وتكەن جىلدارى قازاقتىڭ ۇلتتىڭ تاعامى ەت اسۋدان شەبەرلىكتەرىن تانىتقان ەتنوس وكىلدەرى بيىل «رۋحاني جاڭعىرۋ» باعدارلاماسىنا قولداۋ ءبىلدىرىپ, قازاقتىڭ ۇمىت بولا باستاعان ۇلتتىق تاعامدارىن دايىنداۋدان ءوزارا سايىسقا ءتۇستى.
فەستيۆال اياسىندا توڭكەرمە, جورگەم, جوڭقا, كومبە, ۇلپەرشەك, بۇقپا, قارىن بورتپە, ميپالاۋ, قازان جاپپا, قۇرت كوجە سىندى قازاقتىڭ ۇلتتىق تاعامدارىن دايىنداعان وڭىرىمىزدەگى ەتنومادەني بىرلەستىكتەر ونىڭ تاريحى مەن ازىرلەۋ ءادىس-ءتاسىلىن ءىس-شارا قوناقتارى مەن قازىلار القاسىنا تانىستىردى.
«بۇگىنگى شارانى ۇيىمداستىرۋ ارقىلى ءبىز وڭىردەگى بارشا ەتنوستاردى قوعامدىق باستامالارعا ۇيىستىرۋ ارقىلى مەملەكەت قۇراۋشى قازاق حالقىنىڭ ماڭايىنا توپتاستىرۋدى, ۇلتىمىزدىڭ قوناقجايلىق ءداستۇرىن دارىپتەۋدى, رۋحاني قۇندىلىقتارىمىزدى جاڭعىرتۋدى كوزدەپ وتىرمىز,- دەدى وبلىستىق قازاقستان حالقى اسسامبلەياسى توراعاسىنىڭ ورىنباسارى ءمۇراتالى قالمۇراتوۆ
بەلگىلى جازۋشى, وبلىس əكىمى جانىنداعى «ىرىس الدى – ىنتىماق» قوعامدىق فورۋمىنىڭ حاتشىسى مارحابات بايعۇت, وقو قحا جانىنداعى عىلىمي-ساراپشىلىق توپتىڭ جەتەكشىسى, پ.ع.د., پروفەسسور اسما قالىبەكوۆا, №6 كوللەدجدىڭ جوعارى ساناتتى شەبەرى فاريدا تۇرعانبايقىزى سىندى ازاماتتاردان قۇرالعان قازىلار القاسى اسسامبلەيا مۇشەلەرى ازىرلەگەن قازاقتىڭ ۇلتتىق تاعامدارىن باعالادى.
قازىلار القاسىنىڭ شەشىمىمەن باس جۇلدەگە قارىن بورتپە تاعامىن ءدامدى ەتىپ دايىنداعان وبلىستىق گرۋزين ەتنومادەني بىرلەستىگى لايىقتى دەپ تابىلدى. ءى ورىندى تاجىك ەتنومادەني بىرلەستىگى, ءىى ورىندى كورەي ەتنومادەني بىرلەستىگى مەن ۇيعىر ەتنومادەني بىرلەستىگى يەلەندى. ال, ءىىى ورىن وبلىستىق پولياك, گرەك جانە نەمىس ەتنومادەني بىرلەستىكتەرىنە بۇيىردى. فەستيۆال اياسىندا ماقال-ماتەل ايتۋدان سايىسىپ, اسىق اتۋدان شەبەرلىكتەرىن كورسەتكەن ەتنوس وكىلدەرى دە ماراپاتتان تىس قالمادى.
ءىس-شاراعا قاتىسقان ءوڭىر تۇرعىندارى ەتنومادەني بىرلەستىكتەر جانىنداعى ونەر ۇجىمدارى دايىنداعان كونتسەرتتىك باعدارلامانى تاماشالاپ, ۇلتتىق تاعامدارىمىزدان ءدام تاتتى.
