كورنەكتى كومپوزيتور كوزى تىرىسىندە ۇلتتىق مۋزىكا ونەرىنىڭ دامۋىنا ولشەۋسىز ۇلەس قوستى. قازاققا اسا قادىرلى تەكتى اۋلەتتە دۇنيەگە كەلگەن ءدۇلدۇل ونەرپاز ارتىندا مول مادەني مۇرا قالدىردى. ءارتۇرلى جانردا ءونىمدى ەڭبەك ەتىپ, حالقىنىڭ قۇرمەتىنە بولەنەدى. سونداي-اق قۇرمانعازى اتىنداعى كونسەرۆاتوريانىڭ رەكتورى رەتىندە تالانتتى شاكىرتتەر تاربيەلەپ, قازاقستان كومپوزيتورلار وداعىن باسقاردى.
كەزىندە ماسكەۋدە روديون شەدرين, اندرەي ەشپاي, الەكساندرا پاحمۋتوۆا سەكىلدى اتاقتى سازگەرلەرمەن بىرگە وقىپ, بىتە قايناسقان ءبىرتۋار تۇلعانىڭ شالقار شابىتىنان تۋعان وپەرالار, بالەتتەر, سيمفونيالار, وراتوريالار, رومانستار, اندەر تالعامى جوعارى تىڭدارماننىڭ كوڭىلىنەن ويىپ ورىن العانى انىق.
وسى كەشتە ونىڭ بىرقاتار سۇبەلى شىعارمالارى ورىندالىپ, كوپشىلىكتىڭ قۇلاق قۇرىشىن قاندىردى.
– كونتسەرتتىك باعدارلاماعا, سونداي-اق الەمدىك كلاسسيكانىڭ جاۋھارلارى دا ەنگىزىلدى. بۇلاردىڭ بارلىعى عازيزا احمەتقىزى سىندى اياۋلى جاننىڭ رۋحىن اسقاقتاتۋعا ابدەن لايىق دۇنيەلەر ەكەنى تالاسسىز. جاستايىمىزدان جان-دۇنيەمىزدى اسەم اۋەندەرىمەن تەربەگەن ۇلى مۋزىكانتتىڭ قۇرمەتىنە ارنالعان كەرەمەت كەشتە ىشەكتى اسپاپتار كۆارتەتىنە ارناپ جازعان شىعارماسىن ەرەكشە قۇلشىنىسپەن ورىنداپ شىقتىق. بۇعان دەيىن ءبىرىنشى جانە ەكىنشى سكريپكادا ويناسام, بۇل جولى قولىما ءالتتى الۋعا تۋرا كەلدى, –دەدى قازاقستاننىڭ ەڭبەك سىڭىرگەن قايراتكەرى باعدات ءابىلحانوۆ.
كونتسەرتكە سونىمەن قاتار حالىقارالىق بايقاۋلاردىڭ لاۋرەاتتارى اتانعان سكريپكاشىلار ايسۇلۋ بايكەنوۆا مەن ەۆگەنيا قۇرماناەۆا جانە فورتەپيانوشى انار كامەلينوۆا قاتىسىپ, ساحنا ءسانىن كەلتىردى.
تالعات سادىق ۇلى
