بۇعان دەيىن «ابىلاي حان اۋلەتى» (2013), «باراق سۇلتان اۋلەتى» (2013), «ابىلمامبەت حان اۋلەتى» (2015), «دوسالى سۇلتان بۇلقايىر ۇلى» (2015), «سامەكە حان اۋلەتى» (2017) زەرتتەۋ ەڭبەك-مونوگرافيالارىمەن تانىمال عالىمنىڭ جاڭا كىتابىندا قازاق قوعامىنداعى سۇلتاندار ينستيتۋتىنىڭ قالىپتاسۋى, ىدىراۋى جانە كۇيرەۋ كەزەڭدەرىنە شولۋ جاسالعان. «سۇلتان», «تورە» سوزدەرىنىڭ ەتيمولوگياسىنان باستاپ قازاق بيلەۋشىلەرى اۋلەتىنىڭ گەرالديكالىق بەلگىلەرى, بالا تاربيەسى, تابىس كوزدەرى, نەگىزگى ۇستانىمدارى سەكىلدى كوپتەگەن ماسەلەلەر قامتىلعان زەرتتەۋدىڭ تانىمدىق ءمانى وتە زور. بۇل ەڭبەك عالىمنىڭ سوڭعى ون جىلدان اسا ۋاقىت بويعى ىزدەنىسىنىڭ ناتيجەسى.
«ۇلت تاريحىندا سۇلتاندار-تورەلەر اۋلەتىنىڭ ورنى بار ەكەندىگى ەشقانداي كۇمان تۋدىرماسا كەرەك. قازاق حاندىعىن قالىپتاستىرۋ, سول نەگىزدە قازاق ۇلتىنىڭ ۇيۋى ءىسىنىڭ جۇرگەنى, وسى پروتسەستەردىڭ باسى-قاسىندا تورەلەر اۋلەتىنىڭ جۇرگەندىگى دالەلدەۋگە مۇقتاج ەمەس اقيقات. باسقاشا ايتقاندا, سۇلتاندار اۋلەتى قانداي قۇرمەتكە دە لايىق. ارمان قيات دايارلاعان زەرتتەۋ سونداي قۇرمەتتىڭ كورىنىسى», دەيدى وسى ەڭبەككە پىكىر جازعان پروفەسسور مامبەت قويگەلديەۆ.
اتالمىش ەڭبەككە ۇعا اكادەميگى حانگەلدى ءابجانوۆ «كىتاپتىڭ قۇرىلىمىنان-اق زەرتتەۋشىنىڭ تاقىرىپقا ۇلكەن دايارلىقپەن كەلگەنىن بايقاۋعا بولادى. مۇندا سۇلتاندار ينستيتۋتىنىڭ پايدا بولعانىنان كۇيرەگەنگە دەيىنگى تاعدىرى, ستاتيستيكالىق كەلبەتى, اۋماقتىق ورنالاسۋى, ساياسي ميسسياسى, ەتنوگرافيالىق بولمىس-ءبىتىمى, پەداگوگيكالىق ۇستانىمدارى, ت.ب. ماسەلەلەر تالدانعان. عىلىمي ناتيجەلەرىنىڭ قولدانبالىق ماڭىزى زور» دەگەن باعا بەرىپتى.
قازبەك قۇتتىمۇرات ۇلى,
«ەگەمەن قازاقستان»
ورال
