«ەكسپو-2017 كورمەسىنىڭ بۇرىنعى اۋماعىنا كىرۋ – تەگىن. ال جەكەلەگەن پاۆيلوندار مەن «نۇر الەمگە» كىرۋ ءۇشىن بيلەت ساتىپ الۋ قاجەت. العاشقى ەكى كۇن بويى تۋريستىك ايماققا بيلەتسىز كىرۋگە بولادى. ودان كەيىنگى كىرۋ قۇنى 1500 تەڭگە كولەمىندە بەكىتىلدى. مۇندا جەڭىلدىك بيلەتتەرى دە قاراستىرىلعان. ماسەلەن, ستۋدەنتتەر 800 تەڭگەگە, كوپ بالالى انالار مەن زەينەتكەرلەر – 500 تەڭگەگە جانە مۇگەدەكتەر مەن ۇلى وتان سوعىسى ارداگەرلەرى, التى جاسقا دەيىنگى بالالار مەن جەتىم بالالار تەگىن كىرە الادى. بيلەتتەردى رەسمي سايتتان جانە ارنايى ساتۋ ورىندارىنان الۋعا بولادى», دەيدى «استانا ەكسپو-2017» ۇلتتىق كومپانياسى كونتەنت جانە ءىس-شارالاردى ۇيىمداستىرۋ دەپارتامەنتىنىڭ ديرەكتورى مارات وماروۆ.
تاعى ءبىر ماڭىزدى جاڭالىق, بيىلعى قىس ماۋسىمىندا ەكسپو اۋماعىندا ەرەكشە پىشىندەگى مۇز ايدىنى اشىلادى جانە وندا ەلىمىزدىڭ جاڭاجىلدىق باس شىرشاسى ورناتىلادى. «استانا ەكسپو-2017» ۇك» اق كوممەرتسيالاندىرۋ دەپارتامەنتىنىڭ ديرەكتورى داۋلەت ەركىمباەۆتىڭ مالىمەتىنشە, ارنايى ەلوردا تۇرعىندارى مەن قوناقتارى ءۇشىن 11 قاراشادا ەكسپو اۋماعىندا مۇز ايدىنى اشىلادى. «ونىڭ جالپى اۋماعى 3500 شارشى مەتردەن اسادى جانە ءپىشىنى دە ەرەكشە بولماق. بۇرىن-سوڭدى ەلىمىزدە مۇنداي مۇز ايدىنى سالىنباعان», دەيدى ول.
جەلتوقسان ايىنىڭ باسىندا ەكسپو اۋماعىنا ەلىمىزدىڭ جاڭاجىلدىق باس شىرشاسى ورناتىلادى جانە مۇز قالاشىعى بوي كوتەرەدى. «مۇنىڭ بارلىعى ەكسپو-نىڭ باس عيماراتى «نۇر الەم» سفەراسى مەن امفيتەاتر ارالىعىندا ورنالاستىرىلادى. باس شىرشامەن بىرگە جىل سايىنعى «حان شاتىر» ساۋدا جانە ويىن-ساۋىق ورتالىعى ماڭىنا سالىنىپ كەلگەن مۇز قالاشىق تا كورمە ماڭىنا كوشىرىلەدى. بارلىق جۇمىستار استانا اكىمدىگىمەن بىرلەسىپ اتقارىلۋدا», دەدى دەپارتامەنت باسشىسى.
مۇز قالاشىعىنىڭ ءبىر سەانسىنا 1000 تەڭگە تولەپ كىرۋگە بولادى جانە وندا 4 ساعات ۋاقىت وتكىزۋگە مۇمكىندىك بار. سونداي-اق مۇندا جاڭا كونكيلەردى جالعا بەرۋ ءىسى ۇيىمداستىرىلادى جانە ونىڭ دا باعاسى شامامەن 1000 تەڭگەنى قۇراماق. تاعى ءبىر اتاپ وتەرلىگى, كەشەنگە 6 جاسقا دەيىنگى بالالار ءۇشىن كىرۋ تەگىن. وقۋشىلار مەن زەينەتكەرلەرگە 50 پايىزدىق جەڭىلدىكتەر قاراستىرىلعان.
ەسىڭىزدە بولسا, قازاقستان پرەزيدەنتى نۇرسۇلتان نازارباەۆ ەكسپو-2017 حالىقارالىق مامانداندىرىلعان كورمەسىنىڭ جابىلۋ سالتاناتىندا «نۇر الەم» عيماراتى مەن تاقىرىپتىق پاۆيلونداردىڭ ەنەرگيا مۋزەيى رەتىندە ءوز جۇمىسىن جالعاستىراتىنىن مالىمدەگەن ەدى. كورمەگە دەيىن ەكسپو-2017 اۋماعىنداعى عيماراتتاردىڭ ءبىر بولىگىن «استانا» حالىقارالىق قارجى ورتالىعىنا, حالىقارالىق «جاسىل» تەحنولوگيالاردى دامۋ ورتالىعىنا جانە حالىقارالىق IT-ستارتاپتار تەحنوپاركىنە بەرۋ تۋرالى شەشىم قابىلدانعان بولاتىن.
اسحات رايقۇل,
«ەگەمەن قازاقستان»
