كومپانيا جەر قويناۋىن پايدالانۋ جونىندەگى كەلىسىمشارتتىڭ تالابىنا ساي, 2017 جىلى اتىراۋ وبلىسىنىڭ الەۋمەتتىك ينفراقۇرىلىمىن دامىتۋ جانە قازاقستاندىق مامانداردى وقىتۋ باعىتىنداعى ءوز مىندەتىن تولىقتاي ورىنداپ وتىر.
كومپانيا اۋداندارعا ۇيىمداستىرعان مەديا-تۋردىڭ ماقساتى دا ناتيجەسىن تاپقان جۇمىستاردى جۇرتشىلىققا كەڭىنەن جەتكىزۋ.
قىزىلقوعا اۋدانى
3 كۇنگە جوسپارلانعان مەديا-تۋردىڭ العاشقى كۇنى قىزىلقوعا اۋدانىنداعى ءىرى اۋىلداردىڭ ءبىرى – ساعىز سەلوسىنان باستالدى. «ەمبىمۇنايگاز» اق 7 650 حالىق تۇراتىن ساعىز سەلوسىنداعى 2 پاتەرلى 4 ءۇيدىڭ قۇرىلىسىنا قارجىلاي كومەك كورسەتتى. جاڭا باسپانالار الەۋمەتتىك جاعىنان از قامتىلعان وتباسىلارعا, كوپ بالالى وتباسىلارعا, مۇمكىندىگى شەكتەۋلى جاندارعا, سونىمەن قاتار ءۇي كەزەگىندە بىرنەشە جىل تۇرعان اۋىل تۇرعىندارىنا بەرىلدى. سولاردىڭ ءبىرى – 73 جاستاعى كەيۋانا ارۋ شەلتەۋوۆا بىلاي دەيدى:
– ۇلىم مەن كەلىنىم اياقاستىنان قايتىس بولدى. ارتىندا كامەلەت جاسقا تولماعان جەتى بالا قالدى. نەمەرەلەرىممەن بىرگە بىرنەشە جىل قاتارىنان ەسكى ۇيدە تۇردىق. وبلىستا قاتتى نوسەر جاۋىن بولعانىن بىلەسىزدەر, سول تولاستاماي جاۋعان جاۋىننان ەسكى باسپانامىز تۇرۋعا مۇلدەم جارامسىز بولىپ قالدى. جاراتقانىمىز تىلەگىمىزدى ەستىپ, مىنە, «ەمبىمۇنايگاز» ۇجىمى دەمەۋشىلىك ەتىپ وسىنداي سۋ جاڭا پاتەرگە قول جەتكىزدىك. ەمبىلىك مۇنايشىلارعا ءبىز سياقتى قاراپايىم ادامداردىڭ جاعدايىن ويلاپ, وسىنداي تاماشا پاتەر سالىپ بەرگەندەرى ءۇشىن مىڭ العىس!
وبلىس ورتالىعىنان شالعايدا ورنالاسقان تاسشاعىل اۋىلىن دا «ەمبىمۇنايگاز» اق نازاردان تىس قالدىرمادى.
بۇل اۋىلدا 100 ورىندىق «جازيرا» بوبەكجاي بالاباقشاسى سالىنعان. وسى اۋىلدىڭ بۇرىنعى بالاباقشاسى ەسكى, تار, نەبارى 13 ورىندىق بولعان ەكەن. جاڭا بالاباقشا تولىق جابدىقتالعان, ويىن جانە سپورت بولمەلەرى, جاتىن جانە اس ءۇي بولمەلەرىمەن قامتىلعان.
ال وسى بالاباقشانىڭ جاس مامانى, دەنە تاربيەسى نۇسقاۋشىسى بولىپ قىزمەت اتقاراتىن التىنبەك بەرىكباي ۇلى بالاباقشا اشىلعانعا دەيىن ۆاحتالىق ادىسپەن ماماندىعىنا ەش قاتىسى جوق قىزمەتتە بولعان. بالاباقشا اشىلعان سوڭ تۋعان اۋىلىندا ماماندىعى بويىنشا جۇمىس تاپقان.
اتا-انالار دا بالالارىنىڭ زامان تالابىنا ساي كەلەتىن بالاباقشادا تاربيەلەنىپ جاتقانىنا ءدان ريزا.
سونىمەن قاتار وسى اۋىلدا ەكى پاتەرلى ءبىر ءۇيدىڭ قۇرىلىسى جاقىندا اياقتالىپ, پايدالانۋعا بەرىلگەن. قازىر وسى ۇيلەردە تاربيەسىندە مۇگەدەك بالاسى بار وتباسى مەن جەرگىلىكتى ۋچاسكەلىك ينسپەكتور قونىستانعان.
ماقات اۋدانى
پرەسس-تۋردىڭ كەلەسى ايالداماسى ماقات اۋدانى دوسسور پوسەلكەسى بولدى. بۇل پوسەلكەگە «ەمبىمۇنايگاز» اق قاراجاتىنا 300 ورىندىق جاڭا مەكتەپ سالىندى. و.سارعۇنانوۆ اتىنداعى مەكتەپتىڭ بۇرىنعى عيماراتى 1964 جىلى سالىنىپ, بۇگىندە توزىعى جەتكەن. جاڭا مەكتەپتىڭ قۇرىلىسى تولىعىمەن اياقتالىپ, 2017 جىلدىڭ قاڭتار ايىندا پايدالانۋعا بەرىلگەن. تەك ورىس تىلىندە ءبىلىم بەرەتىن مەكتەپ جاڭا زامانعى قۇرىلعىلارمەن, ينتەراكتيۆتى تاقتالى سىنىپتارمەن, كەڭ اكت زالىمەن قاتار ءتۇرلى ءپان جانە ۇيىرمە سىنىپتارىمەن جابدىقتالعان. سونىمەن قاتار مەكتەپالدى دايارلىق توبى دا جۇمىس ىستەيدى.
يساتاي اۋدانى
يساتاي اۋدانىنىڭ بىرنەشە ەلدى مەكەندەرىندەگى الەۋمەتتىك قۇرىلىستارعا كومپانيا دەمەۋشىلىك ەتىپ كەلەدى. تۇششىقۇدىق اۋىلىنداعى «ق ۇلىنشاق» بالالار باقشاسىنا قوسىمشا 50 ورىندى جاپسارجاي (پريسترويكا) سالىندى. بۇل جاپسارجايدىڭ ارقاسىندا بالالارعا جاڭادان جاتىن بولمەلەر مەن ويىنجايلار بەرىلىپ, اتىراۋ وبلىسىندا تەڭدەسى جوق مونتەسسوري سىنىبى اشىلعان. بۇل سىنىپتىڭ ەرەكشەلىگى – ءتىل مۇكىستىگى بار بالالارعا ساۋساق ۇشى جاتتىعۋلارى مەن ويىندارى ارقىلى ءتىل مۇكىستىگىن جويۋعا مۇمكىندىك بەرەدى.
سوڭعى ايالداما جانباي سەلوسى بولدى. بۇل سەلوداعى 200 ورىندىق مادەنيەت ءۇي كومپانيانىڭ قاراجاتىنا سالىنعان. ەكى قاتارلى اسەم عيماراتتا دەمالىس كۇندەرى بالالارعا مۋلتفيلمدەر مەن كوركەم فيلمدەر كورسەتىلسە, ساباقتان تىس ۋاقىتتا ءتۇرلى ۇيىرمەلەر جۇمىس ىستەيدى. مادەنيەت ءۇيى باسشىلىعىنىڭ ايتۋىنشا, بولاشاقتا وزگە ۇيىرمەلەر, سپورت سەكتسيالارى مەن اجەلەر ءانسامبلىن قۇرۋ جوسپاردا بار ەكەن.
«ەمبىمۇنايگازدىڭ» يگى ىستەرى جالعاسىن تاپپاق
كومپانيا اق رەتىندە قۇرىلعان 2012 جىلدان بۇگىنگى كۇنگە دەيىن اتىراۋ وبلىسىنىڭ ينفراقۇرىلىمىن دامىتۋعا شامامەن 2,3 ملرد تەڭگە, رەسپۋبليكالىق جانە جەرگىلىكتى بيۋدجەتكە سالىق ەسەبىندە 654 ملرد تەڭگە جانە دەمەۋشىلىك پەن قايىرىمدىلىق رەتىندە 2 ملرد قاراجات ءبولدى, دەدى باق وكىلدەرىنە ۇيىمداستىرعان ۇشكۇندىك پرەسس-تۋر اياسىندا باسقارما توراعاسىنىڭ ەكونوميكا جانە قارجى جونىندەگى ورىنباسارى رىستى تاسماعامبەتوۆا.
كومپانيا مۇنايلى وڭىرلەردىڭ ينفراقۇرىلىمىنىڭ دامۋىنا ۇلەس قوسۋمەن قاتار, كەلىسىمشارت مىندەتتەمەلەرىنە سايكەس قازاقستاندىق مامانداردى قايتا دايارلاۋعا جانە قازاقستاندىق ستۋدەنتتەردىڭ جوعارى جانە ارناۋلى ورتا وقۋ ورىندارىندا ءبىلىم الۋلارىنا قاراجات ءبولىپ وتىر.
قازاقستاندىق ستۋدەنتتەردى دايىنداۋ باعدارلاماسى:
- ستۋدەنتتەردىڭ وقۋ اقىسىن تولەۋ;
- دۋالدى وقۋ باعدارلاماسى;
- ستيپەنديا تولەۋ باعدارلاماسى;
- ستۋدەنتتەردىڭ وندىرىستىك پراكتيكادان ءوتۋى باعىتتارى بويىنشا جۇزەگە اسۋدا.
ستۋدەنتتەردىڭ وقۋ اقىسىن تولەۋ باعدارلاماسى بويىنشا سوڭعى 4 جىلدا 780 ستۋدەنتتىڭ وقۋ اقىسى تولەندى.
بۇل ورايدا ەسكەرەتىنىمىز, ستۋدەنتتەر قاتارىنىڭ ازايا ءتۇسۋى وقۋ اقىسىنىڭ جىل ساناپ وسۋىنە بايلانىستى تۇسىندىرىلەدى.
دۋالدى وقۋ باعدارلاماسى بويىنشا اتىراۋ مۇناي-گاز ۋنيۆەرسيتەتىمەن جانە APEC Petrotechnic جوعارى كوللەدجىمەن ارىپتەستىك بايلانىس ورناتىلعان. اتالمىش وقۋ ورىندارىنىڭ 69 ستۋدەنتى باعدارلاماعا قاتىستى.
ستيپەنديا تولەۋ باعدارلاماسى بويىنشا APEC Petrotechnic جوعارى كوللەدجىنىڭ 5 ستۋدەنتى باعدارلاماعا قاتىستى.
ستۋدەنتتەردىڭ وندىرىستىك پراكتيكادان ءوتۋ باعدارلاماسى بويىنشا قازاقستاندىق 2 جوعارى وقۋ ورنىمەن جانە 5 كوللەدجبەن بايلانىس ورناتىلعان.
2014 جىلدان بەرى 748 ستۋدەنت ەمبى كەن الاڭدارىندا وندىرىستىك تاجىريبەدەن ءوتتى.
2016 جىلى «ەمبىمۇنايگاز» اق تاراپىنان ۇلكەن كومەككە يە بولعانداردىڭ ءبىرى اتىراۋ مۇناي جانە گاز ۋنيۆەرسيتەتىنىڭ ستۋدەنتى نۇربەك ساكەمباي بىلاي دەيدى:
– قازىرگى تاڭدا «اۆتوماتتاندىرۋ جانە باسقارۋ» ماماندىعىنىڭ 3-كۋرس ستۋدەنتىمىن. ۇيىمىزدە مۇنايشى بولماسا دا «ەمبىمۇنايگاز» اق وقۋ اقىمدى تولەپ بەردى. بۇل مەن ءۇشىن ۇلكەن قۋانىش بولسا, وتباسىم ءۇشىن ۇلكەن كومەك.
فارحات ءابىلوۆ
