باسقارما باسشىسىنىڭ ايتۋىنشا, الداعى جىلى ورداباسى اۋدانى مەن تۇركىستان قالاسىندا جالپى كولەمى 57,2 ملن تەكشە مەتردى قۇرايتىن جاڭا ەكى سۋ قويماسى سالىناتىن بولادى. سونداي-اق, وبلىسىمىزدا سۋ ارنالارىنداعى سۋ سىيىمدىلىعىن تومەندەتۋ ماقساتىندا ىلعالداندىرۋ جانە تۇزدانعان ايماقتاردا سور شايۋ جۇمىستارى ۇيىمداستىرىلۋدا.
«بۇگىندە وبلىسىمىزدا جايىلىمداردى سۋلاندىرۋ بويىنشا قۇدىقتار قازۋ جۇمىستارى جالعاسۋدا. ماسەلەن, 2015 جىلى وبلىسىمىزدا 202 قۇدىق قازىلسا, ونىڭ 47-ءسى سۋبسيديالاندى. ال, 2016 جىلى 273 قۇدىق قازىلىپ, ونىڭ 272-ءسى سۋبسيديالانعان. 2017 جىلى 167 قۇدىق قازىلىپ, ونىڭ 105-ءى سۋبسيديالانىپ وتىر. 2018 جىلعى جوسپار بويىنشا وبلىسىمىزدا 120 قۇدىق قازىلاتىن بولسا, 2019 جىلى ولاردىڭ سانى 200-گە جەتكىزىلمەك», - دەيدى يلياس قۇرامىسوۆ.
بۇدان بولەك, الداعى جىلى وبلىسىمىزدا اۋىل شارۋاشىلىعى داقىلدارىنىڭ ەگىس كولەمى 802,5 مىڭ گەكتارعا ۇلعايتىلاتىن بولادى. سونداي-اق, الداعى 4 جىلدا 209 مىڭ 700 تۇرعىنى بار 84 ەلدى مەكەندى ورتالىقتاندىرىلعان اۋىز سۋمەن قامتۋ جوسپارلانىپ وتىر.
سونىمەن قاتار, وبلىسىمىزدا جاڭارتىلاتىن ەنەرگيا كوزدەرىنىڭ 14 جوباسى جۇزەگە اسىرىلىپ جاتىر. جالپى قۋاتى 173,3 مۆت قۇرايتىن 10 جوبانى 2025 جىلعا دەيىن جۇزەگە اسىرۋ جوسپارلانعان. «جاسىل ەكونوميكا» تۇجىرىمداماسىنا سايكەس وبلىستا بۇگىنگى تاڭدا قايتا وڭدەلگەن قالدىقتار كولەمى 1,4 ملن. توننانى قۇراپ وتىر.
اتقارىلعان جۇمىستارعا قانىققان ءوڭىر باسشىسى الداعى جىلدارى اتقارىلاتىن جۇمىستاردى جۇيەلەپ, «جاسىل ەكونوميكا» تۇجىرىمداماسىنىڭ تولىقتاي ورىندالۋىنا كۇش سالۋدى تاپسىردى.
«بۇگىنگى كۇنگە وبلىسىمىزدا جيناقتالعان قالدىقتار كولەمى 18,3 ملن. توننانى قۇرايدى. ونىڭ 14,1 ملن. تونناسى وندىرىستىك, 4,2 ملن. تونناسى تۇرمىستىق قالدىقتار. ءبىر سوزبەن ايتقاندا قالدىقتاردىڭ ورتاسىندا وتىرمىز. ەندىگى كەزەكتە قالدىقتاردى قايتا وڭدەۋ ارقىلى ءتۇرلى زاتتار شىعارىپ, كادەگە جاراتۋىمىز كەرەك. سوندىقتان قايتا وڭدەۋ ماسەلەسىن قولعا الۋ ءۇشىن شۇعىل جوسپار قۇرۋدى تاپسىرامىن», - دەدى جانسەيىت قانسەيىت ۇلى.
ءماجىلىس بارىسىندا «قازاقستان رەسپۋبليكاسىندا ءبىلىم بەرۋدى جانە عىلىمدى دامىتۋدىڭ 2016-2019 جىلدارعا ارنالعان مەملەكەتتىك باعدارلاماسىن» ىسكە اسىرۋ بارىسى دا تالقىعا ءتۇستى.
