دانەليا داۋسىنىڭ ەرەكشەلىگىمەن بۇعان دەيىن دە 2015 جىلى «ايالاعان استانا» ۇلتتىق ىرىكتەۋ سىنىندا باس جۇلدەنى جەڭىپ الىپ, حالىقارالىق «جاڭا تولقىن» بالالار بايقاۋىنا جولداما العان بولاتىن. سول جولى قازاقستان اتىنان ءان شىرقاعان كىشكەنتاي ءانشى حالىقارالىق تەلەۆيزيالىق بايقاۋدا «كورەرمەن كوزايىمى» جۇلدەسىمەن ورالعانى ەستە.
ەلدىڭ نازارىنا ەكى جىل بۇرىن ىلىككەن دانەليا سەگىز جاسىندا يگور كرۋتوي, فيليپپ كيركوروۆ, سەرگەي لازەرەۆ سىندى قازىلار القاسىنىڭ قوشەمەتىنە بولەنىپ, ايگىلى انشىلەردىڭ ارقايسىسى وعان 11 ۇپايدان باعا بەرىپ, مىرزالىق تانىتقان بولاتىن.
ەندى بيىل 10 جاسقا تولعان تولەشوۆاعا «گولوس. دiتي» شوۋىنىڭ ءانشىنى كورمەي باعالاۋ كەزەڭىندە قازىلار القاسىنىڭ بارلىق مۇشەسى بىردەي بۇرىلۋعا ساناۋلى سەكۋندتار عانا جەتكىلىكتى بولدى. ون جاستاعى تولەشوۆا 10 سەكۋندتا تورەشىلەردى وزىنە قاراتتى.
ورايى كەلىپ تۇرعاندا, ۋكراينالىق شوۋدىڭ ءتورتىنشى ماۋسىمىنا ديما موناتيك, «ۆرەميا ي ستەكلو» توبى مەن ناتاليا موگيلەۆسكايا سىندى تانىمال انشىلەر تالىمگەر بولعانىن ايتا كەتەلىك. بايقاۋدىڭ الدىڭعى كەزەڭدەرىنەن ءساتتى وتكەن قازاقستاندىق بالاقاي بايقاۋدىڭ «سوقىر تىڭداۋ» تۋرىندا دەمي لوۆاتونىڭ «Stone Cold» ءانىن ورىندادى. بايقاۋ تورەشىلەرىن ءاننىڭ العاشقى نوتالارىمەن-اق باۋراپ العان بالدىرعاننىڭ ورىنداۋىنداعى بۇل ءاننىڭ كومپوزيتسياسى ەرەسەك مۋزىكانتتاردىڭ وزىنە باعىنا بەرمەيتىن كۇردەلىلىگى بار.
دانەليانىڭ داۋسىنىڭ تۇنىقتىعىنا ءتانتى بولعان ناتاليا موگيلەۆسكايا «گولوس. دiتي» بايقاۋىندا بۇرىن-سوڭدى بۇل ءاندى وسىنشالىقتى شەبەرلىكپەن ورىنداعان بالدىرعاننىڭ بولماعاندىعىن اتادى. جارىستا قازىلار القاسىنىڭ مۇشەلەرى تۇگەل دانەلياعا تالىمگەر بولۋعا ىقىلاس تانىتسا-داعى, تالانتتى جەرلەسىمىز ديما موناتيكتىڭ كومانداسىندا ءارى قارايعى انشىلىك باعىن سىناۋعا شەشىم قابىلدادى.
وسىلايشا ون جاستاعى الماتىلىق بالعىن ۋكراينالىق شوۋدىڭ جۇلدىزىنا اينالىپ تۇر.
ايناش ەسالي,
«ەگەمەن قازاقستان»
الماتى
