كەزدەسۋ بارىسىندا قازاقستانداعى ەۆرەي قاۋىمىنىڭ قىزمەتى, زاماناۋي سىن-قاتەرلەرگە قارسى كۇرەستەگى بىرلەسكەن ءىس-ارەكەت جانە دىنارالىق كەلىسىمنىڭ قازاقستاندىق مودەلى ماسەلەلەرى تالقىلاندى.
مەملەكەتتىك حاتشى امەريكادان كەلگەن مەيمانداردىڭ جۇمىسىنا ساتتىلىك تىلەي وتىرىپ, اقش-تىڭ ەلىمىز ءۇشىن ماڭىزدى ستراتەگيالىق سەرىكتەسىنىڭ ءبىرى ەكەنىن اتاپ ءوتتى. سونداي-اق, ەكى ەل اراسىنداعى ديپلوماتيالىق قارىم-قاتىناستىڭ ورناۋىنا 25 جىل تولۋىنا وراي ۇيىمداستىرىلعان بىرقاتار شارالاردىڭ جەمىستى بولعانىن جەتكىزدى.
«قازاقستان پرەزيدەنتى نۇرسۇلتان نازارباەۆ پەن اقش باسشىسى دونالد ترامپ ءتۇرلى الاڭداردا بىرنەشە مارتە كەزدەسىپ, بىرقاتار ماسەلەلەردى تالقىلادى. وسى ورايدا, ءبىز دە ارىپتەستىك بايلانىستى ودان ءارى نىعايتىپ, اق ءۇي اكىمشىلىگىمەن قارىم-قاتىناسىمىزدى ودان ءارى بەرىك ەتە تۇسەمىز دەپ سەنەمىن», دەدى گ.ابدىقالىقوۆا.
مەملەكەتتىك حاتشى الىستان كەلگەن مەيماندارعا ەلباسىنىڭ باستامالارى جونىندە كەڭىنەن اڭگىمەلەپ بەردى. گ.ابدىقالىقوۆا قوعامدىق سانانى وركەندەتۋگە باعىتتالعان «رۋحاني جاڭعىرۋ» باعدارلاماسى جونىندە ءسوز قوزعادى. ول جاڭعىرۋدىڭ باستى تالابى ءتول مادەنيەت پەن ۇلتتىق كودتى ساقتاۋ ەكەنىنە نازار اۋداردى. بۇدان بولەك, ەلىمىزدىڭ اتا زاڭىنا ەنگىزىلگەن وزگەرىستەر مەن دەموكراتياعا باعىتتالعان باتىل قادامدارمەن تانىستىردى.
«قازاقستان 2050 جىلعا قاراي دامىعان 30 مەملەكەت قاتارىنا قوسىلۋ ماقساتىن العا قويىپ وتىر. بيىل مەملەكەت باسشىسىنىڭ باستاماسىمەن ەكونوميكالىق ءوسىمنىڭ جاڭا مودەلىن قالىپتاستىرۋعا باعىتتالعان ءۇشىنشى جاڭعىرۋ باستالدى. ونىڭ باستاپقى ناتيجەلەرى ەكونوميكانىڭ قالپىنا كەلۋى نىعايعانىن كورسەتەدى. بيىل ەلىمىزدىڭ جالپى ىشكى ءونىمى 3,5 پايىزعا دەيىن ءوستى», دەدى مەملەكەتتىك حاتشى.
سونداي-اق, گ.ابدىقالىقوۆا ەلىمىزدە 100-دەن اسا ەتنوستىڭ تاتۋ-ءتاتتى ءومىر ءسۇرىپ جاتقانىن, وسىعان سايكەس قازاقستان حالقى اسسامبلەياسىنىڭ جەمىستى جۇمىس جاساپ كەلە جاتقانىن اتاپ كورسەتتى. ونىڭ ايتۋىنشا, قوعامدىق كەلىسىم مەن جالپىۇلتتىق بىرلىكتىڭ قازاقستاندىق مودەلى الەمگە ۇلگى بولادى.
سوڭعى حالىق ساناعى بويىنشا, رەسپۋبليكادا ءۇش مىڭنان استام ەۆرەي ۇلتى وكىلى ءومىر سۇرەدى. 1992 جىلدان بەرى 20 ەتنومادەني بىرلەستىكتى, بىرقاتار ەۆرەي ۇلتتىق ۇيىمدارىن قامتيتىن «ميتسۆا» قاۋىمداستىعى جۇمىس ىستەپ كەلەدى. گ.ابدىقالىقوۆا قازاقستاندا تۇراتىن ەۆرەيلەردىڭ بەيبىتشىلىك پەن كەلىسىمدە ءومىر سۇرەتىنىن مالىمدەدى.
وسى ورايدا, ەۋرازياداعى ەۆرەي قاۋىمىن قولداۋ ۇلتتىق كواليتسياسىنىڭ توراعاسى د.رۋبين ەلىمىزدە وزگە ۇلت وكىلدەرىنە جاسالعان جاعدايدى جوعارى باعالاپ, قازاقستاندىق مودەل الەمنىڭ كوپتەگەن مەملەكەتتەرنە ۇلگى بولاتىنىن اتاپ ءوتتى. مۇنداي پىكىردى ۇيىمنىڭ ۆيتسە-پرەزيدەنتى مارك لەۆين دە ايتادى.
«قازىرگى تاڭدا قازاقستاندا كوپتەگەن ۇلتتار بەيبىت, تاتۋ-ءتاتتى, قۋدالاۋ مەن كەمسىتۋ كورمەي ءومىر ءسۇرىپ كەلەدى. مۇنىڭ ءبارى پرەزيدەنت نۇرسۇلتان نازارباەۆ پەن قازاقستان حالقىنىڭ ارقاسى. قازاقستان – انتيسەميتيزمنەن ادا الەمدەگى ساناۋلى ەلدىڭ ءبىرى», دەدى م.لەۆين.
اباي اسانكەلدى ۇلى,
«ەگەمەن قازاقستان»
