دەسە دە, كەپىلدىك بەرۋ تۋرالى شارتقا قول قويۋ ءۇشىن قۇرىلىس سالۋشىلاردىڭ بارلىعى سايكەس كەلگەن جوق. كەيبىر كومپانيالار قاجەتتى قۇجاتتاردى ءتيىستى دەڭگەيدە قامتاماسىز ەتە المادى. ەندى بىرەۋلەرى قۇرىلىس سالۋشىلاردىڭ كەپىلدىك جارنانىڭ جوعارى مولشەرلەمەسىن اتاپ ءوتتى. دەگەنمەن, ءبىر جىل ىشىندە كەپىلدىك بەرۋ قورى ەكى قالادا سالىنىپ جاتقان ۇيلەر بويىنشا ەكى كەپىلدىك بەردى. ولار – استانا قالاسىنداعى «ميللەنيۋم پارك» تۇرعىن ءۇي كەشەنىنىڭ ءبىر سەكتسياسى مەن الماتى قالاسىنداعى «لەگەندا» تۇرعىن ءۇي كەشەنىنىڭ ءبىرىنشى كەزەگى. وسىلايشا قور كەپىلدىگى وسى تۇرعىن ۇيلەردەن ۇلەس ساتىپ الۋعا نيەت بىلدىرگەن ازاماتتارعا قانداي جاعداي بولماسىن پاتەرلەرىنىڭ كىلتىن الۋدى قامتاماسىز ەتەدى.
كەشە استانا قالاسىندا «بايتەرەك» ۇلتتىق باسقارۋشى حولدينگى جانىنان قۇرىلعان تۇرعىن ءۇي قۇرىلىسىنا كەپىلدىك بەرۋ قورى ۇلەستىك قۇرىلىس بويىنشا كونسۋلتاتيۆتىك كەڭەس وتكىزدى. وتىرىس بارىسىندا قوردىڭ باسقارما توراعاسىنىڭ ورىنباسارى ايگۇل جۇماتاەۆا ءسوز سويلەپ, جەر تەلىمىن الۋ بويىنشا تىلشىلەردىڭ ساۋالدارىنا جاۋاپ بەردى.
«بۇگىن تالقىلاناتىن ماسەلەنىڭ ءبىرى قۇرىلىسقا جەر تەلىمىن الۋعا قاتىستى بولادى. قازىرگى كەزدە قوردىڭ كەپىلدىگىن الۋ ءۇشىن جەر تەلىمىنە يە بولۋ كەرەك, ياعني مەنشىك يەسى نەمەسە ۇزاق مەرزىمدى جالعا الۋ قۇقىعى بويىنشا جەرى بولۋى قاجەت. جەر كودەكسى اياسىندا قىسقا مەرزىمدى جالعا الۋ قۇقىعىنداعى جەر ۋچاسكەسىن كەپىلگە ۇسىنۋعا تىيىم سالىنعان», دەپ ءتۇسىندىردى ا.جۇماتاەۆا. ونىڭ سوزىنە قاراعاندا, جەرگىلىكتى اتقارۋشى ورگاندار جەر تەلىمدەرىن قىسقا مەرزىمدى جالعا بەرەدى. «وسى تۇرعىدا بىزگە جەردى پايدالانۋ قۇقىعى مەرزىمىن ۇزارتۋ ءۇشىن جەرگىلىكتى اتقارۋشى ورگاندارعا جولىعۋ كەرەك. بىزدە استانا مەن الماتى اكىمدىكتەرىمەن بەكىتىلگەن ءتيىستى مەموراندۋمدار بار. اتاپ ايتقاندا, جالعا الۋ مەرزىمىن ارتتىرۋ بويىنشا قۇجاتتاردى قاراستىرۋ پروتسەسىن جىلدامداتۋعا جاعداي جاساماقپىز», دەدى ول.
ماماننىڭ ايتۋىنشا, باستى ماقسات – قور كەپىلدىگىن الۋ ءۇشىن وڭىرلەردى بارىنشا كوپتەپ تارتۋ. «وزدەرىڭىز بىلەسىزدەر, قور كەپىلدىگى ۇلەسكەردىڭ ءوزىنىڭ پاتەرىنە مىندەتتى تۇردە قول جەتكىزۋىنە جاعداي جاساۋعا نەگىزدەلگەن. ياعني, قۇرىلىس سالۋشىنىڭ مۇمكىندىگى سارقىلسا, تۇرعىن ءۇي قۇرىلىسى تۇرالاپ قالمايدى. بۇل باعىتتاعى جۇمىستاردىڭ بارلىعىن قور ءوز موينىنا الادى. بۇگىندە وڭىرلەردە بىزگە ءوتىنىم جاساپ جاتقان بىرنەشە جوبالاردى قاراستىرىپ جاتىرمىز», دەدى قوردىڭ باسقارما توراعاسىنىڭ ورىنباسارى.
قوردىڭ تەحنيكالىق مونيتورينگ دەپارتامەنتىنىڭ ديرەكتورى جانىبەك ماڭقاراەۆ وسى ۋاقىتقا دەيىن قۇرىلىس كومپانياسى تۇرعىزعان ءۇيدىڭ ۇلەسكەرلەر قولىنا تيۋىنە عانا كەپىلدىك بەرىلسە, ەندى زاڭ نەگىزىندە تۇرعىن ءۇيدىڭ ساپاسى مەن ۇلەسكەرلەر قارجىسىن ءتيىمدى پايدالانۋدى قاداعالاۋ دا قورعا جۇكتەلىپ وتىرعانىن ايتتى. «بۇل جەردە ءبىز شارت جاساسقان ۋاكىلەتتى ورگان قۇرىلىستى ءتۇرلى سەبەپتەرمەن اياقتاي الماعان جاعدايدا, رەسپۋبليكالىق بيۋدجەتتەن تۇسكەن قاراجاتىمىز ارقىلى نىساندى تۇرعىزىپ, ۇلەسكەرلەرگە تاپسىرامىز. مۇندا ۇلەسكەر تاراپىنان بىزگە ەشقانداي اقشا سالۋدىڭ كەرەگى جوق ەكەنىن, ال قۇرىلىس كومپانياسى كەپىلدىك مولشەرىن عانا اۋداراتىنىن ايتا كەتكەن ءجون. شىعىندار بوس پاتەرلەردى, وزگە دە امبەباپ نىسانداردى ساتۋ ارقىلى جابىلادى. جىل اياعىنا دەيىن استانا مەن الماتى قالالارىندا, وڭتۇستىك قازاقستان مەن قاراعاندى وبلىستارىندا 5-6 تۇرعىن ءۇي كەشەنىنە كەپىلدىك بەرۋ جوسپارلانۋدا», دەدى ول.
اسحات رايقۇل,
«ەگەمەن قازاقستان»
