«مەملەكەت باسشىسىنىڭ تاپسىرماسىن ورىنداۋ ماقساتىندا, حالىقتىڭ ءال-اۋقاتىن جاقسارتۋ باعىتىندا ەكونوميكانىڭ بارلىق سالالارىندا جاقسى ناتيجەلەرگە قول جەتكىزدىك. اقمولا وبلىسىندا وڭىرگە ينۆەستيتسيا تارتۋ كولەمى ارتىپ, وتكەن 9 ايدا 175 ملرد تەڭگەنى قۇرادى. بۇل كورسەتكىش وتكەن جىلمەن سالىستىرعاندا 4,7 پايىزعا ارتىق. ەلباسىنىڭ اقمولا وبلىسىنىڭ الدىنا قويعان اۋىلشارۋاشىلىق ءوندىرىسىن عىلىمدى پايدالانۋ ارقىلى دامىتۋ, سونداي-اق اۋىلشارۋاشىلىق كووپەراتيۆتەرىن جانداندىرىپ, ەلدى مەكەندەردى وركەندەتۋ تاپسىرماسى بۇگىنگى كۇنى وبلىستا بەلسەندى جۇزەگە اسىرىلۋدا», دەدى مالىك مىرزالين.
ءوڭىر باسشىسى بيىلعى جىلى ايماق ديقاندارى 5,1 ملن توننا استىق جيناعانىن, جينالعان ىرىستىڭ 88 پايىزى جوعارى ساپالى ەكەنىن تىلگە تيەك ەتتى.
«وبلىستا مەملەكەتتىك قولداۋ العان اگروقۇرىلىمدار سانى ارتىپ ولاردىڭ سانى 40 پايىزعا ءوسىپ, ەليتالى داقىلدار سەبىلگەن القاپتار كولەمى 1,4 پايىزعا ۇلعايدى. بۇل تۇرعىدا ەگىستىك القاپتاردا اگروحيميا, مينەرالدى تىڭايتقىشتاردى پايدالانۋ جۇمىسى ءورىس الدى. مال شارۋاشىلىعىن دامىتۋدا دا وڭىردە جاقسى كورسەتكىشتەرگە قول جەتكىزىلدى. بيىل وبلىستا 3300 مال باسىنا ارنالعان 155 مال بورداقىلاۋ الاڭى اشىلدى. 11 تاۋارلى-ءسۇت فەرماسى قۇرىلىپ, 600 باس ءسۇت باعىتىنداعى ءىرى قارا ساتىپ الىندى. سونداي-اق استانا ىرگەسىندە 5 مىڭ باسقا ارنالعان ەشكى فەرماسى مەن تەرەڭ وڭدەۋگە باعىتتالعان ءسۇت فابريكاسى ىسكە قوسىلدى», دەدى ول.
مالىك ءمىرزاليننىڭ سوزىنشە وبلىستا ازىق-ت ۇلىك ءوندىرىسى بيىل 17 پايىزعا وسكەن. ونىڭ ىشىندە كۇنباعىس مايى 1,9 پايىزعا, ەت 35 پايىزعا, شۇجىق ونىمدەرى 24 پايىزعا, ۇن 22 پايىزعا ارتقان. سونىمەن قاتار ول وڭىردە 35 اۋىلشارۋاشىلىق كووپەراتيۆى قۇرىلىپ, قۇرىلعان كووپەراتيۆتەرگە 9 مىڭنان استام جەكە شارۋاشىلىقتاردىڭ باسى بىرىكتىرىلگەنىن باياندادى.
ايماق باسشىسى اقمولالىق كاسىپورىندار ەكسپو-2017 حالىقارالىق مامانداندىرىلعان كورمەسىن وندىرىستىك پروتسەستەردى ودان ءارى جەتىلدىرۋ ماقساتىندا 5 ۇزدىك الەمدىك تەحنولوگيانى ەنگىزۋدى كوزدەپ وتىرعانىن تىلگە تيەك ەتىپ, بۇل ورايدا جان-جاقتى جۇمىستار جۇرگىزىلىپ جاتقانىن جەتكىزدى.
«يندۋستريالاندىرۋ باعدارلاماسىنىڭ اياسىندا وبلىستا التىن ءوندىرۋ 4 ەسەگە ۇلعايىپ, رەسپۋبليكالىق كورسەتكىشتىڭ 34 پايىزىن قۇراپ وتىر. جۇك اۆتوموبيلدەرىن وندىرۋدە ەلىمىز بويىنشا وبلىس كورسەتكىشى – 55 پايىزدى, كىرپىش – 30 پايىزدى, ۇن 10 پايىزدى قۇرايدى. قازاقستاندىق ۋران كەنى قورىنىڭ 10 پايىزى بىزدە. وبلىس اۋماعىندا تمد ەلدەرى ىشىندەگى جالعىز تەمىر جول پودشيپنيگىن شىعاراتىن ءوندىرىس ورنى جۇمىس ىستەيدى. مۇندا ىشكى نارىقتان بولەك, ونىمدەردىڭ 80 پايىزى, ياعني باسىم بولىگى رەسەيگە ەكسپورتتالادى», دەپ اتاپ ءوتتى ءوڭىر باسشىسى.
ونىڭ مالىمەتىنشە, شاعىن جانە ورتا بيزنەستىڭ سانى وبلىستا 7 پايىزعا ارتىپ, شىعارىلاتىن ءونىم 20 پايىزعا, بيۋدجەتكە تۇسەتىن سالىق كولەمى 22 پايىزعا ارتقان. جانە دە اكىم «نۇرلى جەر» باعدارلاماسىن جۇزەگە اسىرۋ ماقساتىندا اتقارىلىپ جاتقان جۇمىستارعا دا توقتالىپ ءوتتى.
«باعدارلاما اياسىندا 404 مىڭ شارشى مەتر تۇرعىن ءۇي سالىنىپ, بۇل كورسەتكىش وتكەن جىلمەن سالىستىرعاندا 133 پايىزدى قۇرادى. مۇنىمەن قاتار جەكە تۇرعىن ءۇي سالۋ كولەمى 1,6 ەسەگە ءوستى. جەكە تۇرعىن ءۇي قۇرىلىسىن ودان ءارى جانداندىرۋ ءۇشىن ءوڭىردىڭ 14 ەلدى مەكەنىندە 7 مىڭ تۇرعىن ۇيگە ينجەنەرلىك كوممۋنيكاتسيالار تارتىلدى», دەدى م.مىرزالين.
ايماق باسشىسىنىڭ ايتۋىنشا, ەلباسىنىڭ تاپسىرماسىنا سايكەس وبلىستا الەۋمەتتىك سالانى دامىتۋعا باسا نازار اۋدارىلىپ كەلەدى.
«بيىلعى جىلى وڭىردە 8 جاڭا مەكتەپتىڭ قۇرىلىسى باستالدى. سونىمەن قاتار ءبىلىم بەرۋ نىساندارىنىڭ قۇرىلىسىنا جەكە ينۆەستورلار تارتىلۋدا. بۇگىنگى كۇنى تسەلينوگراد اۋدانىندا 2 مەكتەپ سالىنۋدا, قۇرىلىسى بىتكەن سوڭ بۇل نىساندار مەملەكەتتىك مەنشىككە بەرىلەدى. مەكتەپكە دەيىنگى ءبىلىم بەرۋمەن قامتۋدا 3-6 جاس ارالىعىنداعى بۇلدىرشىندەردى قامتۋ دەڭگەيى 98 پايىزعا جەتتى. ءوڭىردىڭ ساپالى جانە قولجەتىمدى مەديتسينا سالاسى دا ءجىتى نازارىمىزدا. بيىلدىڭ وزىندە وبلىسقا 214 مەديتسينا سالاسىنىڭ قىزمەتكەرى تارتىلدى. ولاردىڭ 91-ءى دارىگەر», دەدى م.مىرزالين.
سونىمەن قاتار ول «رۋحاني جاڭعىرۋ» باعدارلاماسى اياسىندا جىل باسىنان بەرى 4500 ءتۇرلى باعىتتاعى ءىس-شارا ۇيىمداستىرىلعانىن دا ايتىپ ءوتتى.
راۋان قايدار,
«ەگەمەن قازاقستان»
