ەسەپ كوميتەتىنىڭ باعالاۋى بويىنشا اەروعارىش كوميتەتىنىڭ عارىش قىزمەتى سالاسىنداعى مەملەكەتتىك ساياساتتى ىسكە اسىرۋ كەزىندە بيۋدجەت قاراجاتى مەن مەملەكەت اكتيۆتەرىن پايدالانۋ تيىمدىلىگى جەتكىلىكسىز.
اتاپ ايتقاندا, عارىش ينفراقۇرىلىمى وبەكتىلەرىن قۇرۋعا, پايدالانۋ مەن جەتىلدىرۋگە جۇمسالاتىن شىعىندار نورماتيۆتەرى ازىرلەنبەگەن.
رەسەي تاراپىنان قابىلدانعان «بايقوڭىر» كەشەنىنىڭ 109 وبەكتىسىن پايدالانۋ پەرسپەكتيۆالارى مەن تەڭگەرىم ۇستاۋشىسى ايقىندالماعان, 2009-2017 جىلدار ارالىعىندا ولاردى قورعاۋعا جۇمسالعان شىعىن 742,0 ملن تەڭگەنى قۇرادى.
قازاقستان رەسپۋبليكاسىنىڭ 2020 جىلعا دەيىنگى ستراتەگيالىق دامۋ جوسپارىندا كوزدەلگەن استانا قالاسىنداعى عارىش اپپاراتتارىن قۇراستىرۋ-سىناۋ كەشەنىنىڭ قۇرىلىسىن 2015 جىلى اياقتاۋ قامتاماسىز ەتىلمەگەن.
2017 جىلى اەروعارىش كوميتەتى مەملەكەتتىك ورگاندار مەن ۇيىمدارعا عارىش تۇسىرىلىمدەرىن بەرۋ قىزمەتتەرىن كورسەتۋگە «قازاقستان عارىش ساپارى» ۇك» اق-پەن جاسالعان شارتتىڭ سوماسىن نەگىزسىز ۇلعايتۋ بولىگىندە جالپى سوماسى 694,9 ملن تەڭگەگە مەملەكەتتىك ساتىپ الۋ تۋرالى زاڭناما تالاپتارىنىڭ بۇزىلۋىنا جول بەرگەندىگى انىقتالدى.
كۆازيمەملەكەتتىك سەكتور سۋبەكتىلەرىنىڭ جارعىلىق كاپيتالىن ۇلعايتۋعا بولىنەتىن بيۋدجەت قاراجاتىن قايتارۋ جانە ودان ءارى پايدالانۋ تەتىگىنىڭ جوق ەكەندىگى انىقتالدى. ايتالىق, «KazSat-3» عارىش اپپاراتىن جاساۋ جانە ۇشىرۋ جوباسىن ىسكە اسىرۋ ءۇشىن الىنعان 0,6 ملن تەڭگە مولشەرىندەگى قاراجات قالدىعى 2015 جىلدان بەرى «رەسپۋبليكالىق عارىشتىق بايلانىس ورتالىعى» اق-تىڭ شوتىندا ەسەپكە الىنعانى اتاپ ءوتىلدى.
«قازاقستان عارىش ساپارى» ۇك» اق-تىڭ 2011-2020 جىلدارعا ارنالعان دامۋ ستراتەگياسىنىڭ كورسەتكىشتەرى مەملەكەتتىك جوسپارلاۋ جۇيەسىنىڭ قولدانىستاعى قۇجاتتارىنا سايكەس كەلمەيدى, ونىڭ 2016-2020 جىلدارعا ارنالعان دامۋ جوسپارى بۇگىنگى كۇنگە دەيىن بەكىتىلمەگەن.
«قازاقستان عارىش ساپارى» ۇك» اق جول بەرگەن جالپى سوماسى 2 848,7 ملن تەڭگەگە «عارىش اپپاراتتارىن قۇراستىرۋ-سىناۋ كەشەنىن سالۋ» جوباسى شەڭبەرىندە جابدىقتاردى ساتىپ الۋ بويىنشا شىعىنداردى كىرىسكە الۋ بولىگىندە بۋحگالتەرلىك ەسەپتى جۇرگىزۋ ءتارتىبىنىڭ بۇزۋشىلىقتارى انىقتالدى.
اەروعارىش كوميتەتىنىڭ ۆەدومستۆولىق باعىنىستى ۇيىمدارى جول بەرگەن ساپاسىز ورىندالعان جۇمىس كولەمىن قابىلداۋ, تەحنيكالىق قاداعالاۋدىڭ سۇيەمەلدەۋىنسىز قۇرىلىس-مونتاج جۇمىستارىن ورىنداۋ جانە وبەكتىلەر قۇرىلىسىنىڭ نورماتيۆتىك مەرزىمىن ساقتاماۋ بولىگىندە ساۋلەت, قالا قۇرىلىسى جانە قۇرىلىس قىزمەتى تۋرالى زاڭنامانىڭ بۇزىلعاندىعى انىقتالدى.
مەملەكەتتىك اۋديت قورىتىندىلارى بويىنشا ەسەپ كوميتەتى جالپى سوماسى 3 637,7 ملن تەڭگەگە قارجىلىق بۇزۋشىلىقتار, 646,1 ملن تەڭگەگە بيۋدجەت قاراجاتىن ءتيىمسىز پايدالانۋ جانە 24 812,5 ملن تەڭگەگە 36 راسىمدىك بۇزۋشىلىق فاكتىسىن انىقتادى.
مەملەكەتتىك اۋديت بارىسىندا 2 640,8 ملن وتەلىپ, قالپىنا كەلتىرىلدى, سونىڭ ىشىندە رەسپۋبليكالىق بيۋدجەت كىرىسىنە – 11,4 ملن تەڭگە, بۋحگالتەرلىك ەسەپ بويىنشا – 2 562,9 ملن تەڭگە جانە جۇمىستاردى ورىنداۋ, قىزمەتتەر كورسەتۋ ارقىلى – 66,5 ملن تەڭگە.
مەملەكەتتىك ءاۋديتتىڭ جەكەلەگەن ماتەريالدارى اكىمشىلىك قۇقىق بۇزۋشىلىقتار تۋرالى ىستەردى قاراۋعا ۋاكىلەتتى ورگاندارعا پروتسەستىك شەشىمدەر قابىلداۋ ءۇشىن جىبەرىلدى, دەپ حابارلادى ەسەپ كوميتەتىنىڭ ءباسپاسوز قىزمەتى.
