قازاق جەرىندە شىمىلدىعىن ءتۇرىپ وتىرعان بۇل شارانىڭ نەگىزگى ماقساتى – تۇركىتىلدەس ەلدەرمەن رۋحاني ىنتىماقتاستىقتى ارتتىرا وتىرىپ, تۇركى دۇنيەسىنىڭ مادەني قۇندىلىقتارىن دەرەكتى فيلمدەر ارقىلى جاريالاۋ, ناسيحاتتاۋ جانە ءبىر-بىرىمەن اقپارات الماسۋ. بىلتىر تۇركيانىڭ ىستانبۇل شاھارىندا باستاۋ العان كينوفەستيۆال, بيىل ەكىنشى رەت قازاقستاندا ۇيىمداستىرىلىپ وتىر. بۇل فەستيۆال كەلەر جىلى تۇرىكمەنستاندا, ودان ءارى قىرعىزستان, باشقۇرتستان, تاتارستان سىندى جالپى العاندا التى تۇركىتىلدەس ەلدە وتكىزىلەتىن بولادى.
«بىرلىك – تىلدە, سەنىمدە جانە ىستە» ۇرانىمەن تۇركى دۇنيەسى جۋرناليستەر فەدەراتسياسى مەن ءال-فارابي اتىنداعى قازۇۋ بىرلەسىپ ۇيىمداستىرىپ وتىرعان شاراعا كاسىبي جانە ءالى تانىلا قويماعان جاس رەجيسسەرلەردىڭ ۇزدىك تۋىندىلارى ۇسىنىلدى. الۋان ءتۇرلى تاقىرىپتى قاۋزاعان فيلمدەر جاڭاشىل باعىتىمەن, سونى مازمۇنىمەن كوڭىل اۋداردى. مىسالى, فەستيۆالدىڭ كورەرمەنگە ۇسىنعان العاشقى تۋىندىسى «تازا اقپاراق» ءفيلمى ۇشقان قۇس, جۇگىرگەن اڭنان وزگە تىرس ەتكەن تىرشىلىك نىشانى بىلىنبەيتىن تۋندراداعى اپپاق الەمنىڭ ىشىندە ءومىر ءسۇرىپ جاتقان قاراپايىم ياكۋت وتباسى تۋرالى تولعايدى. وركەنيەتتەن جىراقتا, جىل ون ەكى اي سىرەسكەن اق قار مەن كىشكەنتاي عانا كۇركەنىڭ ىشىندە ءومىر ءسۇرىپ جاتقان ءبىر ءۇيلى جان نە ءۇشىن تىرشىلىك كەشىپ ءجۇر؟ ومىرگە كەلگەن سوڭ ارقالايتىن مۇراتى بار ما؟ جالپى ولار نە تۋرالى ويلايدى؟ شاناعا يت جەگىپ, قاراعاي قۇلاتىپ, وت جاعىپ, اينالاسىنا القا-قوتان وتىرىپ اڭگىمەلەسكەننەن باسقا نە ونەرى بار؟ ادامزات كوشىنىڭ ارباسىنان ءتۇسىپ قالعانداي اسپان مەن جەردەن وزگە اينالاسىندا ەشنارسەسى جوق وسى ءبىر ءۇيلى جان الەم تۋرالى تولعانا الا ما؟ رەجيسسەر قاراپايىم وتباسىنىڭ ومىرىنەن تۇسىرگەن 20 مينۋتتىق ءفيلمى ارقىلى وركەنيەتكە جۇتىلىپ بارا جاتقان ءبۇتىن ءبىر ۇلتتىڭ تاعدىرىنا اراشا سۇراعانداي...
فەستيۆال اياسىندا قوناقتار مەن ستۋدەنتتەرگە بۇدان وزگە قازاقستان رەجيسسەرى مىرعالىم ەسىركەپوۆتىڭ «يشتۆان قوڭىر ماندوكي», باشقۇرتستان رەجيسسەرى تاڭشولپان بۋراكەەۆانىڭ «باشقۇرت ايەلىنىڭ كيىمى», قىرعىز ەلىنەن كەلگەن ستۋدەنت رەجيسسەر كۋبانىچبەك قاسيەتتىڭ «ويماق», تاتارستاننان كەلگەن سالاۆات يۋزەەۆتىڭ «كوكشەل قۇس» فيلمدەرى تانىستىرىلدى.
تۇركى دۇنيەسى دەرەكتى فيلمدەرى ءىى حالىقارالىق كينوفەستيۆالىنىڭ قۇرمەتتى قوناقتارى رەتىندە ءال-فارابي اتىنداعى قازۇۋ-ءدىڭ رەكتورى, اكادەميك عالىمقايىر مۇتانوۆ, تۇركى دۇنيەسى جۋرناليستەر فەدەراتسياسىنىڭ پرەزيدەنتى, ORT تV پرەزيدەنتى, تۇركى دۇنيەسى دەرەكتى فيلمدەر كينوفورۋمى كوميتەتىنىڭ پرەزيدەنتى مەندەرەس دەمير, تۇركى دۇنيەسى جۋرناليستەر فەدەراتسياسىنىڭ فەستيۆال ديرەكتورى تۋران شاحين, ىستانبۇل مۋنيتسيپاليتەت مادەني جوباسىنىڭ ديرەكتورى ساليح دوگان, كينو فەدەراتسياسىنىڭ ديرەكتورى مەحمەت گۋلەرۋز, تۇركيا پرەمەر-ءمينيسترى ىنتالاندىرۋ قورىنىڭ وكىلى يسا يايلا, تاعى باسقا تۇركيالىق تانىمال كينوماماندار مەن باۋىرلاس ەلدەردەگى ونەر وكىلدەرى قاتىستى.
ايگۇل احانبايقىزى,
«ەگەمەن قازاقستان»
الماتى
