بۇگىندە بۇل ءتيىستى سومانىڭ 89,7 پايىزىن قۇراپ وتىر. بۇل تۋرالى ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا بايانداما جاساعان ينۆەستيتسيالار جانە دامۋ مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى مارحابات جايىمبەتوۆ مالىمدەدى.
«8,8 ملن شارشى مەتر تۇرعىن ءۇي پايدالانۋعا بەرىلدى. بۇل وتكەن جىلدىڭ سايكەس كەزەڭىمەن سالىستىرعاندا 9,5 پايىزعا ارتىق. باعدارلامانىڭ جىلدىق جوسپارىنا وراي تۇرعىن ۇيلەردى پايدالانۋعا بەرۋ كولەمى 87 پايىزعا ورىندالدى. بارلىعى 69,9 مىڭ باسپانا سالىندى», دەپ اتاپ ءوتتى م.جايىمبەتوۆ.
قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسىنىڭ ايتۋىنشا, قازىر تۇرعىن ۇيلەردى پايدالانۋعا بەرۋ ەلىمىزدىڭ 15 وڭىرىندە قارقىندى جۇرگىزىلىپ كەلەدى. بۇلاردىڭ ىشىندە كوش باسىندا تۇرعان ماڭعىستاۋ (464,2 مىڭ شم), الماتى (387,3 مىڭ شم), قىزىلوردا (381,3 مىڭ شم) جانە اتىراۋ (373,6 مىڭ شم) وبلىستارى. اتالعان ايماقتار جەكە تۇرعىن ۇيلەردى پايدالانۋعا بەرۋ بويىنشا دا الدا كەلەدى.
«باعدارلامانىڭ ءبىرىنشى باعىتى بويىنشا بيىل اكىمدىكتەرگە 25 ملرد تەڭگە ءبولىندى. 20,4 ملرد تەڭگە اۋدارىلدى, 93,7 پايىز نەمەسە 19,1 ملرد تەڭگە يگەرىلدى. ناتيجەسىندە, 6 مىڭعا جۋىق پاتەردىڭ قۇرىلىسى باستالدى. ونىڭ جارتىسى بيىل تاپسىرىلاتىن بولادى. بۇل باعىت باسپانا ساتىپ الۋعا مۇمكىندىكتەرى جوق الەۋمەتتىك ءالسىز توپتاردى ارەندالىق باسپانامەن قامتاماسىز ەتۋگە ارنالعان. ولارعا مەملەكەت ارەندالىق پاتەر بەرەدى. بۇل ساتىپ الۋ قۇقىعىنسىز بەرىلەتىن تەگىن باسپانا. الەۋمەتتىك تۇرعىن ءۇيدىڭ تولەمى 1 شارشى مەترىنە شامامەن 100 تەڭگەدەن كەلەدى», دەدى كوميتەت توراعاسى.
ونىڭ سوزىنشە, ەكىنشى باعىت جەكە تۇرعىن ءۇي قۇرىلىسىن دامىتۋعا ارنالعان. بۇگىندە 60 مىڭ جەر ۋچاسكەسىنە جەلىلەر تارتىلىپ جاتىر. جالپى, جىل سايىن اتالعان جۇمىستاردى جۇرگىزۋ ءۇشىن 80 ملرد تەڭگە ءبولۋ كوزدەلگەن. بۇدان بولەك, قازىر ەلىمىزدىڭ 6 وبلىسىنىڭ ورتالىعىندا بىرىڭعاي ساۋلەت ستيلىندە 1975 جەكە ءۇيدىڭ قۇرىلىسى ءجۇرىپ جاتىر. جىل سوڭىنا دەيىن ونىڭ 362-ءسى قولدانىسقا بەرىلەدى دەپ كۇتىلۋدە (اقتوبە, قوستاناي, الماتى, سقو). سونداي-اق 10 ايدىڭ قورىتىندىسى بويىنشا جوسپارلانعان 15 مىڭ كرەديتتىك پاتەردىڭ 8770-ءى پايدالانۋعا بەرىلگەن.
قۇرىلىس سالۋشىلاردى تۇرعىن ءۇي سالۋعا ىنتالاندىرۋ جۇمىستارى دا بەلسەندى جۇرگىزىلۋدە. «نۇرلى جەر» باعدارلاماسى اياسىندا 152 ملرد تەڭگە سوماسىندا قۇرىلىس سالۋشىلارعا سۋبسيديالانعان كرەديت بەرۋ جانە 2018-2019 جىلدارى 600 مىڭ شم تۇرعىن ءۇيدىڭ قۇرىلىسىن قامتاماسىز ەتۋ جوسپارلانىپ وتىر.
«نۇرلى جەر» باعدارلاماسى ارقىلى قازىر وڭىرلەردە ەكىنشى دەڭگەيدەگى 5 بانك حالىققا جاڭا تۇرعىن ءۇي ساتىپ الۋعا جەڭىلدەتىلگەن يپوتەكا بەرۋدى جۇرگىزىپ جاتىر. بۇگىندە بانكتەر 7,9 ملرد تەڭگەنىڭ 797 ءوتىنىشىن قابىلدادى. ونىڭ ىشىندە 747 ءوتىنىش ماقۇلدانىپ,7,4 ملرد تەڭگەنىڭ كەلىسىمى جاسالعان.
راۋان قايدار,
«ەگەمەن قازاقستان»
