ءماجىلىس دەپۋتاتى قۋانىش سۇلتانوۆ توراعالىق ەتكەن جيىندا 2016-2020 جىلدارعا ارنالعان ۇەۇ مەن مەملەكەتتىڭ ىنتىماقتاستىعىن دامىتۋ جونىندەگى جالپىۇلتتىق ءىس-قيمىل جوسپارىن, 2016 جىلى VII ازاماتتىق فورۋمنىڭ ۇسىنىمدارىن ىسكە اسىرۋ ماسەلەلەرى تالقىلاندى.
وسى ماسەلە توڭىرەگىندە ءدىن ىستەرى جانە ازاماتتىق قوعام ءمينيسترى نۇرلان ەرمەكباەۆ اتالعان تاقىرىپتا بايانداما جاسادى. ۆەدومستۆو باسشىسى ۇكىمەتتىك ەمەس ۇيىمدارمەن ءوزارا ءىس-قيمىلدى سيپاتتايتىن نەگىزگى باعىتتار جونىندە اڭگىمەلەپ بەردى. ونىڭ ايتۋىنشا, مينيسترلىك ازاماتتىق فورۋم مەن ۇەۇ-مەن ءوزارا ءىس-قيمىل جونىندەگى ۇيلەستىرۋ كەڭەسىنىڭ جۇمىسى جۇرگىزىلمەك. وندا اتالعان سالانى زاڭنامالىق جانە ينستيتۋتسيونالدىق دامىتۋدىڭ ماڭىزدى ماسەلەلەرى شەشىلەدى. ءمينيستردىڭ ايتۋىنشا, ايماقتاعى ۇكىمەتتىك ەمەس ۇيىمدارمەن دە ءوزارا ءىس-قيمىلدى ۇيلەستىرۋ جوسپاردا بار.
«مينيسترلىكتىڭ باستاماسىمەن 2017 جىلدىڭ باسىنان ازاماتتىق سەكتور وكىلدەرىمەن بىرلەسىپ حالىقتى تولعاندىراتىن وزەكتى ماسەلەلەرگە مونيتورينگ جاساۋ جانە جيناقتاۋ جۇمىسى جۇرگىزىلىپ كەلەدى. بۇگىنگە دەيىن 130-دان استام سۇراق انىقتالعان. وسى ماسەلەلەر بويىنشا جيناقتالعان دەرەكتەر ۇكىمەتكە جولداندى. سونىمەن قاتار ءتيىستى تاپسىرمالار بەرىلىپ, ونىڭ ورىندالۋ بارىسى مينيسترلىكتىڭ نازارىندا بولادى», دەدى ن.ەرمەكباەۆ.
مينيستر, سونداي-اق, ەرىكتىلەردىڭ جۇمىسىن ۇيلەستىرۋ, ازاماتتىق قوعام جونىندەگى زاڭ جوباسى, الەۋمەتتىك باعدارلامالاردىڭ ساپاسىن ارتتىرۋ توڭىرەگىندە دە ءسوز قوزعادى. ءمينيستردىڭ سوزىنە سۇيەنسەك, ءبىرىنشى رەت وتكىزىلگەن رەسپۋبليكالىق قوعامدىق كەڭەس ءماجىلىسىنىڭ قورىتىندىلارى بويىنشا اتالعان ۇيىمنىڭ تاجىريبەسى مەن ولاردىڭ قىزمەتىن جەتىلدىرۋگە ارنالعان ۇسىنىمدار تۇجىرىمدالعان. بۇدان بولەك, ۇەۇ-لارعا گرانتتار ءبولۋ قاعيدالارى تولىقتىرىلعان. ۆەدومستۆو باسشىسى كەلتىرگەن دەرەكتەر بويىنشا, 2016 جىلى 208 ميلليون تەڭگەلىك 11 جوبا جۇزەگە اسىرىلعان. بيىل قارجىلاندىرۋ كولەمى 3 ەسەگە ءوسىپ, 608,5 ميلليون تەڭگەنى قۇراپ وتىر.
تالقىلاۋعا قاتىسقان ساراپشىلار بيلىك پەن قوعامنىڭ كۇش-جىگەرىن بىرىكتىرۋ ءاربىر ادامنىڭ قۇقىقتارى مەن بوستاندىقتارىنا قاتىستى كونستيتۋتسيالىق نورمالاردى ىسكە اسىرۋعا مۇمكىندىك بەرەتىنىن اتاپ ءوتتى. سونداي-اق ولار ازاماتتىق فورۋم مەن ۇەۇ-مەن ءوزارا ءىس-قيمىل جونىندەگى ۇيلەستىرۋ كەڭەسىمەن تۇراقتى اشىق ديالوگ جۇرگىزىلۋىن جوعارى باعالادى. كوميسسيا وتىرىسىندا تۇجىرىمدالعان ۇسىنىمدار مەملەكەت باسشىسىنىڭ, پارلامەنت پەن ۇكىمەتتىڭ نازارىنا ۇسىنىلادى.
اباي اسانكەلدى ۇلى,
«ەگەمەن قازاقستان»
