وڭىرلەردى دامىتۋ باعدارلاماسى بويىنشا بيىل 55 ەلدى مەكەندى اۋىز سۋمەن قامتۋ جۇمىستارى باستالعان ەدى. 8 اۋىلدا بۇل جۇمىستار اياقتالدى, كوشىم – بيىل تازا سۋ جەتكىزىلگەن توعىزىنشى اۋىل. جاقىن كۇندەرى زەلەنوۆ اۋدانىنداعى ششاپوۆ اۋىلى تۇرعىندارى دا وسىنداي قۋانىشقا كەنەلمەكشى.
– باتىسقازاقستاندىقتار ءۇشىن ورتالىقتاندىرىلعان اۋىز سۋمەن قامتۋ ماسەلەسى وتە وزەكتى بولىپ تۇر. قازىرگى تاڭدا وڭىردەگى 443 ەلدى مەكەننىڭ 36 پايىزى عانا تازا اۋىز سۋمەن قامتىلعان. بۇل – وتە تومەن كورسەتكىش. سوندىقتان پرەزيدەنتتىڭ تىكەلەي تاپسىرماسى بويىنشا ۇكىمەت تاراپىنان 55 ەلدى مەكەندى تازا اۋىز سۋمەن قامتاماسىز ەتۋ ماقساتىندا 11 ملرد تەڭگە بولىنگەن بولاتىن. بۇل قارجىنىڭ 9 ملرد تەڭگەسى بيىل يگەرىلدى. اتالعان جوبالار جۇزەگە اسقان كەزدە وبلىس تۇرعىندارىنىڭ 44 پايىزى تازا سۋمەن قامتىلاتىن بولادى. 12 اۋىلعا ارنالعان جوبا كەلەر جىلى اياقتالادى. قالعان اۋىلدار وسى جىلدىڭ سوڭىنا دەيىن تازا سۋعا قول جەتكىزەدى, دەيدى باتىس قازاقستان وبلىسىنىڭ اكىمى التاي كولگىنوۆ.
التاي سەيدىر ۇلى تۇرعىنداردى تازا اۋىز سۋمەن قامتۋ جۇمىسى كەلەر جىلى دا جۇرەتىنىن مالىمدەدى. 2018 جىلى وبلىستا تاعى 50 اۋىلعا سۋ تارتۋ جۇمىستارى جۇرگىزىلمەك. بۇل جوبالاردى ىسكە اسىرۋ بارىسىندا جەرگىلىكتى قۇرىلىس ماتەريالدارى قولدانىلۋى شاعىن كاسىپورىندار جۇمىسىن شيراتىپ, ەكونوميكالىق وسىمگە قوزعاۋ بولعان, قوسىمشا جۇمىس ورىندارى اشىلعان.
ءبىز ءسوز ەتىپ وتىرعان كوشىم اۋىلىن سۋمەن قامتۋ باعدارلاماسىنىڭ جوبالىق قۇنى 198,374 ملن تەڭگە ەكەن. جۇيەنىڭ سۋ ساقتاعىش ەكى مۇناراسى بار. اۋىل ىشىندە 20 شاقىرىم سۋ قۇبىرى جۇرگىزىلگەن. جوسپار بويىنشا جاڭا سۋ قۇبىرى جەلتوقسان ايىندا تاپسىرىلۋى كەرەك-تۇعىن. جوبانىڭ باس مەردىگەرى جەرگىلىكتى «نيرا» جشس مەكەمەسى جۇمىستى مەجەلەنگەن ۋاقىتىنان بۇرىن ءارى ساپالى اتقارىپ شىققان.
– ءبىزدىڭ تۇرعىندار بۇل مەكەمەنىڭ جاۋاپكەرشىلىگى مول ۇجىم ەكەنىن بىلەدى. وسىدان بىرەر جىل بۇرىن اۋىلدا «تۇرعىن ءۇي-كوممۋنالدىق شارۋاشىلىعىن جاڭعىرتۋ» باعدارلاماسىمەن كوپ قاباتتى ۇيلەردى كۇردەلى جوندەپ, ەلدىڭ ريزاشىلىعىنا بولەنگەن ەدى. ەندى مىنە, اۋىز سۋ قۇبىرى قۇرىلىسىن سونداي تياناقتىلىقپەن اتقارىپ, كوڭىلىمىزدى دەمدەدى, دەيدى تۇرعىندار.
وبلىس باسشىسىمەن بىرگە سۋ جاڭا سۋ قۇبىرىنىڭ «قۇلاعىن بۇراپ», جاڭا قوندىرعىنى ىسكە قوسۋ قۇرمەتىنە يە بولعان اۋىل تۇرعىنى, ەڭبەك ارداگەرى ساعيتجان بەگەنوۆتىڭ بۇل اۋىلعا كەلگەنىنە كوپ بولماپتى. بىراق سۋدىڭ تاقسىرەتىن تارتىپ ۇلگەرگەن.
– كوشىمگە كەلگەنىمىزگە كوپ بولعان جوق. بالالارىم ورال قالاسىنا جاقىن, كۇرە جولدىڭ بويىندا تۇرعان, بولاشاعى زور اۋىل دەپ تاڭداپ, وسى جەردەن جاڭا ءۇي سالدى. سۋدى كورشىلەرىمىزدەن, جەردەن قازىپ العان قۇدىعىنان الىپ پايدالانىپ كەلگەن ەدىك. ەندى مىنە, تازا سۋ ءۇيدىڭ ىشىنە كەلىپ تۇر. ونى قوسۋ ءۇشىن ءبىر تيىن دا تولەگەنىمىز جوق – دەپ قۋانادى ساعيتجان اقساقال.
زەلەنوۆ اۋدانىنىڭ اكىمى اسحات شاحاروۆتىڭ ايتۋىنشا, كوشىم اۋىلىندا 400-دەن استام تۇرعىن ورتالىقتاندىرىلعان سۋ قۇبىرىنا قوسىلعان. جالپى, زەلەنوۆ اۋدانى – وبلىس ورتالىعىنا ەڭ جاقىن ورنالاسقان, توپىراعى قۇنارلى, ءوندىرىسى وركەندەپ كەلە جاتقان ءوڭىر سانالادى. اۋداندا بارلىعى 68 ەلدى مەكەن بار. بيىل مۇندا 5 ەلدى مەكەن تازا اۋىز سۋمەن قامتىلسا, كەلەر جىلى تاعى 7 اۋىلدى تازا اۋىز سۋمەن قامتۋعا قۇجاتتار دايىندالىپ جاتىر. ول جۇزەگە اسقاندا اۋدان حالقىنىڭ 60 پايىزى تازا اۋىز سۋمەن قامتىلاتىن بولادى.
ءسوز رەتى كەلگەندە ايتا كەتەيىك, زەلەنوۆ اۋدانىندا كەلەر جىلى 7 اۋىلعا تابيعي گاز قۇبىرىن تارتۋ دا جوسپارلانىپ وتىر ەكەن.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان وبلىسى
