تەاتردىڭ توڭىرەگىندە جۇرگەندەر دە, ونەر مەن مادەنيەتتى سارالايتىندار دا الدىمەن «اشىربەك نە دەر ەكەن؟» دەپ اۋزىنا قاراپ, الدىنا جۇگىنەتىنى كەشە عانا سياقتى ەدى. كۇلبىلتەلەمەي كەسىپ ايتاتىن مىنەزىنە كەڭدىگى مەن جايساڭدىعى قوسا جاراسىپ, كەشە عانا ايتقان قاتتى سىنىنان بۇگىن ءبىر مىسقال دا ىزعار قالدىرماي, ىمىراعا تەز كەلە قوياتىن كەشىرىمشىل قاسيەتى ونەردەگى ارىپتەستەرىنىڭ وزىنە دەگەن ىقىلاسى مەن قۇرمەتىن ارتتىرماسا, كەمىتكەن جوق. مىنەزىندەگى تۋرالىققا ءتانتى بولمايتىن, وت اۋىز, وراق تىلىنە سۇيسىنبەيتىن, باپپەن جەتكىزەتىن داۋىسىنىڭ اۋەزىنە ەلىتپەيتىن ادام كەمدە-كەم ەدى.
ءار ءسوزى مارجانداي ءتىزىلىپ, سويلەگەندە تىڭداعان قۇلاقتى ۇيىتقان, سىناپ تۇرىپ سيپاي قامشىلاۋدى بىلمەگەن, قامشى تيگەنىن قايراتتاندىرعان قازاق ونەرىنىڭ جاناشىر قازاناتىنىڭ جۇرەگىنىڭ توقتاعانىنا دا بيىل ءۇشىنشى جىلدىڭ ءجۇزى بولدى. تەاتر ونەرىنىڭ ءبىرتۋار بىلگىرى ءتىرى بولعانىندا 70 جاسقا تولىپ, قازان ايىن قۋانىشپەن قارسى الىپ جاتار ەدى. ورتا تولتىرىپ ءوزى وتىرماسا دا, قاۋمالاعان قالىڭ قازاعى بىرەگەي ۇلىنىڭ ەسىمىن ارداقتاپ, م.اۋەزوۆ اتىنداعى قازاق مەملەكەتتىك اكادەميالىق دراما تەاترىندا ونەرسۇيەر قاۋىمنىڭ باسىن قوسىپ, دۇركىرەتىپ يگى شارا وتكىزدى.
«ونەرگە اششى تەرى تامىپ قىزمەت ەتكەن, سول ولكەنىڭ وركەن جايۋىنا ولشەۋسىز ۇلەس قوسقان ءبىرتۋار ماڭعاز ازاماتىم» دەپ ۇلىقتادى. اشىربەك اعامىزدىڭ ءوز الەمى سياقتى بۇل كەشتە دە تەك ادەمى سىر عانا اقتارىلدى. تەاترتانۋدىڭ ءتىرى شەجىرەشىسىندەي بولىپ, ارعى-بەرگى تاريحتى تارازىلاعان تانىمى تاڭداي قاقتىرماي قويمايتىن سىنشىنىڭ ازاماتتىق, قايراتكەرلىك قاسيەتتەرىن ونەردەگى اعالارى مەن ارىپتەستەرى جارىسا ايتىپ, جان جادىراتار ەستەلىكتەرىن رياسىز كوڭىلمەن ءبىلدىردى. كسرو حالىق ءارتيسى حاديشا بوكەەۆاداي ساحنا ساڭلاعىنان ءتالىم الىپ, بەلگىلى تەاتر سىنشىسى باعىبەك قۇنداقباەۆتىڭ ىزىمەن سىن جازىپ, مادەنيەت ءمينيسترىنىڭ ورىنباسارى لاۋازىمىنا دەيىن قىزمەت اتقارعان اشىربەك سىعاەۆتى رۋحانيات سالاسىمەن بىتە قايناسىپ جۇرگەن الماتى قالاسى اكىمىنىڭ ورىنباسارى ارمان قىرىقباەۆتىڭ «بيلىك سالاسىندا ءجۇرىپ تە مادەنيەتكە شىعارماشىلىق كوزبەن قاراعان اسىلدارىمىزدىڭ سوڭعى لەگى» دەپ باعالاۋى تەاتر سىنشىسىنىڭ ازاماتتىق بولمىسىن ايشىقتاعان اردا ءسوز رەتىندە قابىلداندى.
تەاتردىڭ توڭىرەگىندە ايگىلى رەجيسسەرلەر, بەلگىلى دراماتۋرگتەر, اتاقتى اكتەرلەر تولىپ جۇرسە دە, ساحنا ونەرىنىڭ جالعىز سۇڭعىلاسى ءھام باس مامانى دەپ ەل-جۇرتى اشىربەك سىعايدى تانىدى جانە بۇل وتىرىك ەمەس. قادىر مىرزاليەۆ, سەرىك تۇرعىنبەك, يسرايل ساپارباي, ءشومىشباي ساريەۆ سەكىلدى قازاق پوەزياسىنىڭ ءىرى وكىلدەرى اشىربەك سىعايعا ءار كەزدە ءوز ولەڭدەرىن ارنادى. بۇل جۇرەكجاردى جىرلاردى قازاقستاننىڭ ەڭبەك سىڭىرگەن قايراتكەرلەرى سايات مەرەكە ۇلى, تولەۋبەك ارالباەۆ, باقتيار قوجا جانە جالعاس تولعانباي ساحنا تورىنەن جولداعاندا, اقىنداردىڭ شىنشىل ازاماتتىڭ تۇلعاسىن تانۋداعى شەبەرلىكتەرى تالاي جۇرەك شىمىرلاتتى. كەش اجارىن نۇرعالي ءنۇسىپجانوۆ, ساكەن قالىموۆ, باقىت شاداەۆا, بەكجان تۇرىس سەكىلدى قازاقستاننىڭ بەلگىلى ونەر شەبەرلەرى ورىنداعان شۋاقتى اندەر اشا ءتۇستى.
كەڭپەيىل, دارقان مىنەزدى ادامنىڭ ىزدەنىمپازدىعى, جالعاندىققا, جاعىمپازدىققا توزە المايتىن تۋراشىلدىعى, ونەر ءۇشىن شىرىلداپ, وتقا تۇسە جازدايتىن قايسار قاسيەتى تۋرالى جانىندا ءجۇرىپ تالاي جىل جولداس بولعان اقىن, قازاقستان جازۋشىلار وداعىنىڭ ءتور-اعاسى نۇرلان ورازالين, قازاقستاننىڭ ەڭبەك ەرى ءاسانالى ءاشىموۆ, قازاقستاننىڭ حالىق ءارتىسى ءسابيت ورازباەۆتار وزدەرى كۋا بولعان وقيعالاردى ەسكە الا تۇرىپ, ەلجىرەي اڭگىمەلەدى. تەاتر ونەرى, ساحنا سىرى تۋرالى تۇپ-تۋرا جيىرما كىتاپ جازعان اشىربەك سىعاي ءوزى قانشالىقتى اعىل دا تەگىل مول ءبىلىمنىڭ يەسى بولسا, ول تۋرالى ەستەلىكتەردىڭ دە ەشقاشان ەسكىرمەيتىنىن, تولاستاۋى دا مۇمكىن ەمەس ەكەنىن وسى كەش كورسەتتى.
ايگۇل احانبايقىزى,
«ەگەمەن قازاقستان»
الماتى
