سەبەبىن سۇراساڭ, ولار ءارتۇرلى سىلتاۋلاردى العا تارتادى. بىرىنە ەلەكتر ەنەرگياسى, ەكىنشىسىنە جانار-جاعارماي باعاسىنىڭ تۇراقسىزدىعى «كىنالى» ەكەن. تۇتىنۋشىلاردى ول جونىندە الدىن الا حاباردار ەتىپ جاتقان تاعى ەشكىم جوق.
ايتەۋىر تۇسىنىكسىز ءبىر جاعداي, تۇبىنە جەتىپ بولمايسىڭ.
تاياۋدا ءبىر تانىسىمىزبەن جولىعىپ قالدىق. پايدالانعان ەلەكتر ەنەرگياسىنا تولەم جاساپ كەلە جاتقان بەتى كورىنەدى. جۇزىنەن اشۋدىڭ تابىن بايقاپ, سابىرعا شاقىرىپ, ءىستىڭ ءمان جايىن بىلمەك بولىپ, اڭگىمەگە تارتتىق.
– اي سايىن ءتيىستى مەكەمەگە بارىپ, پايدالانعان ەلەكتر قۋاتىنىڭ اقىسىن تولەپ تۇرامىن. بۇگىن بارعانىمدا قىزمەتشى قىز پايدالانعان ەلەكتر قۋاتىنا قوسىمشا تاعى دا 70 تەڭگە تولەۋىم كەرەك ەكەنىن ەسكەرتتى. «نە ءۇشىن؟» دەسەم, «كورسەتكەن قىزمەت ءۇشىن» دەيدى. سوندا قالاي, ول بىزگە كورسەتكەن قىزمەتى ءۇشىن اي سايىن تۇراقتى ەڭبەكاقى الىپ وتىرعان جوق پا؟ مۇلدە ميعا سىيىمسىز جايت. اركىم سوندا ءوزىنىڭ ويىنا كەلگەنىن ىستەي بەرە مە؟ نەگە ءبىزدى ءتيىستى ورىندار الدىن الا سەبەبىن ايتىپ, حاباردار ەتپەيدى؟ ورىندى ءىس بولسا, جاعدايدى ءبىز دە تۇسىنەمىز عوي.
مەنىڭشە, ءبارىن «وسىلاي ەكەن» دەپ نارىققا جابا بەرۋدى قويعان ءجون ءتارىزدى. ايتالىق, ءومىر ءسۇرىپ جاتقان اۋدان بويىنشا 60 مىڭنان استام حالىقتىڭ كۇندەلىكتى ومىردە ەلەكتر قۋاتىن تۇراقتى پايدالاناتىنى بەلگىلى جايت. وسىنداعى 10 مىڭنىڭ ۇستىندەگى تۇرعىن ۇيدە 11 مىڭنان استام وتباسى جوعارىدا ءبىز ايتقان ەلەكتر قۋاتىن تۇتىنادى ەكەن. سوندا ءار تۇتىنۋشىدان 70 تەڭگەدەن العاننىڭ وزىندە, اي سايىن قانشا قارجىنىڭ مەكەمە كاسساسىنا تۇسەتىنىن ءوزىڭىز ەسەپتەي بەرىڭىز.
بىرەۋدىڭ قالتاسىنداعى قارجىنى ساناۋدان اۋلاقپىز. الايدا, بەس ساۋساقتىڭ بىردەي ەمەستىگى سەكىلدى, تۇتىنۋشىلاردىڭ ءبارى بىردەي تولەم تولەۋگە قابىلەتتى ەمەس ەكەندىگىن دە ەسكەرۋىمىز كەرەك ەمەس پە؟
مەنىكى دۇرىس ەكەن دەپ, ءوزىم بىلەرمەندىككە سالىنىپ, زاڭدى, زاڭسىز بۇيرەكتەن سيراق شىعارا بەرۋ دە ءجون ەمەس-اۋ...
ءبىر مەزگىل حالىقتىڭ جاعدايىنا قاراعانعا دا نە جەتسىن؟!
كارىباي امزە ۇلى,
زەينەتكەر
وڭتۇستىك قازاقستان وبلىسى,
سوزاق اۋدانى
