– جاستارىمىز جاڭا ومىرگە وسىنداي اسەم سارايدا قادام باسسىن دەگەن نيەتپەن سالتانات سارايىن تۇرعىزىپ وتىرمىز. بۇل ءىستى قولعا الماس بۇرىن ەلباسىنىڭ رۇقساتىن سۇراپ, باتاسىن العان ەدىم. وبلىسىمىزدا ءالى تالاي ءزاۋلىم عيماراتتار سالىنادى. كەلەر جىلى تەاتردىڭ جاڭا عيماراتىن, ءجۇزۋ باسسەينىن اشامىز. مۇنىڭ يگىلىگىن حالقىمىز, جاستارىمىز كورەدى. ال بۇگىنگى باس قوسىپ وتىرعان جاستارعا باقىت تىلەيمىن, ءاردايىم ءبىر-ءبىرىڭدى سىيلاپ, قولداپ, قورعاپ جۇرىڭدەر. سوندا ءبارى جاقسى بولادى. بۇگىن التىن, لاعىل تويلارىن وتكىزۋگە كەلگەن جۇپتاردىڭ جولىن بەرسىن دەيمىن. قوساقتارىڭمەن قوسا اعارىپ, كوپ بالالى بولىپ, قازاقتىڭ سانىن كوبەيتە بەرىڭدەر. قاريالارىمىزعا ءاردايىم جاستارىمىزعا ۇلگى-ونەگە بولىپ, نەمەرە-شوبەرەلەرىڭىزدىڭ قىزىعىن كورىڭىزدەر دەمەكپىن, – دەپ تىلەگىن ارناعان وبلىس اكىمى اماندىق باتالوۆتىڭ قۇتتىقتاۋىنان كەيىن, سالتانات سارايىنىڭ تۇساۋكەسەرىمەن بىرگە نەكەسى قيىلعان جاستارعا نەكە كۋالىگى تاپسىرىلدى.
ەكىنشىسى – 4,5 مىڭ شارشى مەتردى الىپ جاتقان كورمە كەشەنى. قۇرىلىسىنا بيۋدجەتتەن 1,3 ملرد تەڭگە قارجى جۇمسالىپتى. سىرتقى كورىنىسى الىستان كوز تارتاتىن نىسانعا جۇمسالعان وتاندىق جانە شەتەلدىك ماتەريالداردىڭ ساپاسى دا جوعارى دەڭگەيدە. وبلىس ورتالىعىنىڭ شىرايىن كىرگىزىپ, اجارىن اشا تۇسەتىن قۇرىلىس الداعى كۇندە قالا تۇرعىندارى مەن قوناقتارىنىڭ ەڭ كوپ اتباسىن بۇرار ورتالىعىنا اينالادى دەگەن سەنىم بار.
لەنتاسى قيىلىپ, ەسىگى اشىلعان سالتاناتتى جيىندى ءوڭىر باسشىسى اماندىق باتالوۆ قۇتتىقتاۋ سوزىمەن باستادى:
– وبلىستاعى ەكونوميكا, اۋىل شارۋاشىلىعى, مەديتسينا, ءبىلىم, مادەنيەت, تاعى دا باسقا سالاداعى وزىق تەحنولوگيالار مەن دۇنيەلەردى, ونەر تۋىندىلارىن حالىققا كورسەتۋ, ناسيحاتتاۋ, سول ارقىلى بولاشاق ۇرپاققا سارا جول سالۋ ماقساتىندا بوي كوتەرگەن عيماراتتىڭ تابىستى باستامالارعا جول اشاتىنىنا سەنىمدىمىن. مۇندا قالالىق, وبلىستىق, رەسپۋبليكالىق, ءتىپتى حالىقارالىق شارالاردى دا وتكىزۋگە بولادى. وسى عيماراتتى اشۋ ارقىلى كورمە قىزمەتىنىڭ جاڭا مۇمكىندىكتەرىنە جول اشۋمەن قاتار, وزىمىزدە وندىرىلەتىن تاۋارلار مەن قىزمەتتەردى كەشەن قابىرعاسىندا كوپشىلىككە ۇسىنۋ ارقىلى ءوڭىرىمىزدىڭ ينۆەستيتسيالىق تارتىمدىلىعىن دا ەسەلەي الامىز. قالامىز مۇنداي كورمە پاۆيلونىمەن ماقتانا الاتىنىنا سەنىمدىمىن, – دەدى اكىم.
ساۋلەتتى عيماراتتىڭ قۇرىلىسىن جۇرگىزگەن – «سترويسەرۆيس-97» جشس. عيمارات قالانىڭ كىرەبەرىسىندە ورنالاسقاندىقتان, قالاعا كەلۋشىلەرگە ءا دەگەننەن جاقسى اسەر قالدىرۋ جاعىنا باسا نازار اۋدارىلعان. كورمە كەشەنىن ارالاپ شىققان باسشىلىق تاراپى ساۋلەتتى كورىنىسىنە دە, قۇرىلىستىڭ ساپاسىنا دا جوعارى باعا بەردى.
بۇل عيماراتقا الداعى ۋاقىتتا وبلىستىق «اتامەكەن» كاسىپكەرلەر پالاتاسى, كاسىپكەرلەرگە قىزمەت كورسەتۋ ورتالىعى, «بيزنەس-مەكتەپ», بيزنەس-ينكۋباتور سياقتى مەكەمەلەر ورنالاسادى. بۇل مەكەمەلەر ءاۋ باستاعى جوسپارعا سايكەس جەتىسۋ ءوڭىرىن كوركەيتۋ, قالا حالقىن كاسىپتەندىرۋ جولىندا جۇمىس ىستەيتىن بولادى. نىساننىڭ اشىلۋ سالتاناتىندا ۇيىمداستىرىلعان العاشقى كورمەگە تالدىقورعانداعى «قاينار-اكب» جشس, «اجار» تىگىن فابريكاسى, حالىق بانكى مەن سبەربانك ۇجىمدارى باستاعان كاسىپورىندار شىعاراتىن ءھام تۇتىناتىن تاۋارلار قويىلدى. مۇنداي كورمەلەر ەندىگى ۋاقىتتا ءجيى-ءجيى ۇيىمداستىرىلىپ تۇراتىن بولادى. سەبەبى ءوڭىردىڭ كوركەيىپ, دامۋىنا ىقپالىن تيگىزەتىن قانداي باستاما دا ەلدىڭ نازارىنان تىس قالماۋعا ءتيىس.
الماس ءنۇسىپ,
«ەگەمەن قازاقستان»
الماتى وبلىسى
