وندا اۆتوموبيل جولدارى كوميتەتى توراعاسىنىڭ ورىنباسارى امانگەلدى بەكوۆ «نۇرلى جول» باعدارلاماسى بويىنشا جۇزەگە اسىرىلعان جوبالار مەن الداعى جوسپارلار جونىندە بايانداپ, تىلشىلەردىڭ سۇراقتارىنا جاۋاپ بەردى.
باعدارلاما الداعى بەس جىل ىشىندە قۇرىلىستىڭ بەس نەگىزگى باعىتىن تەڭ دامىتۋدى كوزدەيدى. بۇل – ورتالىق – سولتۇستىك, ورتالىق-شىعىس, ورتالىق – وڭتۇستىك, ورتالىق – باتىس جانە الماتى – شىعىس اۆتوجول جوبالارى. «2015-2016 جىلدارعا ارنالعان «نۇرلى جول» مەملەكەتتىك باعدارلاماسىن ىسكە اسىرۋ باستالعاننان بەرى رەسپۋبليكالىق ماڭىزى بار 2 مىڭ شاقىرىم اۆتوكولىك جولى سالىنىپ, قايتا جاڭارتىلۋدا. ونىڭ ىشىندە 1,3 مىڭ شاقىرىم جول 1 جانە 2 تەحنيكالىق سانات پارامەترلەرى بويىنشا پايدالانۋعا بەرىلدى. «باتىس ەۋروپا – باتىس قىتاي» حالىقارالىق ترانزيتتىك ءدالىزى, استانا – تەمىرتاۋ, الماتى – قاپشاعاي, كوكشەتاۋ –پەتروپاۆل ۋچاسكەلەرى تولىعىمەن اياقتالدى», دەدى كوميتەت وكىلى.
بارلىق جوبالار بويىنشا جۇمىسقا 75 مىڭ ادام تارتىلعان, وتاندىق وندىرۋشىلەر ماتەريالدارىنىڭ ۇلەسى 93 پايىزدى قۇراپتى. امانگەلدى بەكوۆتىڭ ايتۋىنشا, باعدارلاما اياسىندا جۇرگىزىلگەن جۇمىستاردىڭ ناتيجەسىندە جاقسى جانە قاناعاتتانارلىق جاعدايداعى جولداردىڭ ۇلەسى 85 پايىزعا جەتكەن. بيىل ورتالىق – وڭتۇستىك, ورتالىق – شىعىس, بەينەۋ – اقتاۋ, اقتوبە – اتىراۋ, قاپشاعاي – تالدىقورعان, استانا – پەتروپاۆل جانە ورال – كامەنكا جوبالارىنىڭ قۇرىلىس جۇمىستارى جالعاستى. ولاردىڭ جالپى ۇزاقتىعى – 1,2 مىڭ شاقىرىم. سونىمەن قاتار ۇزاقتىعى 2,5 مىڭ شاقىرىم بولاتىن قاندىاعاش – ماقات, جەتىباي – جاڭاوزەن, قۇرتى – بۋرىلبايتال, تالدىقورعان – وسكەمەن, مەركى – بۋرىلبايتال, كالباتاۋ – مايقاپشاعاي, ءۇشارال – دوستىق, بەينەۋ – اقجىگىت, تاسكەسكەن – باقتى, وسينوۆ اسۋى, ششۋچە – زەرەندى جاڭا جوبالارىن ىسكە اسىرۋ باستالدى. جىل اياعىنا دەيىن جالپى ۇزاقتىعى 0,7 مىڭ شاقىرىمدى قۇرايتىن اقتوبە – قاندىاعاش, اتىراۋ – استراحان, ۇزىناعاش – وتار, استانا قالاسىنىڭ وڭتۇستىك – باتىس اينالما جولى, قوستاناي – دەنيسوۆكا اينالمالى جولى جوبالارى بويىنشا شارتتاردى بەكىتۋ جانە دايىندىق جۇمىستارىن باستاۋ جوسپارلانىپ وتىر. بۇل جوبالاردىڭ ارقاسىندا شامامەن 9 مىڭ جاڭا جۇمىس ورنى اشىلماق.
«قازىرگى ۋاقىتتا جالپى ۇزاقتىعى 174 شاقىرىم بولاتىن استانا – تەمىرتاۋ جانە الماتى – قاپشاعاي جول ۋچاسكەلەرىندە اقىلى جۇيە مەن زياتكەرلىك كولىك جۇيەسىن سالۋ بويىنشا جۇمىستار جۇرگىزىلۋدە. بيىل جىل اياعىنا دەيىن جۇيەنى تاجىريبەلىك پايدالانۋ باعىتىندا ىسكە قوسۋ جوسپارلانۋدا», دەدى ءباسپاسوز ءماسليحاتىندا «قازاۆتوجول» ۇك» اق بيزنەستى دامىتۋ جونىندەگى باسقارۋشى ديرەكتورى رۋستام يساەۆ.
اعىمداعى جىلدىڭ 1 قازانىنداعى جاعداي بويىنشا, اقىلى جولدان جينالعان قارجى 1 ملرد تەڭگەنى قۇرادى. بۇل بىلتىرعى كورسەتكىشتەن 4 پايىزعا ارتىق.
اسحات رايقۇل,
«ەگەمەن قازاقستان»
