ايماق باسشىسى ە.توعجانوۆ اۋىلشارۋاشىلىق سالاسىنىڭ توعىز ايىن قورىتىندىلاپ, القالى جيىن وتكىزىپ, ايماقتا اتقارىلعان جۇمىستاردىڭ ەسەبىن تىڭداپ, كاسىپكەرلەرمەن كەزدەستى. مال شارۋاشىلىعىن وتكەن جىلمەن سالىستىرعانداندا وڭىردە ءوسىم بار, ياعني مال باسى 12,5 پايىزعا ارتقان. ماسەلەن, بىلتىر (2016 جىل) 482 713 بولسا, بيىل (2017 جىل) 537 247 قۇرادى. كوش باسىندا ماڭعىستاۋ مەن بەينەۋ اۋداندارى تۇر. اسىل تۇقىمدى مال شارۋاشىلىعى – ساپالى دا مول ءونىم ءوندىرۋدىڭ كوزى. قازىرگى كۇنى ماڭعىستاۋ وبلىسى بويىنشا 36 اسىل تۇقىمدى مال شارۋاشىلىعى سۋبەكتىسى تىركەلگەن. ءدال وسى سالاداعى تاۋاروندىرۋشىلەردى مەملەكەتتىك قولداۋ اياسىندا مال ونىمدىلىگىن ارتتىرۋعا وبلىس بويىنشا 260 ملن تەڭگە سۋبسيديا قارجىسى بولىنگەن. مال شارۋاشىلىعىمەن اينالىسام دەگەن ازاماتتارعا جان جاقتى قولداۋ كورسەتىلۋدە. سول ءۇشىن مۇمكىندىكتى ءمۇلت جىبەرمەي, ناقتى ءىس باستاۋ كەرەك دەدى, ەرالى توعجانوۆ.
سونداي-اق بىرككەن اراب امىرلىكتەرىنەن جىلىنا 2,5 ملن باس قويعا سۇرانىس بار ەكەنىن ايتتى. بۇل ءبىزدىڭ ەكسپورتتىق الەۋەتىمىزدى ارتتىرۋعا جول اشاتىن بولادى. سوندىقتان بارلىق شوپانداردى قويدى كوپ وسىرۋگە شاقىردى. وسى رەتتە شوپان كومەكشىلەرىنە اي سايىن تۇراقتى جالاقى بەرىلىپ تۇراتىنىن مالىمدەدى.
بۇگىندە وبلىس بويىنشا ەگىستىكپەن اينالىساتىن 120 شارۋاشىلىق جانە 13593 ءۇي شارۋاشىلىقتارى بار. بيىلعى ەگىن القابىنىڭ كولەمى – 1100 گا (2016 ج 941 گا). سونىمەن قاتار 27 جىلىجاي كەشەنى جۇمىس ىستەپ تۇر. بۇل سالادا دا مەملەكەت تاراپىنان 181 ملن تەڭگە سۋبسيديا بولىنگەن. الداعى ۋاقىتتا ايماقتاعى جىلىجايلار مەن ۇڭعىمالاردىڭ سانىن ارتتىرىپ, جاپپاي تامشىلاپ سۋارۋ تەحنولوگياسىنا ءوتۋ كەرەكتىگى ايتىلدى. جيىن سوڭىندا وبلىس اكىمى بۇل كورسەتكىشتەرمەن توقمەيىلسۋگە بولمايتىنىن ەسكەرتىپ, ەگىن جانە اۋىلشارۋاشىلىق سالاسىندا ءونىم وندىرەتىن كاسىپورىندارعا ءوندىرىس كولەمىن كوبەيتۋدى تاپسىردى. سونىمەن قاتار, مەملەكەتتىڭ جەڭىلدىكتەرىن پايدالانا وتىرىپ, جاڭا كاسىپورىندار اشۋ كەرەكتىگىن اتاپ ءوتتى.
گۇلايىم شىنتەمىرقىزى,
«ەگەمەن قازاقستان»
