— يۆان ەڭ الدىمەن سوڭعى تۋردا العان جاراقاتىڭىزدان قالاي ايىققانىڭزدى سۇراساق؟
— بارلىعى جاقسى. قازىر جاتتىعۋعا كىرىسىپ كەتتىم. بەيسەنبى كۇنگى ماڭىزدى ويىنعا دايىنمىن دەپ ويلايمىن.
— مينسككە جاساعان ساپارىڭىز قالاي بولدى؟ وتانىڭىزعا ورالعان شاقتا ءسىز قازاقستان چەمپيونى بولىپ باردىڭىز عوي.
— ادەتتەگىدەي جۇمىس قالپىندا بارىپ قايتتىم. ۇلتتىق قۇرامانىڭ ويىنىنا قاتىسۋى قاجەت بولاتىن. الايدا, العان جاراقاتىمنىڭ سالدارىنان الاڭعا شىعا المادىم. دارىگەرلەرگە قارالىپ, ءبىرشاما تىنىعىپ الدىم. سەبەبى, سوڭعى ايدا ويىندار وتە كوپ بولىپ كەتتى.
— سوڭعى تۋر مەن ەۋروپا ليگاسىنىڭ ويىنى اراسىنداعى ءۇزىلىس ساعان پايداسىن تيگىزگەن سەكىلدى عوي؟
— ارينە, بىزگە ويىن وتكىزىپ, ۇنەمى قالىپتا بولعانىمىز جاقسى ەدى. ءبىز سوڭعى ويىندى 25-قازاندا وتكىزدىك. دەگەنمەن, كەلە جاتقان ويىن قالاي وتەرىن كورە جاتارمىز. جاقسى ويىن ورنەگىن كورسەتەمىز دەپ ۇمىتتەنەمىن.
— العاشقى تۋردان باستاپ سەن كوماندا ليدەرلەرىنىڭ بىرىنە اينالدىڭ. جاڭا چەمپيوناتقا قالاي تەز داعدىلانىپ الدىڭ.
— ەڭ الدىمەن باپكەرلەردىڭ سەنىمى اسەر ەتتى. سوسىن كومانداداعى جىگىتتەردىڭ دە جىلى قاباقتارى ماعان كومەك بولدى.
— ماۋسىم اۋىر ءوتتى دەپ ويلايسىز با؟
— البەتتە, ماۋسىم وتە اۋىر بولدى. ارقيلى وقيعالارعا باي بولدى دەسەم ارتىق ەمەس.
— ءباسپاسوز بەتتەرىندە ستانيمير ستويلوۆتىڭ «فەنەرباحچەگە» اۋىسۋى جايلى اقپارات تارادى. كوماندا ىشىندە بۇل ماسەلەگە قالاي قاراپ جاتسىزدار؟
— ءبىز بۇل ماسەلەگە باس قاتىرىپ جاتپادىق. سەبەبى, الدا ماڭىزدى 2 ويىنىمىز بار. ال ودان وزگەنى تالقىلاۋ ءبىزدىڭ شارۋامىز ەمەس.
— وزىڭە وزگە كوماندالاردان ۇسىنىس تۇسپەدى مە؟
— ناقتى ايتار بولسام, مەنىڭ بار ويىم قازىر «استانادا». ەۋروپا ليگاسىنىڭ ەكى ويىنى مەن ءۇشىن قاتتى ماڭىزدى. توپتان شىعىپ كەتسەك تاماشا بولار ەدى.
— دۇيسەنبى كۇنى «ۆيلياررەالدىڭ» «اتلەتيكپەن» اۋىر ويىنى بار. «استانامەن» ويناپ بولعان سوڭ تاعى ءبىر قيىن قارسىلاسقا تاپ بولادى. ول «ۆالەنسيا». وسى تۇرعىدا يسپانيالىق كلۋب ەلورداعا مىقتى دايىندىقپەن كەلمەيتىن سەكىلدى.
— بىزگە, قارسىلاستىڭ دايىندىعىن ەمەس, ءوزىمىزدىڭ دايىندىعىمىز ماڭىزدى بولۋى كەرەك. باستىسى ءوزىمىزدىڭ ويىنىمىزدا.
— «ۆيلياررەالمەن» يسپانياداعى ويىندا ەكى كوماندانىڭ دەڭگەيى بولەك ەكەنى بەلگىلى بولدى.
— ارينە, «ۆيلياررەال» جوعارى دەڭگەيدىڭ كومانداسى. قارسىلاسىمىز يسپان لا-ليگاسىندا تاماشا ناتيجە كورسەتىپ ءجۇر. تۋرنيرلىك كەستەدە دە كوتەرىلدى.
— «استانا» قانداي باسىمدىلىعىنىڭ ارقاسىندا جەڭىسكە جەتۋى مۇمكىن؟
— ۇيلەسىمدىلىكتىڭ ارقاسىندا. سونىمەن قاتار, ءتارتىپتى جوعالتپاۋىمىز قاجەت. وسىنداي قاسيەتتەردىڭ ارقاسىندا جەڭىسكە جەتۋىمىز مۇمكىن.
— بۇگىنگىدەي مەرەكەلىك ءىس-شارالارعا قالاي قارايسىڭ؟
— بۇنداي ءىس-شارالار ارقاشان دا جاقسى عوي.
— رەسمي كوستيۋم كيگەن قالاي ەكەن؟
— تاماشا! بىراق, سوڭعى ون جىل بويى مۇنداي كيىم كيمەگەندىكتەن, كىشكەنە تۇسىنە الماي تۇرمىن.
اڭگىمەلەسكەن ەرمۇحامەد ماۋلەن
