شاراعا ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالى دراما تەاترىنىڭ ديرەكتورى ايبولات سەكسەنباەۆ, م.گوركي اتىنداعى مەملەكەتتىك اكادەميالىق ورىس دراما تەاترىنىڭ باسشىسى ەركىن قاسەنوۆ جانە جاستار تەاترىنىڭ جەتەكشىسى ەرنار جۇماتاەۆ قاتىستى. تەاتر باسشىلارى جاڭا ماۋسىمداعى جوسپارلارىمەن ءبولىسىپ, باق وكىلدەرىنىڭ ساۋالدارىنا جاۋاپ بەردى.
ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالى دراما تەاترىنىڭ ديرەكتورى ايبولات سەكسەمباەۆ الداعى ۋاقىتتا جاس دراماتۋرگتەرمەن, جاس رەجيسسەرلەرمەن جۇمىس ىستەمەك جوسپارلارى بار ەكەنىن جەتكىزدى. «بۇگىنگى جيىن بارىسىن پايدالانا وتىرىپ, جاس دراماتۋرگتەرمەن جۇمىس ىستەۋ نيەتىمىز بار ەكەنىن ايتقىم كەلەدى. اسىرەسە كومەديا جانرىندا ىزدەنىپ جۇرگەن جاس دراماتۋرگتەر بولسا, شىعارمالارىمەن تانىسۋعا, تالقىلاۋعا نيەتتىمىز», دەدى. ول سونداي-اق بۇگىنگى زاماننىڭ كەلبەتىن ءدال بەينەلەيتىن شىعارمالارعا دا تەاتر تاراپىنان سۇرانىستىڭ بار ەكەنىن ايتتى.
ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالى دراما تەاترى جاڭا ماۋسىمىن 26 قازان كۇنى م.اۋەزوۆتىڭ «اباي» تراگەدياسىمەن اشادى. سپەكتاكلدىڭ قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى الىمبەك ورازبەكوۆ. «اباي» تراگەدياسىندا ابايدىڭ اعالىق جاستاعى ءرولىن قازاقستاننىڭ حالىق ءارتىسى تىلەكتەس مەيراموۆ سومداسا, جاس ابايدى قازاقستاننىڭ ەڭبەك سىڭىرگەن قايراتكەرى نۇركەن وتەۋىلوۆ وينايدى. «بيىلعى جىلدىڭ جوسپارىندا قىزىقتى, تارتىمدى سپەكتاكلدەر مول بولماق. كورەرمەندەرىمىز ءشامشى بەينەسىمەن قاۋىشاتىن بولادى. ورالحان بوكەيدىڭ شىعارمالارىن ساحناعا شىعارۋدى جوسپارلاپ وتىرمىز. رەسپۋبليكالىق فەستيۆالدارعا, شەتەلدەردە وتەتىن الەمدىك دەڭگەيدەگى ونەر بايگەلەرىنە قاتىسۋ دا جوسپارىمىزدا بار», دەدى تەاتر ديرەكتورى ا.سەكسەنباەۆ. ول وتكەن جىلدىڭ ءبىرشاما جەتىستىكتەرىمەن دە تانىستىرىپ ءوتتى. ونىڭ ىشىندە تەاتر ارتىستەرىنىڭ ءتۇرلى اتاق-ماراپاتتاردى يەلەنۋى, تەاتر سپەكتاكلدەرىنىڭ فەستيۆالداردا ماماندار تاراپىنان جوعارى باعالانۋى اڭگىمە ارقاۋىنا اينالدى.
جيىن بارىسىندا م.گوركي اتىنداعى ورىس دراما تەاترى 117-ءشى تەاتر ماۋسىمىن بۇگىن, ياعني 25 قازان كۇنى ا.س.پۋشكيننىڭ «ەۆگەني ونەگين» پرەمەرالىق قويىلىمىمەن اشاتىنى بەلگىلى بولدى. سونداي-اق تەاتردىڭ جاڭا ماۋسىمى ەلوردامىز استانا قالاسىنىڭ 20 جىلدىعىنا ارنالماق. وسى ۋاقىتتا ۇجىم ف.دوستوەۆسكيدىڭ «اعايىندى كارامازوۆتار», ا.ەكزيۋپەريدىڭ «كىشكەنتاي حانزادا» تۋىندىلارىنىڭ جاڭا قويىلىمىن ساحنالاۋدى جوسپارلاپ وتىر.
ال جاستار تەاترىنىڭ قۇرىلعانىنا بيىل ون جىل بولادى. سونداي-اق ونىڭ كوركەمدىك جەتەكشىسى ءارى باس رەجيسسەرى نۇرقانات جاقىپباي 70 جاسقا كەلدى. وسىعان وراي 25 قازان مەن 1 قاراشا كۇندەرى ارالىعىندا «جانارىمداعى جالعىز اۋەن» اتتى جاستار تەاترىنىڭ ۇزدىك مۋزىكالىق قويىلىمدار فەستيۆالى وتپەك. تەاتر باسشىسى فەستيۆال اياسىندا اكتەر شەبەرلىگى, ساحنا قوزعالىسى, ساحنا ءتىلى جانە ۆوكال باعىتى بويىنشا اكتەرلەردىڭ كاسىبي بىلىكتىلىگىن ارتتىرۋعا ارنالعان شەبەرلىك ساباقتار وتەتىنىن مالىمدەدى.
ايگۇل سەيىل,
«ەگەمەن قازاقستان»
