كوميسسيا توراعاسىنىڭ ايتۋىنشا 2017 جىلدىڭ 29 قازان كۇنى وتكەن سايلاۋ قورىتىندىسى بويىنشا باتىس قازاقستان وبلىستىق ءماسليحاتىنا – 1, ورال قالالىق ءماسليحاتىنا – 1, اۋداندىق ماسليحاتتارعا – 6 دەپۋتات سايلانعان. اتاپ ايتساق, ولار: بقو ءماسليحاتىنا – «اقسايگاسەرۆيس» اق پرەزيدەنتى تىلەك شەكتىباەۆ, ورال قالالىق ءماسليحاتىنا – «ۆوداكانالسترويسەرۆيس» جشس ديرەكتورى ءانۋار مۇقاتاەۆ, ءبورلى اۋداندىق ءماسليحاتىنا – «Project Group» جشس-ءنىڭ اۋدارماشىسى ماليكا ماحاۋوۆا, جانىبەك اۋداندىق ءماسليحاتىنا – م.ىقسانوۆ اتىنداعى جانىبەك كوللەدجىنىڭ ديرەكتورى بەرىك يحسانوۆ, قازتالوۆ اۋداندىق ءماسليحاتىنا – №4 تەرەڭكول سايلاۋ وكرۋگى بويىنشا قازتالوۆ اۋىلدىق وكرۋگىنىڭ اكىمى سارسەنباي مولداشەۆ, قازتالوۆ اۋداندىق ءماسليحاتىنا – №12 كوكتەرەك سايلاۋ وكرۋگى بويىنشا «رايىمبەك» شارۋا قوجالىعىنىڭ جەتەكشىسى رۋسلان سارباەۆ, تەرەكتى اۋداندىق ءماسليحاتىنا – №2 اقسۋات سايلاۋ وكرۋگى بويىنشا جەكە كاسىپكەر قايرات ءادىلحانوۆ, تەرەكتى اۋداندىق ءماسليحاتىنا – №5 پودستەپنوە سايلاۋ وكرۋگى بويىنشا تەرەكتى كوللەدجى ديرەكتورىنىڭ ورىنباسارى ەرسايىن ءناسىپوۆ.
- بارلىق دەڭگەيدەگى سايلاۋ كوميسسيالارىنىڭ جۇمىسى بەكىتىلگەن كۇنتىزبەلىك جوسپارعا ساي جۇرگىزىلدى. سايلاۋعا بارلىعى 26 كانديدات ۇسىنىلسا, ونىڭ 18-ءى ءوزىن-ءوزى, 8-ءىن ساياسي پارتيالار ۇسىنعان. سايلاۋعا ساياسي پاريالار مەن سەنىم بىلدىرگەن ادامدار قاتارىنان 96 بايقاۋشى جانە 7 باق وكىلى بايقاۋ جۇرگىزدى. بارلىق سايلانعان دەپۋتاتتار جوعارى ءبىلىمدى, ونىڭ ىشىندە 1-ءۋى ايەل بولسا, قالعان 7-ءۋى ەرلەر. سونداي-اق, ولاردىڭ 2-ءۋى بيزنەس وكىلى, 2-ءۋى جەكە كاسىپكەر, 3-ءۋى ءبىلىم سالاسىنىڭ وكىلى, 1-ءۋى اۋىلدىق وكرۋگ اكىمى. سايلانعان دەپۋتاتتاردىڭ ورتاشا جاسى 49,3 قۇرايدى, - دەدى ع.قاپاقوۆ.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
