قازىر قانداي تەحنيكالىق ماماندىقتار قاجەت ەكەندىگى جالپى كاسىپكەرلىكتى دامىتۋعا جانە جۇمىسسىزدىقتىڭ الدىن الۋعا ارنالعان مەملەكەتتىك باعدارلامالار ارقىلى انىقتالۋدا. بۇگىندە گازبەن جانە ەلەكترمەن دانەكەرلەۋشىلەر مەن اۆتوەلەكتريكتەر اسا قاجەت. رەسپۋبليكالىق بيۋدجەتتەن وسى ماماندىقتارعا قايتا وقىتۋ ءۇشىن 300 ميلليون تەڭگە بولىنگەن. ماسەلەن, قالا تۇرعىنى اناتولي گۋبكوۆتىڭ ماماندىعى – قۇرىلىسشى. ول ءوز ماماندىعىنا ساي جۇمىس تابا الماي, ءۇش اي بويى اياعىنان تاۋسىلادى. ءسويتىپ قالا اكىمدىگىنە قاراستى ءبولىم ارقىلى قىسقا مەرزىمدى كۋرستا وقىپ شىعۋعا بولاتىندىعىن ەستيدى. مىنە, ول بىرنەشە اپتا بويى گاز ەلەكترمەن دانەكەرلەۋشى ماماندىعىن مەڭگەرۋدە.
– قۇرىلىس – ماۋسىمدىق جۇمىس. ءبىزدىڭ وڭىردە قىستا قۇرىلىس توقتاپ قالادى. سوندىقتان وسى وقىپ جاتقان ماماندىعىم ءتيىمدى دەپ ويلايمىن. ۇيرەتۋشىلەرىمىز وتە جاقسى. ستيپەنديا بەرەدى, – دەيدى ول.
جالپى, مەملەكەتتىك باعدارلاما اياسىندا قايتا وقىتۋ كۋرستارىنان 1500 ادام وتپەك. وقىتۋ كۋرستارى جىل سوڭىنا دەيىن اياقتالادى. قالاداعى 16 كوللەدج بويىنشا 33 ماماندىقتا وقۋعا مۇمكىندىك بار. قالاداعى جۇمىسپەن قامتۋ ورتالىعىنداعى كاسىبي وقىتۋ ءبولىمىنىڭ باستىعى ا.بۋراحانوۆانىڭ ايتۋىنشا, باعدارلاما بويىنشا وقيتىندار تەگىن ءبىلىم الادى. ايىنا 16759 تەڭگە ستيپەنديا بەرىلەدى. ال قالا سىرتىنان كەلۋشىلەر قوسىمشا پاتەراقىلارىنا تولەۋ ءۇشىن 11345 تەڭگە الادى.
– قازىر تجو-دا اۆتوەلەكتريك بولىپ جۇمىس ىستەيمىن, دەيدى جەنيا لىتكين, – جاڭا ماماندىعىم كوڭىلىمنەن شىقتى. تاعى دا ءبىلىمىمدى جەتىلدىرگىم كەلەدى.
جۇمىسپەن قامتۋ ورتالىعى جۇمىس بەرۋشىلەردىڭ دە تاپسىرىستارىن ىزدەپ وتىر. گاز ەلەكتر دانەكەرلەۋشى, اۆتوەلەكتريكتەردەن بولەك ەت ءبولۋشى كاسىبىن مەڭگەرگەندەرگە سۇرانىس بار. ەلباسى جولداۋىندا كاسىپتىك ءبىلىم بەرۋ باعىتتارىنا ەرەكشە توقتالعان. كاسىپتىك-تەحنيكالىق ءبىلىمدى جاستار جاقسى مەڭگەرۋ ءۇشىن «قازاقستان-2050» ستراتەگياسىندا: ء«بىزدىڭ جاستارىمىز وقۋعا, عىلىم-ءبىلىمدى يگەرۋگە, جاڭا ماشىقتار الۋعا, تەحنولوگيانى كۇندەلىكتى ومىردە شەبەر دە ءتيىمدى پايدالانۋى ءتيىس. ءبىز بۇل ءۇشىن بارلىق مۇمكىندىكتى جاساپ, ەڭ قولايلى جاعدايمەن قامتاماسىز ەتۋىمىز كەرەك. ءبىزدىڭ باستى ماقسات – 2050 جىلى مىقتى مەملەكەت, دامىعان ەكونوميكا جانە جالپىعا ورتاق ەڭبەكتىڭ نەگىزىندە بەرەكەلى قوعام قۇرۋ», دەگەن ەدى. حالىققا تەگىن كاسىپتىك-تەحنيكالىق ءبىلىم بەرۋ بۇگىندە نارىق سۇرانىسىنا ساي جۇرگىزىلۋدە.
راۋشان نۇعمانبەك,
جۋرناليست
سەمەي
