىڭ تاپتىرماس سەرىگىنە, سەنىمدى ارىپتەسىنە اينالىپ وتىر.
«ۇكىمەتتى ەمەس ۇيىمدار ەلباسىنىڭ العا قويعان ماقساتتارىنا قول جەتكىزۋگە, ەلىمىزدىڭ دامۋىنا ەلەۋلى ۇلەس قوسادى. مەملەكەت ءتۇرلى تاسىلدەر ارقىلى ولارعا قولداۋ كورسەتىپ كەلەدى. وسى قولداۋدىڭ قاتارىندا مەملەكەتتىڭ الەۋمەتتىك تاپسىرىس گرانتتارى جانە بۇگىن بەرىلەتىن سىياقى بار. مۇنىڭ ءبارى – ازاماتتىق قوعامنىڭ جانە دەموكراتيالىق ساياساتتىڭ بەلگىسى», دەدى ن.ەرمەكباەۆ.
بايقاۋعا 2016 ءوتىنىش كەلىپ تۇسكەن. ارنايى قۇرىلعان ساراپشىلار توبى سولاردىڭ ىشىنەن 15 اتالىم بويىنشا 59 ۇكىمەتتىك ەمەس ۇيىمدى ۇزدىك دەپ تاۋىپتى. جۇلدەگەرلەرگە 4,5 ميلليون تەڭگە كولەمىندەگى سىياقى تاعايىندالعان. ۇزدىكتەر قاتارىندا «قازاقستان كۆن وداعى» رەسپۋبليكالىق جاستار قوعامدىق بىرلەستىگى, «ارداگەر» قوعامدىق بىرلەستىگى, «بولاشاق» حالىقارالىق ستيپەندياسى ستيپەندياتتارىنىڭ قاۋىمداستىعى» سەكىلدى بەلدى ۇيىمدار بار.
جۇلدەگەرلەردىڭ ءبىرى «قازاقستان كۆن وداعى» رەسپۋبليكالىق جاستار قوعامدىق بىرلەستىگى پرەزيدەنتى ەسەن ەلەۋكەن پايىمداۋىنشا, مۇنداي سىياقىلار ۇكىمەتتىك ەمەس ۇيىمداردى ودان ءارى بەلسەنە جۇمىس ىستەۋگە ىنتالاندىرادى.
«جاستار ساياساتى اتالىمى بويىنشا جۇلدەگە يە بولدىق. الداعى ۋاقىتتا ۇكىمەتتىك ەمەس ۇيىمدارعا قولداۋ جالعاسىن تابا بەرۋىنە تىلەكتەسپىز. مۇنداي بايقاۋلار يگى ىستەر اتقارىپ جاتقان ۇيىمدارعا كومەك ءارى قولداۋ», دەدى ە.ەلەۋكەن.
وتىنىمدەردىڭ باسىم بولىگى حالىقتىڭ الەۋمەتتىك وسال توپتارىن, جاستار مەن بالالاردىڭ باستامالارىن, ازاماتتار مەن ۇيىمداردىڭ قۇقىقتارىن جانە زاڭدى مۇددەلەرىن, قوعامدىق كەلىسىم مەن ۇلتتىق بىرلىكتى نىعايتۋ سەكىلدى باعىتتار بويىنشا كەلىپ تۇسكەن.
