نيۋ-يوركتەگى تەراكت: قىسقا ءارى ناقتى تۇسىندىرمە

وقيعا قالاي ءوربىدى؟

Home Depot كومپانياسىنان 50 اقش دوللارىنا شاعىن جۇك كولىگىن جالعا العان جۇرگىزۋشى جەرگىلىكتى ۋاقىت بويىنشا ساعات 15:15-تە (استانا ۋاقىتى بويىنشا 01:15) نيۋ-يوركتەگى مانحەتتەننىڭ ورتالىعىندا جاياۋ جۇرگىنشىلەرگە قارسى شابۋىل ۇيىمداستىردى. ول ۋەست-ستريت اۋدانىندا ورنالاسقان ۆەلوسيپەد جولىنا شىعىپ, الدىنا كەزىككەن بارلىق دۇنيەنى قيراتىپ, 17 ورام ءجۇرىپ وتكەن. كولىك مەكتەپ اۆتوبۋسىمەن سوعىسقاننان كەيىن عانا توقتاعان. كاۋگەرلەر سوزىنە سەنسەك, توقتاي سالىسىمەن, ول «اللاحۋ اكبار» دەپ ايقايلاپ, قارۋ الىپ, قاشپاق بولعان. سول مەزەتتە پوليتسيا قىزمەتكەرلەرى ونى جارالاعان. بەلگىلى بولعانداي, كۇدىكتى قولىنداعى قارۋلاردىڭ ءبىرى پەينتبول ويىنىنا ارنالعان بولسا, ەكىنشىسى پنەۆماتيكالىق تاپانشا ەدى. ناتيجەسىندە سەگىز ادام اجال قۇشىپ, ون ءبىر ادام ءارتۇرلى جاراقاتتارمەن اۋرۋحاناعا ءتۇستى.

Global Look Press

قۇربان بولعان كىمدەر؟

سوڭعى دەرەكتەرگە سۇيەنسەك, كوز جۇمعان سەگىز ادامنىڭ بەسەۋى ارگەنتينا, ال بىرەۋى بەلگيا ازاماتى. ال, ەلىمىزدىڭ سىرتقى ىستەر مينيسترلىگىنىڭ ءباسپاسوز حاتشىسى ءانۋار جايناقوۆ بۇل لاڭكەستىك وقيعادان قازاقستان ازاماتتارى زارداپ شەكپەگەنىن ايتتى.

كۇدىكتى كىم؟

الەمدىك باق-تا ايتىلعانداي, كۇدىكتىنىڭ ەسىمى - سايفۋللو سايپوۆ. 29 جاستاعى وزبەكستان ازاماتى 2010 جىلى اقش-قا گرين-كارتا ارقىلى كەلىپ, باسىندا وگايو, نيۋ-دجەرسي, پاتەرسون قالالارىندا تۇرسا, سوڭعى ۋاقىتتارى فلوريدا شتاتىنىڭ تامپا قالاسىندا تۇراقتاعان. ۇيلەنگەن. جۇبايى جانە كىشكەنتاي ەكى ءسابيى بار. اقش-تا Uber كومپانياسىندا كولىك جۇرگىزۋشىسى بولىپ قىزمەت اتقارىپ كەلگەن. بۇل اقپاراتتى كومپانيا وكىلدەرى راستاپ وتىر.

بيلىك وكىلدەرىنىڭ ارەكەتى قانداي بولدى؟

قۇزىرلى ورگاندار كوپ ۋاقىت وتپەي وقيعانى لاڭكەستىك ارەكەت دەپ رەسمي تۇردە حابارلادى. قالا مەرى بيللا دە بلازيو بەيبىت حالىقتىڭ ءومىرىن جالماعان بۇل ارەكەتتى لاڭكەستىكتىڭ ەڭ ز ۇلىم ءتۇرى دەپ اتادى. ال, ەل پرەزيدەنتى دونالد ترامپ اقىل ەسى دۇرىس ەمەس ادامنىڭ ارەكەتى ەكەندىگىن اتاپ كورسەتتى.

وقيعادان كەيىن اقش پرەزيدەنتى شەكارالىق باقىلاۋدى كۇشەيتۋ تۋرالى وكىم شىعاردى. نيۋ-يورك شتاتىنىڭ گۋبەرناتورى ەندريۋ كۋومو كۇدىكتىنىڭ كومەكشىلەرى جوق دەگەن ويىن ايتتى.  

ازىرگە بىردە-ءبىر لاڭكەستىك توپ قىلمىستى ءوز موينىنا العان جوق.

AP Photo / Bebeto Matthews

ەۋروپاداعى لاڭكەستىك وقيعالارمەن قانداي ۇقساستىق بار؟

سوڭعى جىلدارى دامىعان تەرروريستىك اكتىلەر جارىلعىش زاتتاردىڭ كومەگىمەن ەمەس, قولدا بار باسقا قۇرالدارمەن جاساۋدا. ناقتىراق ايتقاندا, لاڭكەستەر جۇك كولىگىنە ءمىنىپ, ادامدار كوپ شوعىرلانعان جەرگە بارىپ, بەيبىت تۇرعىنداردى تاپتاۋدى شىعاردى. لاڭكەستىك شابۋىلدىڭ بۇل ءتۇرى انگليا, فرانتسيا, گەرمانيا سىندى ەۋروپا ەلدەرىندە بىرنەشە رەت قايتالانىپ, العاش اقش-تا بولىپ وتىر.

ءبىر ايتا كەتەرلىگى, قازان ايىنىڭ ورتاسىندا اقش-تىڭ ۇلتتىق قاۋىپسىزدىك ءمينيسترى قىزمەتىن اتقارۋشى ەلەين ديۋك قاندى لاڭكەستىك ارەكەتتەر بولۋى مۇمكىن ەكەنىن بولجاعان ەدى.

جاسۇلان ايازباەۆ