وسى ورايدا ءبىزدىڭ ارىپتەسىمىز نازگ ۇلىم يلياسوۆانىڭ كەمبريدج باعدارلاماسىنىڭ ءى دەڭگەيىمەن سەرتيفيكاتتالىپ, 2014-2015 وقۋ جىلىندا جاڭا باعدارلامانى, اقپاراتتىق تەحنولوگيانى ءوزى عانا قولدانىپ قويماي, ءوزى جۇمىس اتقاراتىن «باباي-قورعان» جالپى ورتا مەكتەبى مۇعالىمدەرىنىڭ جاڭا كوزقاراس, سەرپىنمەن, ىزدەنىسپەن جۇمىس ىستەۋلەرىنە ۇلكەن قوزعاۋ سالىپ, ۇنەمى ىزدەنىستە جۇرەتىن ەڭبەكقورلىعىن ايتقىم كەلەدى. قانداي ءىستى دە جاڭادان باستاۋ وڭاي ەمەس.
مەكتەبىمىزدە ءى دەڭگەيمەن سەرتيفيكاتتالعان مۇعالىم باستاۋىش سىنىپ, ءوزىن-ءوزى تانۋ پانىنەن نازگ ۇلىم يلياسوۆا عانا. وقۋ ءىسىنىڭ مەڭگەرۋشىسى روزا عايبۋللاەۆانىڭ ۇسىنىسىمەن قۇرىلعان شىعارماشىل ەكى توپ ەكى اۋىسىمدا نازگ ۇلىمنىڭ ءار اپتاداعى دۇيسەنبى, جۇما كۇندەرى وتەتىن كوۋچينگ ساباقتارىن اسىعا كۇتەدى. ءىس-تاجىريبەلەرىن ورتاعا سالادى. كەمبريدجدىك ءادىستى دۇرىس تۇسىنبەگەندەر وقۋشىلاردى ەكى توپقا ءبولىپ, تاپسىرمانى بەرىپ, ءوزىڭىز قاراپ وتىراتىن «وڭاي ساباق» دەپ تۇسىنەدى. نازگ ۇلىم مۇعالىمدەردى وسىنداي قاتەلىكتەن ساقتاندىرىپ, ۇستازدىڭ ارقاشان شىعارماشىل ىزدەنىستە جۇرۋىنە, وقىتۋ ءۇشىن نەنى قالاي وقۋ كەرەكتىگىنە جالىقپاي, باعىت-باعدار بەرىپ ءجۇر.
جاڭا فورماتسيا مۇعالىمى ءسوزىن ىسىمەن دالەلدەپ, وقۋشىلاردى عىلىمي جۇمىستارمەن شۇعىلداندىرۋدا جاقسى تابىسقا جەتىپ كەلەدى. «وقۋشىلاردىڭ فۋنكتسيونالدىعىن دامىتۋ جولدارى» تاقىرىبىنداعى كوۋچينگ-سەسسيالارى مۇعالىمدەردىڭ قىزىعۋشىلىعىن تۋدىردى. نازگ ۇلىم مەكتەپتەگى ءىس-شارالاردىڭ ءسانىن كىرگىزەتىن بيشىلەر توبىنىڭ دا جەتەكشىسى. ونىڭ «جاۋقازىن» بي توبى قالالىق سايىستاردىڭ باس جۇلدەسىن ەشكىمگە بەرمەي كەلەدى. ول تەك مەكتەپتىڭ عانا ەمەس, وتباسىنىڭ دا جىلۋىن ساقتاپ وتىرعان ادال كەلىن, اسىل جار.
جاڭاشىل ۇستازدىڭ تاجىريبەلەرىن وي ەلەگىنەن وتكىزىپ وتىرىپ, ويشىل پلۋتارحتىڭ «كوپتەگەن تابيعي كەرەمەت تالانت دارىنسىز ۇستازداردىڭ كەسىرىنەن جويىلىپ كەتەدى. ولار دارىننىڭ تابيعي قۇبىلىسىنا تەرەڭ بويلاي الماي, تۇلپاردى ەسەككە اينالدىرىپ قۇرتىپ تىنادى», دەگەن ءسوزى ەسكە تۇسەدى. وسىندايدا نازگ ۇلىمدەي ىزدەنىمپاز مۇعالىمدەر كوپ بولسا ەكەن دەپ ويلايسىڭ.
ء«داستۇرلى ساباقتىڭ كەمشىن تۇستارى – ۇستاز وقۋ وزاتى 5-6 ۇزدىك وقۋشىمەن عانا جۇمىس ىستەپ, ناتيجەگە جەتتىم دەپ ويلايدى. ال جاڭاشا وقىتۋ ساباعىڭىزدا ءىس-ارەكەت جاساماعان وقۋشى بولمايدى جانە ءار بالادا ءوز-وزىنە دەگەن سەنىمدىلىك پايدا بولادى. سوندىقتان دا مەن بۇل باعدارلامانى مەكتەپتەگى بۇكىل مۇعالىمنىڭ مەڭگەرگەنىن, وقۋشىلاردىڭ وزگەرگەنىن, جاقسى ازامات بولىپ وسكەنىن قالايمىن.
ەلباسىمىز «XXI عاسىر – بىلىمدىلەردىڭ زامانى» دەدى. ءبىز مەملەكەت باسشىسى قويعان تالاپتارعا لايىق بولۋىمىز كەرەك», دەيدى ول ءوز ويىن تۇيىندەپ.
شامسۋلبانات اتابالاەۆا,
«باباي-قورعان» جالپى ورتا مەكتەبىنىڭ
قازاق ءتىلى مەن ادەبيەتى ءپانى مۇعالىمى
وڭتۇستىك قازاقستان وبلىسى
