كەزدەسۋدە ءسوز العان ءوڭىر باسشىسى بيىل وبلىسىمىزدا قازاقتىڭ تۇڭعىش حالىق ءارتىسى, كاسىبي رەجيسسەرى, دراماتۋرگ جۇمات ءشانيننىڭ 125 جىلدىعىنا وراي 30-عا جۋىق مادەني ءىس-شارالاردىڭ جوعارى دەڭگەيدە اتالىپ وتكەنىن جەتكىزدى.
«قازاق حالقىنىڭ تەاتر ونەرىن دامىتۋدا جۇمات شانين اتامىزدىڭ ەڭبەگى ۇشان تەڭىز. قازاقتىڭ ءبىرتۋما پەرزەنتى ۇلت تەاترىنىڭ نەگىزىن قالاپ, كاسىبي تۇرعىدا قالىپتاستىرىپ, ساحنالىق-شىعارماشىلىق جاعىنان ءوسۋ جولىندا زور ەڭبەك ءسىڭىردى. تەاتر تارلانىنىڭ 125 جىلدىعىنا وراي اعىمداعى جىلدىڭ باسىندا وبلىس اكىمدىگى تاراپىنان ءىس-شارالار جوسپارى ءتۇزىلىپ, ارنايى جۇمىسشى توپ قۇرىلعان بولاتىن. بيىلعى جىلدىڭ ءساۋىر ايىندا تۇركىستان مەن شىمكەنت قالاسىنىڭ تەاترلارىندا «تۇركىستان – تۇركى الەمىنىڭ مادەني استاناسى» جىلىنىڭ اياسىندا تۇركى الەمىنىڭ تەاترلار فەستيۆالى وتكىزىلدى», - دەدى جانسەيىت قانسەيىت ۇلى.
تەاتر تارلانىنىڭ 125 جىلدىعىنا وراي بيىل وبلىسىمىزدا «قازاق تەاترىنىڭ اتاسى», «تەاتر تارلانى», «تۇڭعىش رەجيسسەر, دراماتۋرگ, تەاتر قايراتكەرى», «تۇلپاردىڭ تۇياعى, اسىلدىڭ سىنىعى», «جارىق جۇلدىز – جۇمات شانين», «تەاتر جانە كورەرمەن» تاقىرىپتارىندا كورمەلەر, كەزدەسۋلەر وتكىزىلگەن بولاتىن. اتالعان ءىس-شارالاردا جۇمات ءشانيننىڭ ءومىر جولى, ەڭبەك جولى, ادام ومىرىندەگى تەاتردىڭ اتقاراتىن ءرولى جايىندا كەڭىنەن ناسيحاتتالدى. وسى ءىس-شارالارعا ەرەكشە قولداۋ بىلدىرگەن وبلىس اكىمىنە جۇمات ءشانيننىڭ نەمەرەلەرى شىن ريزاشىلىعىن ءبىلدىردى.
«بيىل وڭتۇستىك قازاقستان وبلىسىندا اتامىزدىڭ 125 جىلدىق مەرەيتويى جوعارى دەڭگەيدە اتالىپ وتۋدە. كوكتەمدە ءوزىڭىزدىڭ جەكە قابىلداۋىڭىزدا بولىپ, ءىس-شارالار جوسپارى تۋرالى اقىلداسقان بولاتىنبىز. مىنە, بىرنەشە ايدان سوڭ سول ايتىلعان, جوسپارلانعان دۇنيەلەردىڭ ىسكە اسىپ وتىرعانىن كورىپ وتىرمىز. وسى رەتتە اتامىزدىڭ مەرەيتويىن وتكىزۋگە اتسالىسىپ, ەرەكشە قولداۋ بىلدىرگەنىڭىز ءۇشىن رياسىز العىسىمىزدى بىلدىرەمىز», - دەدى رايحان قاسىمحانقىزى.
كەزدەسۋ سوڭىندا ءوڭىر باسشىسى جۇمات شانين اتامىزدىڭ نەمەرەلەرىنە ارنايى سىي-سياپات جاساپ, «تەاتر ءدانىن تامىرلاتقان تارلان» اتتى ەسكە الۋ كەشىنىڭ ءساتتى وتۋىنە تىلەكتەستىگىن ءبىلدىردى.
اتاپ ءوتۋ كەرەك, جۇمات شانين اتىنداعى قالا كوشەسىندە ۇلى تۇلعاعا ارنالعان مەموريالدى تاقتاسىنىڭ اشىلۋ سالتاناتى جانە تەاتر ساحناسىندا جۇمات ءشانيننىڭ 125 جىلدىق مەرەيتويىنا ارنالعان «تەاتر ءدانىن تامىرلاتقان تارلان» اتتى ەسكە الۋ كەشى وتەدى.
