پارلامەنت دەپۋتاتى رەتىندە ءارتۇرلى شارالارعا قاتىسقاندا, ەل ارالاعاندا, سونداي-اق ۇزاق جىلداردان بەرى «قازاقستان ارداگەرلەرى» قاۋىمداستىعى اتىنان اسكەري پاتريوتتىق تاربيە جۇمىستارىن جۇرگىزۋ بارىسىندا ءبىر جايتقا كوز قانىعىپ, كوڭىل سەندى. ول جايت – وتباسىندا بالانىڭ مەيىرىم مەن شۋاققا بولەنۋىنىڭ قاجەتتىلىگى. بۇل بالاعا قۋات بەرەدى, كوڭىلىن كەڭەيتەدى, جانىن جايساڭ ەتەدى. ونىڭ ومىرىنە نۇر شاشىپ, كەلەشەككە اق جول, ادال نيەت نۇسقايدى.
ومىردە انا الاقانىنىڭ قىزۋى مەن اكەنىڭ اسىل تاربيەسىن ەڭ جەڭسىك اس تا, استا-توك بايلىق تا, شيپاسى كۇشتى ءدارى دە الماستىرا المايدى. وتباسىندا مەيىرىم كورمەگەن بالا رۋحاني ۇستىننان ادا بولىپ ءوسۋى, ءوزىن ۇلتتان ساياق ۇستاپ, وزگە جاندارعا وشپەندىلىكپەن قاراۋى ىقتيمال. مۇنداي ازاماتتار ءارتۇرلى جات اعىمدار مەن ەكسترەميستىك توپتار ءۇشىن الەۋەتتى كۇشكە, دايىن ماتەريالعا اينالىپ كەتۋى عاجاپ ەمەس.
ونىڭ ۇستىنە رۋحسىزدىق, رۋحانياتسىزدىق – كەمەل قوعام ءۇشىن جات قۇبىلىس. ول – بولاشاعى ءبىرتۇتاس ەل قۇرۋ جولىنداعى باستى ءبىر كەدەرگى. باتىر اتا-بابالارى ءوز ۇلتى ءۇشىن ارپالىسقان, جۇرتىن اقساتۋدى ەمەس, اسقاقتاتۋدى ويلاعان. ولاردىڭ ۇلىق ۇلگىسى ۇلتتىق قۇندىلىق رەتىندە جاس ۇرپاق قۇلاعىنا قۇيىلعانى ابزال. ماڭگىلىك ەل بولامىن دەگەن مەملەكەتتىڭ ءار تۇرعىنى جىلاعاندى جۇباتىپ, جىعىلعاندى قولتىعىنان دەمەۋگە دايار تۇراتىن ەلگەزەك, مەيىرىمدى, كىشىپەيىل, ءجىلىجۇزدى بولعانى ابزال.
قايىرىمدىلىق كومەك قورىنىڭ مالىمەتىنە سايكەس (CAF – Charity Aid Fondation) الەمدىك قايىرىمدىلىق رەيتينگىندە قازاقستان 2017 جىلى 139 ەل اراسىندا 87-ءشى ورىن الدى. بۇل رەيتينگىدەگى ورنىمىزدىڭ جاقسارۋى قوعامنىڭ سۇرىنگەنگە كومەك قولىن سوزىپ, تارىققانعا سۇيەۋ بولۋىنا دا بايلانىستى. سەبەبى رەيتينگ تەك قايىرىمدىلىق ۇيىمدارىنا اۋدارىلاتىن اقشا كولەمىمەن عانا ەمەس, ءاربىر ەل ازاماتىنىڭ ەرىكتى-ۆولونتەر رەتىندە ىزگى ىستەرگە ارالاسۋى, بەيتانىس مۇقتاج ادامدارعا كومەك كورسەتۋى سەكىلدى ولشەمدەر بويىنشا دا باعالانادى.
ەسىگىنە ەشقاشان ق ۇلىپ سالماعان, ءار قوناقتى قۋانا قارسى العان مەيماندوس ءارى مەيىربان حالقىمىز وتارلىق تۇسىندا كورگەن تالاي قيانات پەن قيامەت, قۋعىن-سۇرگىندەر مەن قىرعىندار سالدارىنان بوتەن جانعا كۇدىكپەن قاراۋدى ۇيرەندى, بويىندا بەي-جايلىق, سەلقوستىق سەزىمى بەكىدى. ەندى مۇنىڭ بارلىعى وتكەنمەن بىرگە قالۋى ءتيىس. رۋحاني جاڭعىرۋ اياسىندا ءبىز ءال-فارابي بابامىز اڭساعان «قايىرىمدى قوعامدى» قۇرۋعا ءتيىسپىز!
بۇل ءۇشىن ەلباسىنىڭ «رۋحاني جاڭعىرۋ» ستراتەگياسىندا ايتىلعان ۇلتتىق ۇستىندى ساقتاۋ; وزىق داستۇرلەردى ۇستانۋ; كەجەگەنى كەرى تارتىپ, اياقتان شالاتىن جامان ادەتتەردەن ارىلۋ; باسەكەگە قابىلەتتىلىك; ءبىلىمپاز بولۋعا ۇمتىلۋ; سانانىڭ اشىقتىعى جانە باسقا دا قادىر-قاسيەتتەرگە جاس ۇرپاق بالاباقشادا ۇيرەتىلە باستاۋى قاجەت دەپ سانايمىن. سوندا ۇرپاق اۋىسىپ, ەل جاڭارىپ, ەلباسىنىڭ باعدارلامالىق ماقالاسىندا ايتىلعان اڭسارلى مۇراتتار ىسكە اسادى.
بۇگىندە الەم جۇرتشىلىعى الدىندا ادامزات ءۇشىن ومىرلىك ماڭىزدى ءۇش وزەكتى مىندەت تۇر: ونىڭ ءبىرىنشىسى – رۋحانياتتى, ەكىنشىسى – بەيبىتشىلىكتى, ءۇشىنشىسى – تابيعاتتى ساقتاپ قالۋ. بۇلاردىڭ قاي-قايسىسى دا ءبىزدىڭ تىرشىلىگىمىزدىڭ باستى باعدارى. ءبىر-ءبىرىن تولىقتىراتىن ۇعىمدار. وسى ءۇش باستاۋعا قازاقستانداعى ءاربىر ازاماتتىڭ, ءاربىر وتباسىنىڭ بولاشاعى بايلاۋلى.
ەندەشە بولاشاعى ءبىرتۇتاس ەل قۇرۋ جولىندا وتانىمىز بەن وتباسىمىزداعى بەيبىت ءومىردى, ۇلتتىق قۇندىلىقتاردى, رۋحاني ۇستىنداردى جانە تابيعي تازالىقتى ۇستاپ تۇرۋعا ۇمتىلايىق, بۇل مىندەتىمىزگە جاۋاپتى قارايىق, اعايىن.
باقىتبەك سماعۇل,
پارلامەنت ءماجىلىسىنىڭ دەپۋتاتى,
«نۇر وتان» پارتياسىنىڭ مۇشەسى, پرەزيدەنت جانىنداعى
ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ مۇشەسى
